Hakim partiya baş nazir vəzifəsinə namizədini açıqlayıb

“Gürcü arzusu” iqtidar partiyası bugünkü partiya iclasında baş nazir postuna Mamuka Baxtadzenin namizədliyini irəli sürüb. Təqdim olunduğu zaman Baxtadze bildirib ki, o, üç prinsipi rəhbər tutur:

“Birincisi, gürcü xalqının tarixi seçimini sona çatdırmaq və Gürcüstanın Avroatlantik məkana tam inteqrasiyasını təmin etməkdir. Bu istiqamətdə “Gürcü arzusunun” böyük uğurları var, onları möhkəmləndirmək və təsdiqləmək lazımdır. İkincisi, bütün istiqamətlər üzrə innovativ və fundamental islahatların həyata keçirilməsidir. Bu islahatlar sayəsində biz yeni ədalətli oyun qaydaları ilə yeni iqtisadi modeli yarada biləcəyik, hansı ki, hər bir ailəyə, hər bir vətəndaşımıza rifah gətirəcək. Biz yüksək demokratiya standartları ilə iqtisadiyyatın durumu arasındakı böyük fərqi azalda biləcəyik. Üçüncü prinsip kiçik hökumət konsepsiyasıdır. Gürcüstana kiçik hökumət, amma bununla yanaşı mobil və effektiv hökumət qurumları lazımdır. Eyni zamanda bu qurumlar üzərində anti-korrupsiya komponenti üzrə institusional və ictimai nəzarətin gücləndirilməsini məqsədəuyğun hesab edirəm”.

İyunun 13-də Giorgi Kvirikaşvili partiya sədri Bidzina İvanişvili ilə fikir ayrığı üzündən baş nazir vəzifəsini tərk edəndən sonra “Gürcü arzusu” bu vəzifəyə yeni namizədin irəli sürülməsi proseduruna başlayıb. Baxtadze 2017-ci ildən bəri maliyyə naziri işləyir, buna qədər isə “Gürcüstan Dəmiryolları”nın direktoru olub. Baxtadze  maliyyə naziri kürsüsünü tutduğu müddətdə Gürcüstanın bank sektorunu tənqid edib. O, banklara əlavə nizamlamaların tətbiqi məsələsinə də toxunub.

Mamuka Baxtadze kimdir?

Baş nazir vəzifəsinə namizəd haqda əhalinin yarısı heç nə bilmir. Milli Demokratiya İnstitutunun (NDI) son tədqiqatına əsasən, sorğu edilənlərin yalnız 43 faizi Mamuka Baxtadzenin kim olduğunu bilib, 55 faizi isə onun adını belə eşitməyib.

Baş nazir vəzifəsinə namizəd texniki elmlər doktorudur. Tbilisi Dövlət Universitetini və Gürcüstan Texniki Universitetini bitirib. Baxtadze Lomonosov adına Moskva Dövlət Universitetinin magistr dərəcəsinə sahibdir. 2010-cu ildə INSEAD biznes-məktəbində MBA kvalifikasiyası alıb.

Gürcüstan KİV-nin məlumatına görə, 2012-ci ildə Mamuka Baxtadze Beynəlxalq Energetika Korporasiyasının baş direktoru vəzifəsini tutaraq “Vahid Milli Hərəkatın” seçki kampaniyasına 20 min lari bağışlayıb. KİV həmçinin Baxtadzenin “Gürcü arzusu” iqtidar partiyasının liderinin oğlu Uta İvanişvilinin yaxın dostu olduğunu da yazıb. Amma o özü bu xəbərləri təkzib edib və bildirib ki, Bidzina İvanişvilinin oğullarının heç biri ilə tanış deyil.