Ermənistanda LGBT nümayəndələrinə qarşı diskriminasiyanın kriminallaşdırılması məsələsi müzakirə olunur

Foto: Gevorq Kazaryan, JAMnews

Ermənistanda seksual oriyentasiyası ilə əlaqədar insanlara qarşı diskriminasiyaya görə cinayət məsuliyyəti tətbiq etmək niyyətindədirlər.

Cinayət Məcəlləsinin yeni layihəsi e-draft.am saytında ictimai müzakirəyə qoyulub. Səs verənlərin artıq 90 faizi layihənin əleyhinə olduğunu ifadə edib. Qanun layihəsi millətçilərin qəzəbinə səbəb olub, onlar bu sənədin nəinki mənəviyyatdan kənar, həm də dövlətçiliyə qarşı olduğunu bildiriblər. Eyni zamanda həm hüquqşünaslar, həm də LGBT nümayəndələri qeyd ediblər ki, onların Ermənistandakı vəziyyəti acınacaqlıdır və onların haqlarını qanunla qorumaq lazımdır.

Təqdim olunmuş qanunun 197-ci maddəsində “seksual oriyentasiya” ifadəsi istifadə olunur. Hər hansı şəxsin seksual oriyentasiyası ilə əlaqədar olaraq hüquqlarının, azadlıqlarının, qanuni maraqlarının birbaşa vəə ya dolayısı ilə pozulmasına görə cəza nəzərdə tutulur.

Cəza cərimə şəklində – minimal əməkhaqqının iyirmi misli qədərinəcən – və ya sosial iş şəklində – maksimum 80 saata qədər – və yaxud da azadlığın məhdudlaşdırılması şəklində – iki ilə qədər müddətə – ola bilər.

“Bu, dövlət səviyyəsində şantaj və repressiya alətlərinin işə salınması cəhdidir. Əgər bu halı cəmiyyətin fikrinə zidd olaraq kriminallaşdırmaq istəyirlərsə, bu, şantaj və terror alətlərinin işə salınması deməkdir”, – Ümumermənistan Valideynlər Komitəsinin başçısı Arman Boşyan bildirib.

O xatırladıb ki, zamanımda belə bir qanunvericilik təşəbbüsü artıq olmuşdu, amma böyük səs-küyə səbəb olduğu üçün rədd edilmişdi. Bundan başqa, Arman Boşyanın fikrincə, diskriminasiya hallının olub-olmadığını kimin qiymətləndirəcəyi bəlli deyil.

LGBT birliyi nümayəndələrinin sözlərinə görə, onların hüquqları nəinki qorunmur, üstəlik tapdanır.

“Ermənistanda ən zəif qrupun transgenderlər olduğunu kim bilmir ki? Ətrafındakı reallığı dəyişmək istədiyin zaman bunu bacarmırsan, sonra yenə cəhd göstərirsən, yenə alınmır, o zaman başqa mühitə köçməkdən başqa çarə qalmır.

Xüsusən də bir tərəfdə yalnız sən və bir neçə adamın, qarşı tərəfdə isə böyük əksəriyyətin olduğunu görəndə. Diskriminasiya, təhdid, nifrət, müxtəlif  hüquq və azadlıqların pozulması Ermənistanda o qədər yüksəkdir, o qədər geniş yayılıb  ki, nəfəs almaq olmur, amma adam boğulmaq da istəmir”, – ağır atletika üzrə ikqat Avropa çempionu, rekordçu, Dünya Çempionatının ikiqat gümüş mükafatçısı, transgender Mel Daluzyan deyir. Mel Daluzyan artıq bir ildir ki, Hollandiyada yaşayır.