Ermənistanın cinayət-icra müəssisələrində vəkillərin üzərini axtarışdan keçirirlər

Bir qrup vəkil cinayət-icra müəssisələrində axtarışa məruz qaldıqlarını bildirir, bu da qanuna ziddir. Üstəlik əgər vəkil axtarışa etiraz edirsə, ona müvəkkili ilə görüşə icazə vermirlər.

Vəkil Lusine Saakyan Tert.am saytına bildirib ki, vəkillərin hüquqları mütəmadi olaraq pozulur. Eyni zamanda bunun səbəbi qətiyyən qarşı tərəfin qanunlardan xəbərsiz olmaları deyil. Mövqeləri zəifləmiş Vəkillər Palatası isə onları müdafiə etməyə qadir deyil. “Biz bu hala qarşı mübarizə aparacağıq, çünki əgər vəkil öz haqlarını qoruya bilmirsə, başqalarının da haqqını qoruya bilməz”, – Saakyan vurğulayıb.

Bu məsələ ilə bağlı Ermənistan Ədliyyə naziri Arpine Ohanesyanla Vəkillər Palatasının rəhbəri Ara Zohrabyanın görüşü olub. Daha sonra onlar müştərək bəyanatla çıxış ediblər.

Lusine Saakyanın fikrincə, bu sənəd geriyə doğru bir addımdır, çünki aşağıdakı halı təsbit edir; vəkilləri yoxlamaq olar, amma üzərlərində axtarış aparmaq olmaz. “Vəkillər Palatası bir struktur olaraq öz vəkillərini müdafiə etmək əvəzinə, hər yola onlarla mübarizə aparır. Təbii ki, dövlət orqanları vəkillərin hüquqlarını pozacaq, çünki güclü vəkil təşkilatının mövcud olması onlara sərf eləmir”, – o deyir.

Vəkil hesab edir ki, axtarışlara son qoyulması üçün bütün hüquqi imkanlardan istifadə etmək lazımdır, əks halda o və həmkarları tətil elan etməli olacaqlar.