Gürcüstan parlamenti “xarici agentlər haqqında” qanunu üçüncü, yekun oxunuşda qəbul edib
Gürcüstanda xarici agentlər haqqında qanun
84 lehinə, 30 əleyhinə – kütləvi etirazlar, Qərbin sərt tənqidi, mübahisələr və həbslər fonunda Gürcüstan parlamenti mayın 14-də xalq arasında “Rusiya qanunu” kimi tanınan “Xarici təsir haqqında” qanunu üçüncü, yekun oxunuşda qəbul edib.
Parlamentdəki dinləmələr cəmi bir neçə saniyə çəkib. Parlament sədri kiminsə “Rusiya qanunu”na redaktor rəyinin olub-olmadığını soruşub, sonra isə məsələni səsverməyə qoyub.
- Ələsgər Məmmədli və Ruslan İzzətlinin yaxınları onların səhhətlərindən narahatdırlar
- “Yerevan küçələrində kritik kütlə yoxdur, baş nazirin istefası olmayacaq”. Şərh
- Azərbaycanın Şərqi Avropa strategiyası. Bakıdan baxış
Müxalifət deputatları zalda “Rusiya qanununa yox” deyə qışqırıblar. Onlardan bəziləri Avropa İttifaqının bayraqlarını açıblar.
Çöldə, səhər saatlarından etiraz edən vətəndaşlar da toplaşdıqları parlament binasının qarşısında “Rusiya qanununa yox”, “Qullar” deyə qışqırıblar.
Qanun layihəsinin üçüncü oxunuşu avropalı siyasətçilərin, ABŞ dövlət katibinin Avropa və Avrasiya məsələləri üzrə köməkçisi və ABŞ-ın sanksiyalar siyasəti üzrə koordinatoru Ceyms O’Brayenin Gürcüstana səfəri fonunda baş tutub.
Qanuna əsasən, illik gəlirlərinin 20 faizindən çoxunu xaricdən alan qeyri-hökumət təşkilatları və KİV-lər ildə bir dəfə xarici qüvvələrin maraqlarını təşviq edən təşkilatların reyestrində qeydiyyatdan keçməli və bəyannamə doldurmalıdırlar.
Qeydiyyatdan yayınmağa çalışanlar cərimələnəcək.
Müxalifət və vətəndaş sektoru hesab edir ki, bu qanun ölkədə tənqidi fikirləri sıxışdırmaq və hakimiyyətin yolunu açmaq məqsədi daşıyır ki, onu daha tənqid edənlər olmasın.
Səsvermədən əvvəl parlamentdə deputatlar siyasi bəyanatlar səsləndiriblər. İşlər bir neçə dəfə əlbəyaxa davaya gedib çıxıb.
Eyni zamanda səhər saatlarında yenidən parlament binası yaxınlığında kütləvi aksiya keçirilib. Eyni saatlarda bu ərazidə çoxlu sayda polis və xüsusi təyinatlılar səfərbər edilib.
Onlayn media parlamentin iclasında iştirak edə bilməyib. Xüsusilə bu dinləmələr üçün parlamentdə sarı təhlükəsizlik səviyyəsi elan edilib ki, media nümayəndələri iclas zalına girə bilməsin.
Prosessual olaraq qanun indi imzalanması üçün Gürcüstan prezidentinə göndərilməlidir. Prezident artıq qanuna veto qoyacağını bəyan edib.
Bununla belə, hakim “Gürcü arzusu” partiyasının vetonun öhdəsindən gəlmək üçün kifayət qədər səsi var.
Hakim “Gürcü arzusu” partiyası ilk dəfə bir il əvvəl, 2023-cü ilin martında “xarici agentlər haqqında” qanun layihəsinin təşəbbüskarı olub. Parlament qanunu birinci oxunuşda qəbul etsə də, vətəndaşların kütləvi etirazları və Qərbin kəskin tənqidi nəticəsində hökumət qanun layihəsini geri götürməli olub.
2024-cü il aprelin 3-də hakim partiya qanun layihəsini parlamentə qaytarmaq qərarına gəlib. Məzmun eyni qalsa da,n bu dəfə layihə “Xarici təsir şəffaflığı aktı” adlandırılıb.
Bu il qanun layihəsinin parlamentə təqdimatı daha böyük etirazlarla müşayiət olunub. Yüz minlərlə insan etiraz əlaməti olaraq küçələrə çıxıb.
Gürcüstanın Qərb tərəfdaşları qanun layihəsini kəskin tənqid edir və hakimiyyətə açıq şəkildə xəbərdarlıq edirlər ki, bu qanunun qəbulu Gürcüstanın Avropaya inteqrasiyası üçün ciddi problemlər yaradacaq.
Bununla belə, parlament “Rusiya qanunu”nu aprelin 17-də birinci oxunuşda, mayın 1-də ikinci oxunuşda və bu gün, mayın 14-də üçüncü oxunuşda qəbul edib.
