Gürcüstanda pul yuyulması işi: müxalifət rus izini axtarır
Gürcüstanda pul yuyulması işi
Gürcüstan Prokurorluğu 2022-2024-cü illərdə 624 milyon dollar və 35 milyon avronun yuyulmasında (leqallaşdırılmasında) ittiham olunan şəxsin saxlanıldığını bildirib. Prokurorluq hələlik saxlanılan şəxsin kimliyini açıqlamır, lakin “Pirveli” telekanalı onun “Fini” şirkətinin direktoru Kaxa Kotoraşvili olduğunu iddia edir.
İstintaqın versiyasına görə, saxlanılan şəxs cinayətkar qruplaşma ilə əlbir olaraq, nəqliyyat vasitələrində xüsusi gizli yerlərdən istifadə etməklə və gömrük prosedurlarını ötərək ölkəyə sənədləşdirilməmiş mənşəli xarici valyutanın mütəmadi gətirilməsini təmin edib. Daha sonra həmin pullar ona məxsus valyuta mübadiləsi məntəqəsinə yönləndirilib.
İstintaq həmçinin bildirir ki, saxlanılan şəxs müxtəlif vaxtlarda yuxarıda göstərilən üsulla toplanmış xarici valyutanı qanuni gəlir kimi təqdim edərək banklara təhvil verib və bunun üçün onun mənşəyi barədə saxta məlumatlar təqdim edib.
Konvertasiya nəticəsində əldə olunan vəsaitlər digər şəxslərə ötürülməklə və sonradan reallaşdırılmaqla, həmçinin daşınmaz və daşınar əmlak alınmaqla qanuni dövriyyəyə yönləndirilib.
Böyük məbləğdə pul yuyulmasına görə nəzərdə tutulan cinayət maddəsi 12 ilədək azadlıqdan məhrumetmə cəzasını ehtiva edir.
“Rus izinin” axtarışı
“Pirveli” telekanalı saxlanılan şəxsin (ehtimal ki, Kaxa Kotoraşvili) və onun şirkətinin sadəcə icraçı olduqlarını, pulların isə başqa bir şəxsə məxsus olduğunu iddia edir.
Müxalifət hesab edir ki, qanunsuz valyuta Gürcüstana böyük ehtimalla Rusiyadan gətirilib və söhbət “Rusiya cinayət pullarının” yuyulmasından gedir.
Bu versiyanı politoloq Giya Xuxaşvili də dəstəkləyir. Onun fikrincə, Gürcüstan hökuməti bütün bu müddət ərzində baş verənlərdən xəbərdar olub.
“Bu, Rusiyanın qara pullardan istifadə etməklə həyata keçirdiyi iqtisadi ekspansiya idi və nəticədə FTX-nin uğurlu xüsusi əməliyyatına çevrildi”, – deyə Xuxaşvili Palitranews agentliyinə bildirib.
Onun sözlərinə görə, hökumət və bütün aidiyyəti qurumlar Gürcüstanda “misilsiz həcmdə Rusiya pullarının” yuyulmasına görə məsuliyyət daşıyır.
Xuxaşvili hesab edir ki, bu prosesdə Milli Bank və kommersiya bankları da iştirak edib.
Müxalif “Lelo” partiyasının üzvü Salome Samadaşvili isə bəyan edib ki, hakim “Gürcü Arzusu” partiyasının qurucusu Bidzina İvanişvili “Gürcüstanı çirkli Rusiya pulları üçün camaşırxanaya çevirib”. Samadaşvili əmindir ki, bu cinayət ən yüksək siyasi səviyyədə sifariş olunub.
“Lelo”nun təsisçilərindən biri Mamuka Xazaradze Gürcüstanın ən böyük banklarından biri olan “TBC Bank”ın da həmtəsisçisidir.
Gürcüstanda pul yuyulması işi
