Gürcüstanın baş naziri: “İşğal olunmuş ərazilərdə baş verənlər humanitar fəlakətdir”
“Gürcüstanın işğal olunmuş ərazilərində baş verənlər humanitar fəlakətdir”, – Gürcüstanın baş naziri Mamuka Baxtadze Makkeyn İnstitutunun təşkil etdiyi “Dünya 2018-ci ildə: ayaqdan başa?” beynəlxalq konfransında bildirib.
Onun sözlərinə görə, münaqişənin sülh yolu ilə nizamlanması üçün Gürcüstanda güclü Avropa demokratiyası və güclü iqtisadiyyat qurulmalıdır.
“İşğal bu gün bizim qarşı-qarşıya qaldığımız ən böyük və ən ağrılı məsələdir. Gürcüstan ərazisinin 20 faizi Rusiya tərəfindən işğal olunub və bu ərazilərdə baş verənlər humanitar fəlakətdir.
Xatırlatmaq istəyirəm ki, müharibəyə qədər Sxinvali regionunun əhalisi 120 min nəfər təşkil edirdi. İndi cəmi 20 min nəfərdir, onlardan da yeddi min nəfəri Rusiya qoşunudur.
Həmçinin Abxaziyada müharibədən əvvəl 550 min nəfər əhali vardı, bu gün 120 min nəfərdən artıq deyil. Odur ki, bütün bunlar çox ağrılı məsələlərdir. Biz müəyyən vasitə ilə bu humanitar fəlakətə reaksiya verməyə çalışırıq”, – Baxtadze bildirib.
Onun sözlərinə görə, Gürcüstan hökumətinin bununla bağlı çox vacib “Daha yaxşı gələcəyə doğru bir addım” təşəbbüsü mövcuddur.
“Bu təşəbbüsün əsas ideyası işğal olunmuş ərazilərdə yaşayan insanlar üçün səhiyyə və təhsilin daha əlçatımlı olmasıdır. Hərçənd əlbəttə ki, Rusiya bütün bunlara qarşıdır”, – Interpressnews agentliyi Mamuka Baxtadzedən sitat gətirib.
Baş nazirin sözlərinə görə, buna ən yaxşı cavab Gürcüstanda güclü Avropa demokratiyasının bərqərar olmasıdır.
“Bizim illüziyalarımız yoxdur. Bu yol həqiqətən də maneələrlə doludur, amma biz bu mövqedə möhkəm dayanmışıq. Bu münaqişəni sülh yolu ilə həll etmək üçün bizə güclü Avropa demokratiyası və güclü iqtisadi mühit lazımdır ki, hər kəsin öz potensialını reallaşdırmaq şansı olsun. Bu, münaqişənin sülh yolu ilə həllinin əsas iki ön şərtidir”, – Mamuka Baxtadze bildirib.
Financial Times nəşrinin redaktorunun Gürcüstanda Rusiya təbliğatı məsələsinin nə dərəcədə kəskin durduğu ilə bağlı sualına cavab olaraq Baxtadze bildirib ki, Gürcüstanda bu mövzu aktualdır.
Baxtadzenin sözlərinə görə, Rusiya Gürcüstanda ictimai fikrə təsir etməyə və Gürcüstanın NATO və Avropa İttifaqına inteqrasiyasına gürcü xalqının müsbət münasibətini dəyişməyə çalışır.
“Biz yoxsulluğu azaltmalıyıq və bu Rusiyanın yaratdığı maneələrə ən yaxşı cavab olacaq. Təəssüf ki, yoxsulluq çox vaxt millətçilik və ksenofobiyanın inkişafı üçün münbit mühit yaradır. Rusiya təbliğatı bu zəifliklərdən istifadə etməyə çalışır”.
Amma Moskva uğur əldə edə bilməyib, Gürcüstanın baş naziri deyir.
“Rusiya təbliğatı heç vaxt Gürcüstanda uğur qazanmayacaq. Əgər son seçkilərin nəticələrinə baxsaq, Rusiya yönlü partiyalar beş faizdən artıq səs toplaya bilmir. Gürcüstanda çoxluq NATO və Avropa İttifaqına daxil olmağı dəstəkləyir”, – Mamuka Baxtadze bildirib.
• “Dünya 2018-ci ildə: ayaqdan başa?” beynəlxalq konfransının əsas mövzusu Rusiya və onun təbliğatının yayılması məsələsi olub. Makkeyn İnstitutu tərəfindən təşkil olunan konfrans Gürcüstanda artıq dördüncü dəfədir ki, həyata keçirilir.
Təşkilatçıların məlumatına görə, hər il sentyabrda konfrans təhlükəsizlik üzrə regional ekspertləri, gürcüstanlı siyasətçiləri, vətəndaş cəmiyyəti fəallarını və biznes nümayəndələrini toplayır. Konfransın məqsədi Gürcüstanın Avroatlantik səylərinin dəstəklənməsindən ibarətdir.
