Gürcüstanın baş prokuroru səs-küylü işlə bağlı məhkəmə qərarından sonra başlayan etiraz aksiyaları nəticəsində istefa verib

Gürcüstanın baş prokuroru İrakli Şotadze ötən il dekabrın 1-də öldürülən iki məktəblinin işi ilə bağlı bu gün çıxarılan qərarın doğurduğu etirazlar nəticəsində istefaya gedib. Şotadzenin istefası haqda məlumat Baş Prokurorluğun saytında dərc olunub.

Öz bəyanatında Şotadze öldürülən yeniyetmələrin ailələrinə bir daha başsağlığı verib və qeyd edib ki, “canilərin cəza çəkməsi üçün əlindən gələni edib”.

Şotadzenin istefası tələbi ilə panlaşdırılmamış etiraz aksiyası Baş Prokurorluq binası qarşısında Tbilisinin mərkəzində öldürülən iki 16 yaşlı yeniyetmənin işi üzrə Tbilisi şəhər məhkəməsində hökm oxunandan dərhal sonra başlayıb. Məhkəmə bu iş üzrə ittiham olunan iki yeniyetməyə qismən bəraət verib.

Müttəhimlərdən biri Dadunaşvilinin qətlində təqsirli bilinib, amma Saralidzenin öldürülməsi ilə bağlı bəraət alıb. Saralidzenin qətlində günahlandırılan ikinci müttəhimə gəlincə, ona qarşı ittiham qəsdən adam öldürmədən qəsdən adam öldürməyə cəhdə tövsif olunub.

Bununla da hakim ittiham olunanlardan heç birinin Saralidzeni öldürmədiyi qənaətinə gəlib və deməli, əsl qatil hələ də tapılmayıb.

•  Məktəblərdə zorakılıq. Çıxış yolu varmı?

Məhkəmənin qərarı böyük səs-küy doğurub. Qətlə yetirilənlərdən birinin atası Zaza Saralidze Gürcüstan əhalisinə müraciət edərək onu dəstəkləməyə, küçələrə çıxıb baş prokuror İrakli Şotadzenin istefasını tələb erməyə çağırıb.

Saralidzenin əsas iradı məhkəməyə yox, prokurorluğadır. Əvvəllər Saralidze dəfələrlə bəyan edib ki, polis bütün günahkarları tutmayıb. Saralidze keçən bir neçə ay ərzində prokurorluğu obyektiv araşdırmanın aparılmasına mane olmaqda və qətldə iştirak edən həmin qurumun keçmiş əməkdaşının oğlunun günahını ört-basdır etməkdə ittiham edib.

“Mənim sözlərimi oğlumun qətlində ittiham olunanlara bəraət verən məhkəmə də təsdiqlədi. Məhkəmə bu qərarı ilə prokurorluğa bildirdi ki, əsl qatillər azadlıqdadır”, – Saralidze məhkəmədən sonra jurnalistlərə bildirib.

Etirazlara müxalif siyasətçilər və ictimaiyyət nümayəndələri də qoşulub. Onlar prokurorluğu istintaqın qeyri-peşəkar aparılmasında və ya əsl cinayətkarları gizlətməkdə günahlandırıblar.

İrakli Şotadze 2015-ci ildən baş prokuror vəzifəsində idi.