Dəbdəbənin dəyəri: Ermənistanda daşınmaz əmlak vergisi kəskin artırılır

Ermənistanda əmlak vergisinin hesablanması sistemini dəyişmək qərarına gəliblər. Parlament artıq Vergi Məcəlləsinə müvafiq düzəlişləri ikinci və sonuncu oxunuşda qəbul edib.

Bu düzəlişlər 2021-ci ildən tədricən qüvvəyə minəcək. Altı il ərzində vergi 5-6 dəfə, bahalı mənzil və evlərə görə isə onlarla dəfə artacaq.

Bu, hazırda sosial şəbəkələrdə ən çox müzakirə olunan mövzudur. Düzəlişlərin əleyhdarları Facebook-da fleşmob təşkil ediblər. İqtidar partiyasından olan deputatlar nəinki sosial şəbəkə istifadəçilərinə cavab verir, hətta onlarla parlamentdə görüşmək və izahat vermək niyyətindədirlər.

Bütün təfərrüatlar – indi və 2026-cı ildə kim və nə qədər ödəyəcək? 

● Ermənistanda koronavirusun iqtisadi fəsadlarının öhdəsindən gəlmək üçün kimə və hansı yardım ediləcək?

● Korrupsiya və oliqarxlarla mübarizə, həyatın yaxşılaşdırılması: Ermənistan inqilabdan sonra necə dəyişib?

Dəyişikliklər haqda

İndi Ermənistanda evin kadastr qiyməti üzrə hesablanan əmlak vergisi kifayət qədər kiçikdir. Qəbul olunmuş layihəyə görə, əmlak vergisinin hesablanmasına yeni qayda ilə – bazar qiymətindən çıxış edərək yanaşılacaq.

Maliyyə nazirinin müavini Arman Poqosyan bəyan edib ki, Ermənistanda əmlak vergisi potensialı 5-7 dəfə az dəyərləndirilib. Onun sözlərinə görə, problem ondadır ki, kadastr dəyərinə görə təyin olunmuş vergi bazar qiymətindən bir neçə dəfə fərqlənir. Ödənişlərə gəlincə isə, onlar “vətəndaşlara keyfiyyətli xidmət şəklində qaytarılacaq”, çünki vergi ödəmələri icmaların büdcəsinə yönləndiriləcək – nazir müavini əmin edir.

Hakimiyyət bəyan edir ki, yeni vergi sisteminin tətbiq edildiyi dördüncü ildə artıq toplanan daşınmaz əmlak vergisi artıq təxminən 5 dəfə yüksəlmiş olacaq. Hazırda toplanan bu verginin həcmi 9 milyard dram (təxminən 19 milyon dollar) təşkil edir. 

Dəyişikliklər tədricən – altı il müddətində baş tutacaq. 2021-ci ildə əhali verginin 25 faizini, 2022-ci ildə 30 faizini, 2023-cü ildə 35 faizini, 2024-cü ildə 50 faizini, 2025-ci ildə 75 faizini və yalnız 2026-cı ildə verginin tam həcmini ödəyəcək.

Müxlifət nə deyir?

Qəbul olunmuş düzəlişləri parlament müxalifəti də tənqid edib. Müxalifətçilərin fikrincə, bu təklif xüsusən də koronavirus pandemiyası şəraitində vətəndaşların sosial vəziyyətini daha da pisləşdirəcək.

“Təklif olunmuş dəyişikliklər nəticəsində əmlak vergisi orta hesabla 3-4 dəfə yüksələcək və bunun tətbiq edilməyəcəyi – artım mənasında – əmlak olmayacaq. Bundan başqa, qanunda [qərarın] sosial komponentləri nəzərə alınmayıb”, – “Çiçəklənən Ermənistan” fraksiyasından olan deputat Mane Tandilyan hesab edir.

Vergi artımına qarşı fleşmob

İyunun 26-dan Facebook-un Ermənistan seqmentinin istifadəçiləri qəbul olunmuş dəyişikliklərə qarşı fleşmob başladıblar.

Ölkənin tanınmış jurnalistləri, aktyorları, ictimai xadimləri bu etiraza qoşulublar.

Fleşmob iştirakçıları öz səhifələrində şəxsi fotolarını eyni mətnlə paylaşıblar:

“Əziz köklü yerevanlılar, əgər indi siz öz hüquqlarınız haqda danışmasanız, sabah mənzillərinizdən, evlərinizdən məhrum olacaqsız. Bu, bizə miras qalan daşınmaz əmlakın özgəninkiləşdirilməsinin və ya ekspropriasiyanın yeni “forması”dır. Övladlarınızın gələcəyini düşünün. Fleşmoba qoşulun, FB-də öz fotonuzu və bu mətni paylaşın: “Yeni əmlak vergisi köklü yerevanlıları əmlakından məhrum edəcək. Mən köklü yerevanlıyam və bura mənim şəhərimdir”.”.

Fleşmob diqqət çəkib. “Mənim addımım” iqtidar fraksiyasından olan deputat Babken Tunyan dərhal reaksiya verib və fleşmob iştirakçılarını parlamentə dəvət edib.

Deputat Facebook səhifəsində dəyişiklik əleyhdarlarına onların ümimi mövqeyini təmsil edəcək 5-7 nəfərlik qrup formalaşdırmağı təklif edib. Bununla yanaşı o, xəbərdarlıq edib ki, müzakirələr ictimai və dürüst olacaq:

“Mən özüm insanları köklü olanlara və olmayanlara ayırmıram: qanun hamı üçün eynidir. Mənim dəvətim özünü köklü yerevanlı hesab edənlərə və bu vəziyyətin məsələdə hansısa rol oynamalı olduğuna əmin olanlaradır”.