Gürcüstan Ali Məhkəməsinin sədri istefa verib

Gürcüstan Ali Məhkəməsinin sədri Nino Qvenetadze  istefa verib. Onun bəyanatı qurumun saytında yerləşdirilib.

Bəyanata əsasən, Qvenetadze səhhətinin pisləşməsi səbəbindən vəzifəsini tərk edib – bir neçə ay ərzində müalicə kursu keçməlidir.

Nino Qvenetadze Gürcüstan Parlamenti tərəfindən 2015-ci ildə on il müddətinə Ali Məhkəmə sədri vəzifəsinə seçilib. Onun namizədliyini Gürcüstan prezidenti Georgi Marqvelaşvili irəli sürüb.

Ali Məhkəmənin saytında yerləşdirilmiş bəyanatda qeyd olunub ki, Qvenetadzenin rəhbərliyi altında məhkəmə islahatlarının üçüncü və dördüncü dalğaları həyata keçirilib.

Qvenetadzenin mümkün istefası haqda media daha əvvəl də yazıb. 2017-ci ildə Nino Qvenetadze və Ali Ədliyyə Şurası üzvləri arasında hakimlərin müddətsiz təyinatı ilə bağlı münaqişə yaranıb. O zaman eyni vaxtda şuraya rəhbərlik edən Qvenetadze bəyan edib ki, şura üzvləri ona təzyiq göstərərək, 34 nəfərlik namzədin yer aldığı siyahını təsdiqləməsini istəyiblər. Ali Məhkəmə sədrinin istefaya getmək qərarı haqda məlumat yayılıb. Amma nəticədə o, mübahisə doğuran namizədlərin təyinatını imzalayaraq öz vəzifəsində qalıb.