Gürcüstan prezidenti: “Etirazlar özünütəşkil səviyyəsində qalmalıdır”
Gürcüstan prezidenti siyasi böhran haqda
Gürcüstan prezidenti Salome Zurabişvili dekabrın 2-də keçirdiyi brifinqdə bildirib ki, ölkə boyu minlərlə insanın keçirdiyi etiraz aksiyaları hazırda olduğu kimi, özünütəşkil səviyyəsində qalmalıdır.
O, həmçinin bildirib ki, yaxın günlərdə ən mühüm hadisə onun oktyabrın 26-da keçirilmiş parlament seçkilərində məxfiliyin və şəffaflığın pozulması ilə bağlı iddialarına Konstitusiya Məhkəməsində baxılması ola bilər. İddia noyabrın 19-da verilib.
Prezident seçkilər öncəsi “Gürcüstan Xartiyası”nı imzalayan müxalifət liderləri ilə görüşdən sonra brifinq keçirib. Salome Zurabişviliyə təqdim olunan fəaliyyət planı belə adlanır.
Xartiyanın məqsədi hakim “Gürcü arzusu”nun əks çəkisi kimi avropapərəst müxalifəti birləşdirməkdir.
Daha əvvəl Salome Zurabişvili oktyabrın 26-da keçirilən parlament seçkilərini saxta elan edib və yeni seçilmiş parlamentin istənilən qərarını qeyri-legitim adlandırıb. Noyabrın 30-da o, fövqəladə brifinq keçirərək bildirib ki, ölkədə yeganə legitim hökumətdir və buna görə də yeni, ədalətli parlament seçkiləri keçirilənə və ölkədə legitim parlament yaranana qədər prezident kimi qalacaq.
“Etirazlara siyasi partiyaların və prezidentin müdaxiləsi lazım deyil”
“Biz hamımız razılaşdıq ki, etirazlara siyasi partiyaların müdaxiləsi lazım deyil, mənim də müdaxiləmə ehtiyac yoxdur. Bu, ilk növbədə cəmiyyətə aid olan məsələdir. Amma təbii ki, aksiya iştirakçılarının dəstəyə və müdafiəyə ehtiyacı var və bunu qeyri-hökumət təşkilatları, hüquqşünaslar edir”, – prezident bildirib.
O, siyasi liderlərin məsləhətləşmələri davam etdirdiyini və tezliklə gələcək fəaliyyət planlarını açıqlayacaqlarını söylədi.
“Əsas məsələ Konstitusiya Məhkəməsinə məlumatların çatdırılmasıdır”
“Konstitusiya Məhkəməsi və onun hakimlərinin indi ölkədə çox dərin siyasi böhranı həll etmək üçün unikal yolu var. Biz konstitusiya çərçivəsində qalırıq, bu gün və sabah görülməli olan əsas məsələ Konstitusiya Məhkəməsinə məlumatların çatdırılmasıdır.
Siyasi partiyalar, cəmiyyət, fəallar, hakimlər və hüquqşünaslar bu günlərdə dinləmələrin təyin edilməsinə və Konstitusiya Məhkəməsinin iddiaya baxmasına diqqət yetirməlidirlər”, – Zurabişvili bildirib.
Hazırda Gürcüstanın Konstitusiya Məhkəməsi yeni seçilmiş 150 deputatın hamısının legitimliyinə etiraz edən prezident və deputatların iddialarına baxır. Konstitusiyaya görə, məhkəmə bu iddialarla bağlı qərar qəbul edənə qədər parlamentin ilk iclasını çağırmaq, deputatların səlahiyyətlərinə səs vermək və hökuməti seçmək hüququ yoxdur.
Parlamentin yalnız iki halda iclas keçirmək hüququ olardı: Konstitusiya Məhkəməsi bu iddiaları baxılmaq üçün qəbul etmədikdə və ya onlara baxıb əsassız elan etdikdə. Ancaq nə birincisi, nə də ikincisi baş verməyib. Beləliklə, parlament toplaşaraq özünü konstitusiyadan kənar vəziyyətə qoydu ki, bu da konstitusiya ilə qadağan olunan hakimiyyətin qəsb edilməsi kimi qiymətləndirilə bilər.
Prezident hakimiyyətin sifarişlərini yerinə yetirməkdə ittiham olunan İctimai Televiziyaya müsahibə verəcək
“Gürcüstan cəmiyyəti ləyaqətli ictimai yayımçıya sahib olmağa layiqdir. Uzun müddət müxtəlif səbəblər göstərərək mənə bu kanalda efirə çıxmaq imkanı verilmədi. Nəzərinizə çatdırım ki, İctimai Televiziya kanalına xüsusi müsahibə verməyə hazıram”, – Salome Zurabişvili bildirib.
Son iki gündə İctimai Televiziyanın binası yaxınlığında irimiqyaslı etiraz aksiyaları keçirilib. “Hakimiyyətin əmri ilə cəmiyyəti dezinformasiyaya son qoymaq” tələbləri irəli sürülüb. Mitinq iştirakçıları prezidentə telekanalda efirə çıxmaq imkanı verilməsini də tələb ediblər.
Tezliklə İctimai Televiziyanın rəhbərliyi Salome Zurabişviliyə efir vaxtı verməyə hazır olduğunu təsdiqləyib.
Prezident administrasiyası onun müsahibəsinin dekabrın 3-ü və ya 4-ü canlı yayımda keçirilməli olduğunu bildirib.
