Gürcüstanda siyasi partiya qərargahına hücum nəticəsində 5 nəfər yaralanıb

Oktyabrın 19-da yerli özünüidarə orqanlarına keçiriləcək seçkilərə iki gün qalmış Marneuli bələdiyyəsinin Kizilaclo kəndində naməlum şəxslər “Gürcü arzusu” partiyasının qərargahına hücum edərək atəş açıb. Beş nəfər yaralanıb, onlardan ikisinin vəziyyəti ağırdır. Onlar “Ceo-hospital”ın Marneuli şöbəsinin reanimasiya bölümündə süni tənəffüs aparatına qoşulublar.

“Gürcü arzusu” qərargahının qarşısında nə baş verib, sualına Daxili İşlər Nazirliyi cavab verməlidir.

Yaralananların yaxınları jurnalistlərlə ünsiyyətdən qaçır. Qısa şərhlərdə onlar hücum edənlərin kimliyi və hücumun motivi haqda heç bir ehtimalları olmadığını vurğulayırlar. Daxili İşlər Nazirliyi faktla bağlı Cinayət Məcəlləsinin 117-ci maddəsi ilə (ağır xəsarətlər yetirmək) cinayət işi qaldırıb. Bununla belə hələlik baş verənləri heç cür şərh etmir.

Ötən gün Gürcüstanın daxili işlər naziri Giorgi Mqebrişvili və parlamentin deputatı Arçil Talakvadze hadisə yerində olublar. “Ceo-Hospital” ərazisində “Gürcü arzusu” partiyasının tərəfdarları toplaşıb, patrul polisi səfərbər edilib. DİN rəhbəri Giorgi Mqebrişvili  istintaq işləri bitənə qədər məsələnin hədsiz siyasiləşdirilməməsi üçün ilkin versiyalar irəli sürməkdən çəkinməyə çağırıb.

Amma seçkilərə iki gün qalmış iqtidar partiyasının ofisinin qarşısında atışma olması faktı artıq siyasi bəyanatlar üçün səbəb olub.

Marneuli müxalifətinin nümayəndələri qəti şəkildə bildirirlər ki, bu hadisə müxtəlif siyasi güclər arasında haqq-hesablaşmadır. Müxalif “Avropa Gürcüstanı” partiyasının Marneuli merliyinə namizədi Əhməd İmamquliyev bildirir ki, atışma partiya daxili hesablaşmaların nəticəsidir.

“Daha əvvəl “Gürcü arzisi”nun merliyəə namizədi Amiran Qiorqadze elan olunmuşdu, iki aydan sonra isə onu Teymur Abazovla əvəəzlədilər. Marneulidə “Gürcü arzusu” üç yerə parçalanıb – Qiorqadzenin tərəfdarları, Abazovun tərəfdarları, üçüncü isə artıq əhalinin etibarını itirmiş deputatlar. Bizim gəzən söz-söhbətlərdən əldə etdiyimiz məlumata görə, namizədin dəyişdirilməsi partiyanın bu üç qanadı arasında qarşıdurmaya səbəb olub. Bizim məlumatımıza görə, “Gürcü arzusu”nun qərargahında vaxtaşırı sərt qarşıdurmalara keçən mübahisələr baş verir və sair və ilaxır. Bizə məlum olduğuna görə, qarşı-qarşıya duran tərəflər “Gürcü arzusu”nun mərkəzi ofisindədir”, – İmamquliyev deyib.

Digər müxalif partiya – “Milli Hərəkat”ın merliyə namizədi Azər Süleymanov eyni fikirdədir:

“Marneuli 90-cı illərə qayıdıb, camaat avtomatla gəzir, heç nədən çəkinmirlər. Atışma və bu kimi kriminal faktlar Marneulini Əfqanıstana bənzədir, oradakı kimi hər seçkidən öncə əcaib bir hadisə baş verir. Baş verənlərlə bağlı məndə olan bütün məlumat söz-söhbət və şayiə səviyyəsindədir, hərçənd siyasi motivləri mən müəyyən mənada istisna edirəm”, – Süleymanov bildirib.

Marneuli bələdiyyəsi Kvemo Kartli regionunda yerləşir. Marneuli əhalisinin 83 faizi Gürcüstan vətəndaşı olan etnik azərbaycanlılardır.