Gürcüstan statistikası yanvar ayında 5,2% iqtisadi artım göstərib ki, bu da son dörd ilin illik göstəricilərini üstələyir

Son statistik göstəricilər iqtisadiyyatda müsbət təmayüllərin olduğundan xəbər verir, – Gürcüstanın baş naziri Georgi Kvirikaşvili hökumətin iclasında bu barədə bəyan edib.

“Bu il biz yaxşı start götürmüşük. Milli Statistika Xidmətinin məlumatına görə, yanvar ayı çox uğurlu olub. Bi il ərzində (ötən ilin yanvarından) ÜDM-in real artımı 5,2 faiz yüksəlib ki, bu da çox yaxşı nəticədir. Digər parametrlər də mühümdür – məsələn, yanvar ayında ixrac ötən ilin eyni dövrü ilə müqayisədə 44,7% artıb, ƏDV-nin dövriyyəsi isə 21% artıb, – Kvirikaşvili bəyan edib.

O, həmçinin qeyd edib ki, bu müddət ərzində qeydiyyatdan keçən yeni müəssisələrin sayı 33 faiz, turistlərin sayısa 30 faizdən çox artıb.

Xatırladaq ki, Gürcüstanın iqtisadi artımının göstəriciləri 2013-cü ildən başlayaraq kəskin şəkildə aşağı düşüb. 2012-ci ildə iqtisadi artım 6,4 faiz təşkil etdiyi halda, 2013-cü ildə bu göstərici 3,4 faizədək düşüb. 2014-cü ildə iqtisadi artım 4,6, 2015-ci ildə 2,9, 2016-cı ilin üçüncü kvartalında 2,3 faizədək yüksəlib. Gürcüstan Milli Statistika Xidməti 2016-cı ilin yekun rəqəmlərini dərc etməyib.