Gürcüstan-Azərbaycan sərhədində müxalif partiyanın sədr müavini saxlanılıb

Mayın 25-də axşam Gürcüstandan qayıdarkən gömrük məntəqəsində müxalif Azərbaycan Xalq Cəbhəsi Partiyasının sədr müavini Gözəl Bayramlı saxlanılıb.

İlk olaraq bu haqda məlumatı AXCP sədri Əli Kərimli Facebook səhifəsində paylaşıb. “Bayramlının çantasına nə isə atıblar və onu saxlayıblar”. Bu haqda o Kərimliyə telefonla xəbər verə bilib.

Bayramlı son vaxtlar tez-tez Gürcüstana müalicəyə gedirmiş.

Kərimli hakimiyyətə müraciət edib və onları kişi kimi mübarizə aparmağa səsləyib: “Heç olmasa qadına qarşı belə namərd metodlara əl atmayın. Siz qırmızı xətti keçirsiz. Unutmayın ki, bütün bunlara görə cavab verməli olacaqsız!” – Azərbaycanda bloklanmış “Meydan TV” saytı Kərimliyə istinadən yazır.

“Gözəl Bayramlı Dövlət Təhlükəsizlik Xidməti əməkdaşları tərəfindən dindirilir”, – hüquq müdafiəçisi Oqtay Gülalıyev məlumat verib. – “Qeyri-rəsmi məlumata görə, onun çantasında 10 min saxta ABŞ dolları “tapılıb”.”, – Gülalıyev Facebook səhifəsindəki statusunda yazıb.

Hadisə yerinə yollanan AXCP Ali Məclisinin sədri Nurəddin Məmmədli bildirib ki, son məlumatlara görə, Bayramlını Sərhəd Qoşunları Qərargahının yerləşdiyi Şəmkir şəhərinə aparıblar. “Çox güman ki, onu qaçaqmalçılıqda ittiham etmək istəyirlər”, – Azərbaycanda digər bloklanmış “Azadlıq Radiosu”nun saytı Məmmədliyə istinadən yazır.