Həbs edilən keçmiş siyasi mühacirlərin yaxınlarının Almaniya səfirliyi qarşısında etirazı
Almaniya səfirliyi qarşısında etiraz
Almaniya hökuməti qaçqın statusu almağa nail ola bilməmiş Azərbaycan vətəndaşlarından ibarət növbəti qrupu Bakıya deportasiya etməyə hazırlaşır. Bu gün isə vətənə deportasiya edildikdən sonra həbs olunan keçmiş siyasi mühacirlərin doğmaları və yaxınları Bakıdakı Almaniya səfirliyi qarşısında etiraz aksiyası keçiriblər. Onlar rəsmi Berlindən hakimiyyətin opponentlərinin Azərbaycana “qanunsuz təhvil verilməsini dayandırmağı” tələb ediblər.
- AXCP-ni maliyyələşdirməyə vasitəçilikdə günahlandırılan siyasi məhbus azadlıqda
- Azərbaycan DİN Britaniya səfirliyini “səhvini etiraf etməyə” çağırıb
- HRW Azərbaycan hakimiyyətindən azad sözə qarşı zorakılığı dayandırmağı tələb edib
Düsseldorf aeroportunun yaxınlığında bir neçə Azərbaycan vətəndaşı tezliklə Bakıya deportasiya olunmaq üçün xüsusi yataqxanaya yerləşdirilib – yerli mənbələrdən məlumat verilib. Qeyd olunur ki, onlar 2016-2019-cu illərdə qaçqın statusu almaq ümidi ilə Almaniyaya gedən, amma rədd cavabı alan azərbaycanlılardır. Onların iyunun əvvəlində Bakıya göndərilməsi nəzərdə tutulub.
İyunun əvvəlində Almaniyadan azərbaycanlıların növbəti deportasiyası gözlənilir.
— CAM Xəbər (@CAMXbr) May 31, 2022
Bu şəxslər artıq Düsseldorf hava limanının yaxınlığında xüsusi yataqxanaya yerləşdiriliblər.
Bildirilir ki, onlar 2016-2019-cu illərdə Almaniyaya gəlib, qaçqın statusu ala bilməyənlərdir.
Bu arada mayın 31-də vətənə deportasiya ediləndən sonra həbs olunan keçmiş siyasi mühacirlərin doğmaları və yaxınları Bakıdakı Almaniya səfirliyi qarşısında etiraz aksiyası keçiriblər.
Səfirlik qarşısında etiraz aksiyası
Etirazçıların sözlərinə görə, Almaniyadan deportasiya edilən azərbaycanlılar siyasi motivlərlə həbs ediliblər.
“Almaniyada yaşayan siyasi mühacirlər İlham Əliyev rejimindən ora pənah aparmışdılar. Almaniya hökuməti isə qeyri-qanuni olaraq onları Azərbaycana satdı və ölkəyə gələn kimi hamısı həbs edildi”, – etirazçılardan biri “Toplum TV”-ə açıqlamasında deyib.
Etiraz edənlər bir müddət əvvəl həbs olunan Samir Aşurov, Pünhan Kərimli, Ziya İbrahimli, Cəfər Mirzəyev və digərlərinin yaxınlarıdır.
![](https://jam-news.net/app/uploads/2022/05/1653983280212.png)
Pünhan Kərimlinin atası Vahid Kərimli jurnalistlərə oğlunun işi üzrə aparılan məhkəmə prosesində yol verilmiş qanunsuzluqlar haqda danışıb:
“Məhkəmə açıq keçirilsə də, ailə üzvləri, hüquq müdafiəçiləri, media nümayəndələri ora buraxılmır. Məhkəmənin vaxtını, saatını gizlədirlər.
Almaniya səfirliyinə müraciət olunub ki, səfirliyin nümayəndələrindən biri məhkəməni izləsin, monitorinq aparsın. Amma heç kim gəlməyib. Ədalətli məhkəmə tələb edirik, onlar şərlənib”.
Etirazçılar qeyd ediblər ki, bu, onların Almaniya səfirliyinə artıq üçüncü müraciətidir.
Aksiya qısa sürüb. Polis kobud şəkildə müdaxilə edib, hamının əlindən plakatları alıb, iştirakçıları dağıdıb.
Almaniya Azərbaycan vətəndaşlarını niyə Azərbaycana qaytarır?
2014-cü ildə Azərbaycanla Avropa İttifaqı arasında qanunsuz yaşayan şəxslərin readmissyası (qaytarılması) haqqında saziş imzalanıb.
Bu sazişə əsasən, sənəddə göstərilmiş ölkələrə daxil olmaq, qalmaq və yaşamaq tələblərinə uyğun gəlməyən şəxslər readmissiyaya məruz qalır. Saziş bu şəxslərin identifikasiyası və təhlükəsiz şəkildə vətənə qaytarılmasını nəzərdə tutur.
Azərbaycanın Miqrasiya Xidmətinin məlumatına görə, ancaq 2021-ci ildə Azərbaycana 420 nəfər qaytarılıb. Onlardan 39 nəfəri Almaniyadan deportasiya olunanlardır. Bu arada həmin 2021-ci ildə readmissiya üçün 440 sorğu göndərilib.
2021-ci ildə Aİ ölkələrindən deportasiya olunanların sayı 2020-ci illə müqayisədə 2,9 faiz çox olub.
Readmissiya sazişi qüvvəyə minəndən Avropa İttifaqı ölkələrindən Azərbaycana 2013 nəfər deportasiya olunub. 4160 nəfərin readmissiyası ilə bağlı sorğuya müsbət cavab alınıb. Daha 2147 nəfərin deportasiyası nəzərdə tutulur.
Son zamanlarda altı nəfər həbs edilib
Mayın 20-də vətənə qayıdar-qayıtmaz, elə aeroportdaca saxlanılan Ziya İbrahimli son zamanlar Almaniyadan deportasiya olunan və Azərbaycanda həbs edilən altıncı siyasi mühacirdir.
Bu il martın 29-da Almaniyadan Azərbaycana deportasiya edilən Samir Aşurov heç bir ay keçməmiş aprel ayında həbs edilib. O, bıçaqla yaralamada ittiham olunur.
Vəkili Zibeydə Sadıqovanın “Meydan TV”-yə verdiyi məlumata görə, müvəkkili bu ittihamı qəbul etməyib. Özünü təqsirli bilmədiyini vurğulayan Aşurov deyib ki, ümumiyyətlə, üstündə bıçaq olmayıb. Cinayət predmeti olduğu iddia edilən bıçağı zorla onun cibinə qoyublar. Siyasi sifarişlə həbs olunduğunu bildirən Samir Aşurov əlavə edib ki, qanunsuz həbsinə etiraz olaraq, aclıq aksiyasına başlayıb.
Ötən ilin iyun-noyabr ayları arasında Almaniyadan deportasiya olunan dörd siyasi mühacir narkotik alverində ittiham olunaraq həbs edilib.
Bunlar Mütəllim Orucov, Malik Rzayev, Cəfər Mirzəyev və Pünhan Kərimlidir.
AXCP fəalı Mütəllim Orucov və Malik Rzayevin vəkili Nemət Kərimli “BBC News Azərbaycanca”ya bildirib ki, müdafiə etdiyi şəxslər deportasiya olunub Azərbaycana gətiriləndən sonra karantin qaydalarına görə Olimpiya İdman şəhərciyində saxlanılıblar və həmin müddətdə onlar özlərini təqdim etməyən və ya miqrasiya idarəsindən gəldiyini deyən şəxslər tərəfindən dindiriliblər.
“Onlara Almaniyada görüşdükləri, siyasi mühacir olan adamların şəkillərini göstəriblər, onlarla bağlı suallar veriblər. Siyasi tədbirlərdə iştirak edib-etmədikləri barədə sorğu-sual olunublar”, – Kərimli deyib.
Vəkilin sözlərinə görə, istintaq zamanı işgəncə ilə müvəkkillərindən narkotiklə bağlı etirafedici ifadə almağa çalışıblar.