İyulun 1-dən Azərbaycanda yaşı 15-dən yuxarı olan taksilər olmayacaq
İctimai nəqliyyata dair yeni tələblər
İyulun 1-dən Azərbaycanda istismar müddəti 15 ildən artıq olan avtomobillərdən taksi kimi istifadə olunmayacaq. Səkkiz ildən daha köhnə avtomobil sahibləri isə xüsusi buraxılış kartı ala bilməyəcəklər. Müntəzəm sərnişindaşıma sahəsində yeniliklər ölkə Nazirlər Kabinetinin təsdiq etdiyi yeni sənəddə qeyd olunub.
- Azərbaycanda 25 məcburi köçkün ailəsi dövlətdən kömək gözləyir
- “Azərbaycanda erməni hərbi əsir yoxdur”. Bakıdan baxış
- “Ermənistanda bir şey deyirlər, amma başqa şey edirlər”. Bakıdan şərh
İctimai nəqliyyata dair yeni tələblər
Azərbaycan Nazirlər Kabineti martın 28-də “Daimi və taksi minik avtomobilləri ilə sərnişindaşımalarda istifadə olunan avtonəqliyyat vasitələrinin texniki göstəricilərinə, daxili və xarici görünüşünə dair Tələblər”i təsdiq edib. Tələblər “Avtomobil nəqliyyatı haqqında” qanuna uyğun olaraq hazırlanıb.
Yeni tələblərə görə, avtomobil səkkiz ildən artıq köhnədirsə, belə avtomobilə “Avtomobil nəqliyyatı haqqında” qanuna uyğun olaraq sərnişindaşıma üçün tələb olunan xüsusi buraxılış kartı verilməyəcək.
Bundan əlavə, 15 ildən köhnə avtomobillər taksi xidməti göstərmək üçün istifadə edilə bilməz.
Taksi avtomobilləri interyeri qeydə almaq üçün videokameralarla təchiz edilməli, ən azı bir ay məlumat saxlamaq qabiliyyətinə malik yaddaş kartı ilə təchiz edilməlidir.
Yeni tələblərə əsasən, müntəzəm sərnişindaşıma üçün istifadə olunacaq avtobus və taksilərin rəngləri də müəyyən edilib. Belə ki, müntəzəm rayonlararası daşıma üçün nəqliyyat vasitələri ağ, şəhərdaxili (rayondaxili) nəqliyyat üçün isə qırmızı olmalıdır.
Bu halda elektrik mühərriki olan nəqliyyat vasitələri yaşıl rəngdə olacaq.
Sərnişin taksiləri ya ağ, ya da qırmızı olmalıdır.
Sonradan dəqiqləşdirilib ki, taksi fəaliyyəti tələblərə cavab verən istənilən rəngli avtomobillə həyata keçirilə bilər. Amma avtomobil ölkəyə 2024-cü il iyulun 1-dən sonra başqa rənglərdə gələrsə, ona daha taksi fəaliyyəti üçün lisenziya verilməyəcək.
Bundan əlavə, taksilər bütün sərnişinlər və sürücü üçün təhlükəsizlik kəmərləri ilə təmin edilməlidir. Bununla yanaşı, taksilər Avro-5 ekoloji standartlarına uyğun olmalıdır.
Sənədə əsasən, sərnişin taksiləri nağdsız ödənişlər üçün POS terminallarla təchiz edilməli olacaq. Həmçinin taksi avtomobilində sarı-qara və ya ağ-qara “şahmat” kvadratları və qara hərflərlə “Taksi” yazısı olan arxa işıqlı dama olmalıdır.
“Prius” satış elanları üç dəfə artıb
Trend xəbər agentliyinin məlumatına görə, yeni qərardan sonra elan saytlarında Prius modellərinin satışı ilə bağlı elanların sayı kəskin artıb.
Nəqliyyat eksperti Elnur Sərdarlı bildirib ki, taksi fəaliyyəti ilə məşğul olanlar əsasən hibrid mühərrikli, minimum yanacaq sərf edən “Toyota Prius” markalı avtomobillərdən istifadə edirlər.
“Yeni qərardan sonra elan saytlarında Prius modellərinin satışı ilə bağlı elanların sayı kəskin artıb. Əgər dünən elan saytlarında satışda 443 Prius modeli var idisə, bu saata olan məlumata görə, avtomobillərin sayı 1200-dür.Satışa çıxarılan bu modelin avtomobillərinin 95 faizi 2008-ci ildən əvvəl istehsal olunmuş avtomobillərdir.
Ümumilikdə Prius taksilərinin 60 faizi 15 ildən artıqdır. Bu, təxminən 30 min avtomobil deməkdir. Dünənə qədər 12 500 manata [təxminən 7 350 dollar] satılan Prius-u hazırda 10 000 manata [təxminən 5 880 dollara] almaq olar. Qiymətlərin daha da aşağı salınması gözlənilir”, – ekspert qeyd edib.
Digər nəqliyyat eksperti Eldəniz Cəfər deyir ki, 15 ildən artıq olan Priusların qiymətləri azala bilər, lakin kəskin ucuzlaşmayacaq.
“Bu avtomobillərin qiymətlərinin kəskin ucuzlaşacağını düşünmürəm. Vaxtilə bu modeldə olan avtomobillər ölkəmizə külli miqdarda gətirilirdi. Onların arasında həm yaxşı, həm də pis maşınlar var idi. Taksilərin sayı kəskin azalarsa, şəxsi nəqliyyatdan istifadə artacaq. Bundan başqa, ictimai nəqliyyat seqmenti – avtobuslar, metrolar gücləndirilməsə, paytaxtımız motorlaşmaya meyilli olacaq. Beləliklə, avtomobillərə tələbat yenidən artacaq. Onu da nəzərə almaq lazımdır ki, hər adam yeni avtomobil ala bilmir”, – deyə ekspert bildirib.
Azərbaycanda taksilərlə bağlı dəyişikliklər 2023-cü ildən tətbiq olunacaq. Cəfərin sözlərinə görə, bu il yanvarın 1-dən taksilərlə bağlı tələblər açıqlanmalı idi.
“Dövlət sosialyönümlü siyasətini davam etdirərək taksi fəaliyyəti ilə məşğul olanlara müəyyən qədər möhlət verib. Hesab edirəm ki, bu, düzgün addımdır. Taksilərdə peşəkar insanlar işləməlidir”, – deyə ekspert əlavə edib.
