Ələsgər Məmmədlinin saxlanılmasını əks etdirən görüntüləri yayan həkim işini itirib
Həkim Aydın Əliyev işdən qovulub
Toplum TV müstəqil onlayn televiziyasının həmtəsisçisi Ələsgər Məmədlinin yaxınlığında saxlanıldığı İstanbul klinikasının həkimi işini itirib. Aydın Əliyevin sözlərinə görə, o, videomüşahidə kamerasına əks olunan tanınmış media ekspertinin saxlanması görüntülərini yaydığı üçün işdən çıxarılıb. Klinika sahibi isə onun öz istəyi ilə işdən getdiyini iddia edir.
- “Toy və yas mərasimlərinə birgə gedirik”. Gürcüstanda ermənilərlə azərbaycanlıların yan-yana yaşadığı kənddən hekayələr
- “Zəngəzur dəhlizi və səkkiz kəndin müqabilində Bakı Yerevana nə təklif edə bilər?” Şərhlər
- CPJ Azərbaycan hakimiyyətini jurnalistləri azad etməyə çağırıb
Martın 12-də Toplum TV-nin həmtəsisçisi Ələsgər Məmmədlinin qohumu olan tanınmış radioloq-həkim Aydın Əliyev öz Facebook səhifəsində işindən qovulduğunu yazıb.
“Əziz dostlar! Təhdiddənmi, qorxudanmı? Bilmirəm. “İstanbul” klinikasının rəhbərliyi məni bu gün işdən çıxardı. Sabahdan işə gəlmə, dedilər. Hanı bəs hüquqi dövlət? İnsanı işdən çıxarmaq bu qədər asanmı? Hanı həmkarlar? Hanı bəs işçi haqları? Hanı bəs əmək müqaviləsi?”
Onun sözlərinə görə, işdən çıxarılmasına səbəb Ələsgər Məmmədlinin saxlanması ilə bağlı görüntüləri yayması olub.
Ələsgər Məmmədli martın 8-də Bakıda xərçəng şübhəsi ilə müayinə üçün gəldiyi “İstanbul” klinikasının qarşısında saxlanılıb. Daha sonra onun mənzilində axtarış aparılıb, nəticədə hüquq-mühafizə orqanları oradan 7200 avro tapdıqlarını açıqlayıblar. Məhkəmənin qərarı ilə media eksperti bir qrup şəxslə əlbir olaraq qaçaqmalçılıq törətməkdə ittiham olunaraq haqqında ilkin istintaq müddətinə 4 ay həbs qətimkan tədbiri seçilib.
Martın 6-dan etibarən Toplum TV işi ilə bağlı 8 nəfər həbs edilib, daha iki nəfər polis nəzarəti altında sərbəst buraxılıb. Onların hamısı qaçaqmalçılıqda ittiham olunur. Bu ittihamla onları 5 ildən 8 ilə qədər azadlıqdan məhrumetmə cəzası gözləyir.
Aydın Əliyev bu videonu yaydıqdan sonra hökumətə yaxın mediada həm Aydın Əliyevi, həm də klinika rəhbərliyini hədəf alan yazılar dərc olunub.
Aydın Əliyevin sözlərinə görə, bu müddətdə klinika rəhbərliyi dəfələrlə ona bildirib ki, sən Ələsgər Məmmədli ilə bağlı paylaşım etməklə problem yaradırsan:
“Dedim qohumumdur. Qohumunu müdafiə etməyən insan sabah dövlətini də satacaq, xalqını da. Martın 12-də yenə danışdıq, dedi ki, birlikdə işləyə bilmərik, yollarımızı ayırmalıyıq, sabahdan işə gəlmə. Mən eşitməmişəm ki, normal bir dövlətdə işçiyə deyilsin ki, sabahdan işə gəlmə. İndiki bir vaxtda işsizlik çox çətin olacaq, artıq yeni iş axtarmağa başlamışam”.
“İstanbul” Klinikasının sahibi Əziz Quliyev isə “Abzas Media”ya bildirib ki, həkim Aydın Əliyev işdən çıxarılmayıb. Onun sözlərinə görə, Aydın Əliyev işlərilə əlaqədar özü işdən çıxamq istədiyini bildirib.
“Aydın həkim yaşı həkimdir. Onun haqda pis fikirdə deyiləm. İşdən çıxarılmayıb, o özü çıkmağa qərar verib. Hal-hazırda onun həyal yoldaşı Gülşən xanım klinikada öz işini davam etdirir. Aydın həkimə heç kim heç nə deməyib. Özünün də sözü olanda gəlib rəhbərliyə deyirdi. Nəsə sözü olmuş olsa, gəlib deyərdi. O, özü işdən çıxıb”, – Əziz Quliyev məlumatı təkzib edib.
Aydın Əliyev işdən çıxmaqla bağlı ərizə yazmadığını bildirib.
Hüquq müdafiəçisi Mirvari Qəhrəmanlı deyir ki, ölkədə əmək münasibətləri Əmək Məcəlləsilə tənzimlənir və heç kim yaxın qohumunun siyasi fəaliyyətinə görə işdən çıxarıla bilməz:
“Bu, diskrimnasiya adlanır. Müəyyən bir səbəbdən işçinin izlənməsi sayılır. İşçiləri ən çox 70-ci maddənin C bəndi ilə işdən çıkarırlar. Yəni, vəzifə səlahiyyətlərinin öhdəsindən gəlmir. Digər maddələr də var. Mən çox narahatam ki, ona şifahi işə gəlmə deyib, sonradan işdə buraxdığı saatlara görə işdən çıxarmış olarlar. Həkim mütləq məhkəməyə, Ombudsmana və Əmək Müfəttişliyinə müraciət etməlidir” – Mirvari Qəhrəmanlı bildirib.
