Ermənistanda koronavirusa yoluxanların sayı artır, onlar artıq 28 nəfərdir

Yenilənib

22։15

Ermənistanın daha iki sakinində koronavirus təsdiqlənib. Təcili təcrid olunmaları üçün onların təmasda olduğu insanlar müəyyən edilir. Hazırda yoluxanların ümumi sayı 28 nəfərə çatıb.

Eyni zamanda məlum olub ki, Ermənistanda martın 1-də aşkarlanan ilk koronavirusa yoluxan şəxs artıq sağalıb – təkrar test mənfi nəticə verib. O, artıq xəstəxanadan evə gedə bilər.

20:30

Ermənistanda daha üç nəfərdə koronavirusa yoluxma halı təsdiqlənib, gündüz daha üç nfər haqda məlumat verilmişdi. Bununla da martın 15-də ölkədə altı nəfər yoluxmuş şəxs qeydə alınıb. Yoluxanların ümumi sayı isə 26 nəfərə çatıb.

Gün ərzində yoluxanlar artıq təcrid olunmuş insanlar arasında aşkarlanıb, çünki onlar bir neçə gün əvvəl yoluxduğu üzə çıxan qadınla ünsiyyətdə olublar.

“Digər [altıncı] hal Meğridə, İtaliyadan qayıdan bizim vətəndaşımızda qeydə alınıb”, – səhiyyə naziri Arsen Torosyan Facebook səhifəsində yazıb.

İndi Meğri sakininin ünsiyyət çevrəsi müəyyən edilir. Onunla təmasda olan hər kəs təcrid olunacaq.

18:00

Martın 15-də Ermənistanda koronavirusa yoluxanların sayı 23 nəfərə çatıb.

Ən son yoluxduğu təsdiqlənənlərin hər üçü İtaliyadan qayıdan qadınla təmasda olduqları üçün artıq karantin altına alınıblarmış.

Məsələ burasındadır ki, həmin qadın yüksək temperaturuna və digər əlamətlərə baxmayaraq, təcrid olunmayıb. Yoluxduğu təsdiqlənənə qədər 10 gün ərzində bir neçə kütləvi tədbirə, o cümlədən də nişan mərasiminə qatılıb. Bu mərasimə dəvət olunan onlarla insan karantin altına alınıb, bəzilərinin yoluxduğu aşkarlanıb.

Martın 14-də qeydə alınan yoluxma halları arasında məktəbli də var. O, artıq xəstəxanada müalicə olunur, onun ünsiyyətdə olduğu sinif yoldaşları və müəllimləri təcrid olunublar.

• Ermənistanda koronavirus xəstələrinin sayı 18 nəfərə çatıb. Baş nazir və həyat yoldaşı da koronavirusa test verib və özünütəcrid rejiminə keçiblər

• Koronavirus haqda hər şey

• Koronavirus: pandemiya elan edilib. Bu nə deməkdir və nə gözləmək lazımdır?

Yeni yoluxma halları haqda təfərrüatlar

Səhiyyə naziri Facebook səhifəsində yeni yoluxanlar haqda təfərrüatları yazıb.

Arsen Torosyan bildirib ki, aparılmış 52 testin nəticələri məlum olub, 49-u mənfi, üçü müsbət nəticə verib. Martın 14 və 15-də aşkarlanan bütün son yoluxma hallarında insanlar İtaliyadan qayıdan eçmiadzinli qadınla ünsiyyətdə olduqları üçün artıq karantin altında imişlər. Bununla əlaqədar olaraq həkimlər hesab edirlər ki, ölkədə vəziyyət hələ də nəzarət altındadır.

Nazir bildirib ki, martın 15-i axşama doğru Ermənistanda ilk yoluxan şəxsin təkrar verdiyi testin nəticələri də bəlli olacaq. Nəticə mənfi olarsa, o, xəstəxanadan evə buraxılacaq.

“21 pasiyentin, o cümlədən də uşağın sağlamlıq durumu qənaətbəxşdir. Digər iki pasiyentdə pnevmaniya var, onların da həyati təhlükəsi yoxdur”, – Arsen Torosyan bildirib.