Gürcüstan: 8 yaşlı qızı amansızca qətlə yetirməkdə təqsirləndirilən şəxs onu izləyir, fotolarını çəkirmiş
Polis hələ Qori şəhərində 8 yaşlı qızın amansızca qətlinin motivlərini rəsmən açıqlamayıb, amma artıq işin bəlli olan bəzi detallarına əsasən demək olar ki, cinayət səbəbi azyaşlıya qarzı seksual zorakılıq ola bilər.
Qızın qətlində günahlandırılan şəxsin qurbanını öldürməzdən əvvəl izlədiyi ehtimal olunur. Polis onun telefonunda qızın şəkillərini aşkarlayıb.
Seksual zorakılıq versiyasını 15 il əvvəl baş verən başqa bir qorxunc olay da təsdiqləyir.
8 yaşlı Nana Beriaşvilinin qatilini oktyabrın 26-da səhər, Qori rayon məhkəməsinin həyətində, Liaxvi çayının sahilində qızın meyiti tapılandan bir neçə saat sonra saxlayıblar.
Nana Beriaşvili oktyabrın 25-də yoxa çıxıb. Qızcığaz rəqs dərnəyinə yollanıb, amma evin yaxınlığında yerləşən məktəbə gedib çıxmayıb. Gecəyarısına yaxın uşağın meyiti Qori rayon məhkəməsinin həyətində Liaxvi çayının sahilində tapılıb.
Şahidlər danışırlar ki, uşağın ayaqları metal məftillə bağlı olub, başına isə polietilen paket dolanıbmış.
Amansız qətldə daha əvvəl məhkum edilmiş 34 yaşlı İaqo Nebireidze ittiham olunur.
İttiham olunan şəxsin anası jurnalistlərə bildirib ki, o həbsdə 9 il keçirib və 2018-ci ilin əvvəlində azadlığa çıxıb.
Nebieridze Beriaşvili ailəsinin evi ilə qonşu küçədə yerləşən mənzilində saxlanılıb.
Nebieridzenin özü təqsirini qəbul etmir.
Hazırkı sahibləri evi təzə alıblar və köçməmişdən əvvəl təmir etmək qərarına gəliblər. Nebieridze də orada elə təmir işləri ilə məşğul imiş. Tək işləyirmiş.
Polislərin bildirdiyinə görə, onlar Nana Beriaşvilinin evindən məktəbə qədər sıralanmış hər bir evə baxış keçiriblər. Kinoloqlar da onlara axtarış zamanı kömək edib, onlar izə düşərək zirzəmiyə gəlib çıxıblar və orada qan işləri aşkarlanıb. İlkin məlumata görə, təqsirləndirilən şəxs uşağı məhz orada öldürüb.
• Qoridə 8 yaşlı qızın amansızca qətli
• 19 yaşlı çoban həmişəlik məhbəsə düşə bilər. Əgər amerikalı ailəni onun qətl etdiyi sübut olunsa
Daha sonra o uşağın meyitini əl arabasına qoyub Liaxvi çayının sahilinə, şəhər məhkəməsinin yanına gətirib. Yerli sakinlər xatırlayıblar ki, həmin gün Nebieridzenin yolda əl arabası ilə getdiyini görüblər.
15 il əvvəlki olay. Şübhəli şəxs haqda nə məlumdur?
Amma mümkündür ki, bu, Nebieridzenin adının uşaq oğurluğunda hallandığı ilk hadisə deyil.
Saxlanılan şəxsin bioqrafiyası ilə bağlı olan başqa bir hadisə yenə də Qoridə, amma 15 il əvvəl baş verib.
2004-cü ildə Berdzenişvili ailəsinin 11 yaşlı oğlunu hərac almaq məqsədilə oğurlayıblar. Doğmaları tələb olunan məbləği ödəməyə razılaşıblar, amma sonradan onlarla bir daha əlaqə saxlayan olmayıb.
Oğurlanmış uşaq indiyə qədər itkin düşmüş hesab olunur.
15 il əvvəl yoxa çıxan uşağın ailəsi jurnalistlərlə əlaqə saxlayıb.
İtkin oğlanın babası Zakro Berdzenişvili “Rustavi-2” kanalına danışıb ki, o vaxt Nebieridze nəvəsinin oğurlanması işi ilə bağlı hətta saxlanılıbmış.
“Rustavi-2” kanalının jurnalistləri bu informasiyanı yoxlayıblar, məlum olub ki, Nebieridze doğrudan da bu işlə bağlı həbs edilib və cəza çəkib, amma hərac tələb etmək epizodu üzrə, uşağın oğurlanması ilə bağlı onun günahı sübuta yetirilməyib.
Zakro Berdzenişvili 15 il əvvəlki hadisələri xatırlayıb:
“Həmin dövrdə bizim evin yaxınlığında avtomobil qarajı tikilirdi və İaqo Nebieridzenin atası da, özü də burada işləyirdilər. Nəvəm həmişəki kimi evdə fırlanırdı, Nebieridze ilə dostlaşmışdı, ona qarajda kömək edirdi. Bir gün səhər uşaq yoxa çıxdı. Bizimlə əlaqə saxlayıb dedilər ki, yenidən uşağı görmək istəyiriksə, müəyyən məbləğ ödəməliyik. Biz dedik ki, razıyıq, amma bundan sonra bir daha heç kim əlaqə saxlamadı. İndi onun 26 yaşı olardı”.
O, deyir ki, ailə ilk andan uşaqla dostlaşmış bu cavan oğlandan şübhələnib.
“15 il əvvəl uşağı İaqo Nebieridze oğurlamışdı, amma bunu sübut eləyə bilmədilər. Bəs siz necə düşünürsüz, o nəyə görə həbsdə olub? O, əvvəl də həbsdə olub”, – Berdzenişvili deyib.
“Rustavi-2” Nebieridzenin insan oğurluğu ilə bağlı daha bir məhkumluğundan söz açır. Şübhəlinin qonşuları jurnalistlərə bildiriblər ki, Nebieridze qadına qarşı zorakılığa görə saxlanılıb. Deyilənə görə, o, qadını oğurlayıb və hərac tələb edib, buna görə də doqquz il həbsdə qalıb.
“Rustavi-2” kanalının informasiyasına görə, Nebieridze qarətə görə 17 il müddətinə azadlıqdan məhrum edilib, amma prezident amnistiyasına düşüb və 9 il sonra 2018-ci ilin fevralında azadlığa buraxılıb.
Nebieridzenin anası oğlunun həqiqətən də qarətə görə məhkum edildiyini təsdiqləyir. Onun sözlərinə görə, o “zorla bir qadının əlindən telefon almağa çalışıb”.
DİN-də də təsdiqləyiblər ki, ittiham olunan şəxs daha əvvəl məhkum edilib, amma təfərrüatlar haqda məlumat verilməyib.
“Rustavi-2” öz arxivində İaqo Nebieridzenin adının hallandığı bir süjet də tapıb – bu məhkumun adı Gürcüstanın Xalq Müdafiəçisinin 2004-cü il hesabatında çəkilir. Hesabatda deyilir ki, Nebieridze həbsxanada qəddarca döyülüb.
Gürcüstan DİN-i “azyaşlının ağırlaşdırıcı halda qəsdən qətlə yetirilməsi” maddəsi ilə istintaqı davam etdirir. İşi daxili işlər nazirinin müavininin rəhbərliyi altında xüsusi qrup araşdırır.
