Ermənistan Ayda hərbi baza tikməmək və silah sınaqdan keçirməmək öhdəliyi götürüb

Ermənistan hökuməti 1979-cu il dekabrın 18-də BMT çərçivəsində Nyu-Yorkda imzalanmış “Dövlətlərin Ayda və digər səma cisimlərində fəaliyyəti haqda” Sazişi təsdiqləyib.

“Ermənistan Aydan və digər səma cisimlərindən yalnız dinc məqsədlərlə həyat şərtlərini yaxşılaşdırmaq, iqtisadi və sosial inkişafı təmin etmək üçün faydalanmalıdır. Ayın və digər səma cisimlərinin resurslarından istifadə etmək üçün ermənistan 1979-cu ildə Nyu-Yorkda imzalanmış “Dövlətlərin Ayda və digər səma cisimlərində fəaliyyəti haqda” Sazişi ratifikasiya edir”, – qəbul olunmuş sənəddə deyilir.

Saziş müzakirələrsiz təsdiqlənsə də, layihənin əsasnaməsində mövcud olan müddəalardan onun mahiyyətini anlamaq mümkündür: “Ayda istənilən güc tətbiqi, istənilən güc tətbiqinin təhdidi, düşmən əməllər vbə ya düşmən əməllərlə təhdid qadağan edilir. Ayda hərbi bazanın, obyektlərin və istehkamların yerləşdirilməsi, istənilən növ silahın sınağı, istənilən hərbi təlimlərin keçirilməsi qadağan edilir”.

Bu Sazişə əsasən, “Ay dövlətlər tərəfindən və suverenlik elanı yolu ilə, nə istismar yolu ilə, nə də zəbt və ya istənilən digər vasitələrlə özününküləşdirilə bilməz”.

Ermənistanın Facebook istifadəçiləri nəinki bu xəbərə diqqət yetirib, hətta bu xəbəri şərh etməkdən də özünü saxlaya bilməyib. Budur, onlardan bəziləri:

“Bu nə dəhşətdir! İndi biz hərbi bazalarımızı harda yerləşdirəcəyik?!”

“Bizim hərbi bazamız Günəşdə olacaq, Ayı neynirik?!”

“Ermənistana Ayda “şaşlık” festivalı keçirməyə icazə verilir”.

“Əcəbdir! Bircə bu problem qalmışdı, onu da həll etdik!”