Gürcüstanın qeyri-hökumət təşkilatları ölkənin baş naziri İrakli Qaribaşvilinin Bratislavada keçirilən Qlobal Təhlükəsizlik Forumunda səsləndirdiyi bəyanatı pisləyiblər. QHT-lərin bəyanatında deyilir ki, Qaribaşvilinin ritorikası Kremlin narrativi ilə üst-üstə düşür.
Məsələ ondadır ki, Qraibaşvilinin fikrincə, Ukraynadakı müharibənin əsas səbəblərindən biri onun NATO-ya daxil olmaq istəyi olub.
“Biz baş nazirə xatırladırıq ki, Ukraynanın NATO-ya üzvlüyü Ukrayna xalqının tarixi seçimidir və bu, Ukrayna konstitusiyası ilə təsdiqlənir. Onu da xatırladırıq ki, Helsinki Aktı hər bir ölkənin öz mülahizəsinə uyğun olaraq istənilən müqavilə və ya birliyə qoşulmaq üçün suveren hüququnu müəyyən edir.
Təəssüf edirik ki, Gürcüstanın baş nazirinin çıxışı NATO-nun genişlənməsinin Rusiya üçün təhlükə yaratdığı barədə Kremlin nağıllarına tam uyğundur. Lakin təəssüflər olsun ki, Gürcüstanın baş naziri fürsətdən istifadə edərək Rusiya Federasiyasının Ukraynaya qarşı haqsız və əsassız hücumunu qəti şəkildə pisləməyib.
Baş nazirə onu da xatırladırıq ki, o, xalqı mütləq səs çoxluğu ilə 2008-ci il yanvarın 5-də keçirilmiş plebissit əsasında Gürcüstanın NATO-ya üzvlüyünü dəstəkləmiş dövləti təmsil edir. Bu seçim Gürcüstan konstitusiyasının 78-ci maddəsi ilə gücləndirilib, ona görə konstitusiya orqanları Gürcüstanın Avropa İttifaqına və NATO-ya tam inteqrasiyasını təmin etmək üçün öz səlahiyyətləri daxilində bütün tədbirləri görməlidir”, – qeyri-hökumət təşkilatlarının bəyanatında deyilir.
Mayın 30-da Bratislavada keçirilən Qlobal Təhlükəsizlik Forumunda Gürcüstanın baş naziri faktiki olaraq Putin və onun rejiminin ritorikasını təkrarlayıb. İrakli Qaribaşvili deyib ki, Ukraynadakı müharibənin səbəbi onun NATO-ya üzv olmaq istəyi olub, ona görə də “nəticələrini görürük”.
Mayın 24-də Gürcüstanın baş naziri İrakli Qaribaşvili Qətər İqtisadi Forumunun panel müzakirəsində çıxışı zamanı bir daha bəyan edib ki, Ukrayna ərazisinin 20 faizi artıq Rusiya tərəfindən işğal olunub və bu müharibənin “nə vaxt bitəcəyini heç kim bilmir”. Onun sözlərinə görə, Ukraynanın “bu qədər uzun dayanması” hər kəsi təəccübləndirir.
Baş nazir Rusiya ilə uçuşların bərpasına da toxunub və bunun “normal” hekayə olduğunu bildirib. Qaribaşvili Ukrayna ilə Rusiya arasında vasitəçilik etməyə çalışan Çinin “ağıllı yanaşmasını” da yüksək qiymətləndirib.
