Gürcüstanda növbəti siyasi qalmaqal: İvanişvilinin oğlunun və baş nazirin iştirakı ilə “dinləmə”
Gürcüstan hökumətinin yüksək rəhbərliyi Bera İvanişvilinin – ölkənin faktiki rəhbərinin oğlunun göstərişi ilə insanların, o cümlədən də yetkinlik yaşına çatmayan məktəblilərin təqibi ilə məşğul olub. Şənbə günü “Pirveli” telekanalında yayımlanan səs yazıları bundan xəbər verir. Səs yazılarının həqiqiliyi təsdiqlənməyib – teleşirkət audo-materialların naməlum şəxs tərəfindən təqdim olunduğunu bildirir.
Teleşirkətin məlumatına görə, danışıqlarda Gürcüstanın hazırkı baş naziri İrakli Qaribaşvili, Dövlət Mühafizəsinin Xüsusi Xidmət rəhbəri Anzor Çubinidze və üçüncü şəxs – musiqiçi və rep ifaçısı, iqtidar partiyasının lideri milyarder Bidzina İvanişvilinin oğli Bera İvanişvili iştirak edib.
Telefon danışıqlarında İvanişvili, Qaribaşvili və Çubinidzenin səslərinə bənzər səsli şəxslər sosial şəbəkələrdə Bera İvanişvilinin ünvanına söyüş yazan məktəblinin necə qorxudulduğu və cəzalandırıldığı haqda ətraflı danışırlar.
Səs yazılarında nə danışırlar?
Səs yazısında Bera İvanişvili İrakli Qaribaşviliyə Anzor Çubinidzenin tapşırığı ilə hansısa adamların azyaşlının evinə gəlib onu qorxutduqları, alçaltdıqları və ailəsinin, qonşularının yanında üzr istəməyə məcbur etdikkləri haqda danışır:
“Bu gün o, məktəbə şalvarını islatmış halda gedəcək”, – Bera İvanişvili deyir.
“Çətin ki, o, məktəbə getmiş ola bilər”, – İrakli Qaribaşvili ona cavab verir.
Səs yazısına görə, Bera İvanişvili dəfələrlə Anzor Çubinidzenin verilən göstərişi yerinə yetirib-yetirmədiyini və sosial şəbəkələrdə arzuolunmaz şərhi yazan azyaşlını lazımınca cəzalandırıb-cəzalandırmadığını yoxlayıb.
Bundan sonra Qaribaşvili və İvanişvili eyni səbəblə digər birinin cəzalandırılması faktını müzakirə edirlər – bu şəxs də Facebook-da Bera İvanişvilinin xoşuna gəlməyən şərh yazıb.
Nəticədə Anzor Çubinidze onu da üzr istəməyə məcbur edib.
Danışıq zamanı kobud və senzuradan kənar leksikadan istifadə olunur. Söhbətdə iştirak edənlər qurbanlara gülürlər.
Səs yazısında cəzalandırma tədbirlərində iştirak edən “Vaxo” xatırlanır. “Pirveli TV”-nin verdiyi məlumata əsasən, sphbət daxili işlər naziri Vaxtanq Qomelauridən gedir.
İvanişvili hər şeyi bilirmiş?
Səs yazısına əsasən, Bera İvanişvili Qaribaşviliyə deyir ki, onun atası Bidzina İvanişvili onun planlaşdırdığı cəzalandırma ilə bağlı xəbərdardır.
Bera İvanişvili onu təhqir edən insanların yazılı şəkildə üzr istəməli olduqlarını qeyd edir və bildirir ki, “mənim atam (Bidzina İvanişvili) da bunu eləmək lazım olduğunu deyir”.
İrakli Qaribaşvili cavabında bunun yaxşı ideya olduğunu bildirir.
Səs yazısının nə zamana aid olduğu jurnalistlərə məlum deyil.
Səs yazısını kim təqdim edib və nə zamana aiddir?
“Priveli”nin məlumatına görə, bu səs yazısını telekanala anonim mənbə ötürüb.
Media və sosial şəbəkələrdə səs yazısını yayan şəxslə bağlı bir neçə ehtimal səsləndirilir. Bunlar arasında səs yazısının keçmiş baş nazir Giorgi Qaxariya və ya Dövlət Təhlükəsizliyi Xidməti rəhbərinin keçmiş müavini Soso Qoqaşvili, yaxud müxtəlif səbəblərlə və müxtəlif zamanlarda hakimiyyət komandası daxilində yaşanan ziddiyyətlərə görə işdən kənarlaşdırılmış digər keçmiş yüksək vəzifəli məmurlar tərəfindən ötürüldüyü ehtimalı da var.
Səsin yazıldığı dəqiq tarix məlum deyil. Jurnalistlər səs yazısının 2015-2016-cı illərə aid olduğunu güman edirlər.
Hakimiyyətin və müxalifətin reaksiyası
Hakimiyyət süjet hələ efirə getməmiş, proqramın anonsu yayılan kimi reaksiya verib – hökumətyönlü medaida keçmiş prezident Mixaail Saakaşvilinin və müxalifətin “dinləmələri” saxtalaşdırmaqda ittiham olunduğu xüsusi proqramlar və süjetlər hazırlanıb.
Material efirə çıxandan sonra “Gürcü arzusu” iqtidar partiyasının ofisində partiyanın siyasi şurasının iclası olub. Səs yazılarını şərh edən partiya liderlərindən biri Mamuka Mdinaradze bildirib ki, bu “uydurmadır”.
Mdinaradzenin sözlərinə görə, səs yazısı kontekstdən çıxarılmış ayrı-ayrı ifadələrdən ibarətdir.
Hakimiyyətin digər arqumenti isə ondan ibarətdir ki, Bera İvanişvilinin danışığı 2011-ci ildə, Saakaşvili hakimiyyətdə olduğu, Beranın isə yetkinlik yaşına çatmadığı zaman yazılıb.
Hakimiyyət onu da bildirib ki, səs yazıları Avropa Şurasının prezidenti Şarl Mişelin vasitəçiliyi ilə siyasi böhranın nizamlanması üzrə hökumətlə müxalifət arasında gedən danışıqları pozmaq üçün müxalifət tərəfindən yayılıb.
Müxalifət yekdilliklə bəyan edir ki, son səs yazısından sonra “Gürcü arzusu”nun bir əlacı qalıb – baş nazirin istefası və növbədənkənar parlament seçkilərinin təyin edilməsi.
“Bu elementardır. Ancaq tam müflisləşən və qorxmuş hökumət bu vəziyyətdə legitimliyinin olmadığını və istənilən addımının ancaq böhranı dərinləşdirdiyini görmür”, – Avropa Gürcüstanı Partiyasının lideri Serqi Kapanadze deyib.
8 martda müxalifət toplaşmağı və gələcək addımları haqda birgə bəyanatla çıxış etməyi planlaşdırıb.
İctimai reaksiya
Qalmaqallı material efirə çıxandan dərhal sonra komendant saatına baxmayaraq, “Gürcü arzusu” qərargahının yanına fəallar və siyasətçilər toplaşıb.
Bannerlərdə “Bera+İrakli=zorakılıq!”, “İvanişvili mafiyası” şüarları yazılıb.
Etirazçılar materiallarda haqqında danışılan faktların araşdırılmasını tələb ediblər.
Onlar həmçinin növbədənkənar seçki və siyasi motivlərlə həbs olunan insanların azad olunmasını tələb ediblər.
Gürcüstanın xalq müdafiəçisi Nino Lomcariya da araşdırma tələb edib. O, Gürcüstanda uzun illərdən bəri gizli səs və video yazıların yayılması təcrübəsini qınayıb.
“Yalnız effektli araşdırmadan sonra səs yazılarının həqiqiliyini və etibarlılığını – onların ayrıca istintaq predmeti olacaq cinayət əməlləri ilə bağlı ehtimal haqda informasiyanı əks etdirib-etdirmədiyini dəyərləndirmək mümkün olacaq”, – Lomcariya deyib.
