“Həyatımızı riskə atırıq” – Bakıda velosiped sürmək nə dərəcədə təhlükəsizdir?

Bakıda velosiped yollarının çəkiləcəyi deyilir. 2040-cı ildə bu yolların uzunluğu 250 kilometrdən çox olmalıdır. Ekspertin fikrincə, 20 ildən sonra nə olacağını indidən demək olmaz. Velosipedçilər isə iddia edirlər ki, hazırda Bakıda bu nəqliyyat vasitəsi çox təhlükəlidir.

• Azərbaycanda velosipedçiləri cərimələməyə başlayıblar, amma onlar üçün infrastruktur yoxdur
• Azərbaycanda “Tiktok” həvəskarları: onlar nəyə nail olmaq istəyir?
• Azərbaycanda döymə: valideynlərdən gizlədilən incəsənət

Bakı Nəqliyyat Agentliyinin rəsmi nümayəndəsi Vüsal Kərimlinin sözlərinə görə, hazırda bulvar ərazisində 7,5 kilometr uzunluğunda velosiped yolu çəkilib.

“Ümumilikdə, Bakı şəhərinin baş planına əsasən, velosiped yol şəbəkəsinin uzunluğunun 2027-ci ilə qədər 63,5 kilometr, 2040-cı ildə isə 251,2 kilometrə çatdırılması planlaşdırılır”, – deyə, V.Kərimli yerli mətbuata açıqlama verib.

Bəs velosipedçilər özləri və ekspertlər bununla bağlı nə düşünürlər?

Velosiped Bakıda həyat üçün təhlükəlidir

Velosipedlə hər gün kilometrlərlə yol qət edən Bakı sakini, bloqer Rəşad Abdullayev JAMnews-a müsahibəsində deyib ki, hazırda Azərbaycan paytaxtının küçələrində velosipedlə hərəkət etmək həyat üçün təhlükəlidir:

“Tez-tez velosipedlə Bakıda uzun yol qət edirəm. Əhmədlidən Dövlət Bayrağı meydanına qədər və geriyə təxminən 40-45 kilometr yoldur. Bu yolda velosipedçilər üçün heç bir şərait yoxdur”.

Onun sözlərinə görə, yolun bəzi hissələri həyat üçün təhlükəlidir.

“Bəzi yerlərdə, misal üçün, Ukrayna dairəsindən bir qədər aşağıda döngə olduqca təhlükəlidir. Nəqliyyatın hərəkəti çoxdur, minik avtomobilləri və avtobuslar var, burada xüsusilə ehtiyatlı olmaq lazımdır”, – R.Abdullayev bildirir.

Bloqerin fikrincə, velosipedçilərin qarşılaşdığı böyük problemlərdən biri avtobus dayanacaqlarıdır:

“Təsəvvür edin, siz yolun kənarı ilə velosipedlə gedirsiniz və qarşıda avtobus dayanacağı var. Əgər orada avtobus dayanıbsa, siz ya gözləməli, ya da yolun ikinci – minik avtomobillərinin sürətlə şütüdüyü hissəsinə çıxmalısınız. Nəzərə alsaq ki, bəzi dayanacaqlarda avtobusların olmadığı vaxt, demək olar ki, olmur, bu, xeyli risklidir. Mübaliğəli səslənsə də, həyatınızı riskə atırsınız”.

Karantin və velosiped

Həmsöhbətimiz qeyd edir ki, karantin dövründə velosiped yürüşlərinin sayını xeyli azaltmalı olub.

“Maska qadağası gələndən, ümumiyyətlə, sürmürəm. Çünki velosiped idmanı intensiv tənəffüs tələb edir. Maska ilə bunu təmin etmək qeyri-mümkün olduğundan, hələlik həmin qadağanın ləğvini gözləyirəm”.

Rəşad Abdullayev onu da əlavə edib ki, indiyə kimi bir dəfə də olsa, yol polisi ilə bağlı hər hansı problemlə üzləşməyib.

Ekspert: “20 ildən sonra nə olacağı məlum deyil”

Yol hərəkəti üzrə ekspert Ərşad Hüseynov JAMnews-un əməkdaşı ilə söhbətində bildirib ki, Bakı Nəqliyyat Agentliyinin 2040-cı ilə aid sözlərinə ciddi əhəmiyyət vermək olmaz:

“İyirmi ildən sonra nə olacağını indidən demək o qədər də ciddi deyil. Velosipedçilər üçün infrastrukturu indidən qurmaq lazımdır”.

Onun sözlərinə görə, Azərbaycan bu mənada özünü inkişaf etmiş Avropa, yaxud Uzaq Şərq ölkələri ilə deyil, qonşuları ilə müqayisə etməlidir:

“Uzağa getmək lazım deyil. Qonşu Rusiyada xeyli insan üçün velosiped sadəcə idman aləti deyil, həm də nəqliyyat vasitəsidir. Azərbaycanda bu, hələlik mümkün deyil”.

Dörd əsas səbəb

Ə.Hüseynovun fikrincə, ilk növbədə dörd əsas məsələ həll olunmalıdır ki, ölkədə velosiped tam hüquqlu nəqliyyat vasitəsinə çevrilsin.

“İlk növbədə müvafiq infrastruktur yaradılmalıdır. Bunlara velosipedlər üçün ayrılmış yollar, texniki servis mərkəzləri, xüsusi park yerləri aiddir. Misal üçün, siz işə velosipedlə getsəniz, onu harasa qoymalısınız. Hazırda belə şərait yox dərəcəsindədir.

İkincisi, əhali arasında velosipedin təkcə idman aləti və oyuncaq deyil, həm də nəqliyyat vasitəsi olması barədə təşviqat işləri aparılmalıdır. Bu, həm ekoloji cəhətdən ən təmiz nəqliyyatdır, həm də insanların sağlamlığı üçün faydalıdır.

Üçüncüsü, digər yol hərəkəti iştirakçıları velosipedçiləri bərabərhüquqlu hərəkət iştirakçısı kimi qəbul etməli və buna öyrəşməlidir. İndiki halda velosipedçiləri kütləvi şəkildə küçəyə buraxsaq, yol-nəqliyyat hadisələrinin sayı dəfələrlə artar.

Dördüncüsü, velosipedçilərin özlərinə aid tənzimləmələr olmalıdır. Onlar özləri və nəqliyyat vasitələri müvafiq qeydiyyatdan keçməli, velosipedçilərin geyimi, təhlükəsizliyi və yol hərəkəti qaydalarına riayət etməsi təmin olunmalıdır”, – ekspert sözlərini yekunlaşdırıb.