“Freedom House” Azərbaycan hakimiyyətindən Tofiq Yaqublunun azad olunmasını tələb edir
“Freedom House” beynəlxalq hüquq müdafiəsi təşkilatının Avropa və Avrasiya proqramları üzrə direktoru Mark Brendt Azərbaycan hökumətindən Tofiq Yaqublunun azad olunmasını tələb edib. Məhkəmə tanınmış müxalifətçini 4 il və 3 ay azadlıqdan məhrumetmə cəzasına məhkum edib. Yaqublu aclıq aksiyasına başlayıb.
• Azərbaycanda tanınmış müxalifətçi yenidən məhkum edilib
• Cənubi Osetiyanın 28 yaşlı sakininin təcridxanada işgəncə nəticəsində öldüyü ehtimal edilir
“Yaqublunun işi hökumət tənqidçilərinə qarşı repressiyaların güclənməsindən və hakimiyyətin azad söz və qanunun aliliyinə qarşı dəhşətli etinasızlığından xəbər verir. Azərbaycan hökuməti açıq şəkildə COVID-19 pandemiyasından və bununla əlaqədar tətbiq olunan məhdudiyyətlərdən rəqiblərini susdurmaq və təqib etmək vasitəsi kimi istifadə edir. Yaqublu və siyasi motivli ittihamlarla həbs edilən onlarla digər vətəndaş azad edilməli, onlara qarşı bütün ittihamlara son qoyulmalıdır”, – Mark Brendtin bəyanatında deyilir.
Freedom House təşkiları 2020-ci ildə Azərbaycanı qeyri-azad və avtoritar idarəetmə rejimli ölkə kimi tanıyıb.
Məhkəmədə hökm elan olunandan bir gün öncə, sentyabrın 2-də Tofiq Yaqublu aclıq aksiyasına başladığını elan edib. Bu aksiya artıq üç gündür ki, davam edir.
Tofiq Yaqublu 2020-ci il martın 22-də xuliqanlıqda ittiham olunaraq saxlanılıb. Cinayət işinin materiallarına əsasən, o, avtomobili ilə qəza törədib və digər maşında olan evli cütlüyü döyüb.
Yaqublu 2014-2016-cı illərdə kütləvi iğtişaşların təşkilində ittiham olunaraq həbs edilib. Daha sonra 2019-cu il oktyabrın 19-da Bakıda müxalifətin etiraz aksiyasında iştirak etdiyi üçün 30 sutka inzibati həbslə cəzalandırılıb.
