Ermənistanda həkimlər küçədə yoldan ötənlərin təzyiqini pulsuz ölçəcək

Ermənistanlı mütəxəssislər beynəlxalq həmkarları ilə birlikdə vətəndaşlarda arterial təzyiqlə bağlı problemləri üzə çıxarmaq üçün geniş miqyaslı aksiyaya başlayırlar. Aksiya iyunun 5-də başlayıb, iyunun 25-ə qədər davam edəcək. Yerevan və respublikanın digər şəhərlərini əhatə edəcək. Həkimlər insanların təzyiqini elə küçədəcə, insanların çox toplandığı yerlərdə ölçəcəklər.

Aksiyanın təşəbbüskarlarından biri olan Yerevanın baş kardioloqu, professor Parunak Zelveyan hesab edir ki, kampaniya ölkə sakinlərində təzyiqlə bağlı problemi vaxtında üzə çıxarmağa imkan verəcək və onların tibbi məlumatlılığını artıracaq:

“Əhalimizin arasında yanlış təsəvvür yayılıb: tutaq ki, əgər qonşumun təzyiqinə X dərmanı yaxşı təsir edirsə, deməli, mənə də mütləq kömək edəcək. Mütəxəssislər isə illərlə simptomlara əsasən bu və ya digər pasiyentə hansı dərmanın uyğun ola biləcəyini öyrənir”.

Parunak Zelveyan onu da vurğulayıb ki, xəstəliyin vaxtında aşkarlanması onun nəzarət altına alınması üçün vacibdir:

“Pasiyentlər xəstəlikdən ölmürlər, vaxtında lazımi müalicəni almadıqları üçün ölürlər”.

Arterial hipertoniyanı “əsrin xəstəliyi” adlandırırlar. Hər il yüksək təzyiqin doğurduğuu ürək-damar xəstəliklərindən 10 milyona qədər insan ölür. Ermənistanda bu xəstəlikdən əhalinin 30 faizə qədəri əziyyət çəkir. Bu qrupa əsasən 70 yaş və yuxarı pasiyentlər daxildir.