Ermənistanda heç vaxt işləməyənlərin pensiyası artırılır

Ermənistanda heç vaxt işləməyənlərə qocalığa görə ödənən pensiyalar artırılır. İndi onlar dövlətdən əvvəlki 16 min dram (33 dollar) əvəzinə  25 min 500 dram (52,5 dollar) həcmində pensiya alacaqlar.

Dəyişikliklər nə qədər insana tətbiq olunacaq?

2019-cu il yanvarın 1-dən qocalığa görə pensiyaların artımı ümumilikdə 85 min nəfər Ermənistan vətəndaşını əhatə edəcək.

Onlar arasında yalnız heç vaxt işləməyənlər yox, əmək stajı olsa da, ayda 25 min 500 dramdan (52,5 dollar) az pensiya alanlar da var. Bu haqda Ermənistanın əmək və sosial məsələlər nazirinin müavini Smbat Saqiyan bildirib.

Onun sözlərinə görə, təşəbbüsün əsas məqsədi təqaüdçülər arasında kəskin yoxsulluq riskinin qarşısının alınmasıdır:

“Ermənistanda yarım milyona yaxın təqaüdçü var, onlardan 17 min nəfərinin pensiya həcmi kəskin yoxsulluğun minimum həddindən aşağıdır”.

Məhz bu səbəbdən qalan təqaüdçülərin, yəni işləmiş və daha yüksək pensiya alanların pensiyasında artıqm gözlənilmir. Ermənistanda son dəfə pensiyalar 2015-ci ildə artırılıb. O zaman artım ayda dörd dollara yaxın olmuşdu.

İslahatlar başqa kimləri əhatə edəcək?

Saqiyan bildirib ki, pensiyaların artımı əlilliyi olan insanları da əhatə edəcək. Bu zaman o vurğulayıb ki, əvvəllər müxtəlif qrup əlilliyi olan insanlara ödəmələr məsələsində ədalətsizlik müşahidə olunub. Onların hamısı eyni həcmdə müavinət alır, yeganə fərq isə onlara pulsuz verilən dərmanların sayında və adında idi.

“Yeni qanun layihəsinə görə, müavinətləri birinci qrup əlilliyi olan vətəndaşlar üçün 40 faiz, ikinci qrup əlilliyi olanlar üçün isə 20 fazi artırmaq nəzərdə tutulub. Beləliklə birinci qrup əlilliyi olan şəxslər üçün pensiyanın həcmi 6400 dram (13 dollar), ikinci qrup əlilliyi olanlar üçün isə 3200 dram (6,5 dollar) artacaq”, – Saqiyan deyib.

Bütün bu islahatlar dövlət büdcəsinə 110 milyon drama (təxminən 227 min dollar) başa gələcək.

Digər islahatlar

Ermənistan hökumətinin ilin əvvəlində qəbul etdiyi qanun layihəsinə əsasən, insanlar ailə başçısını itirdikləri zaman 2019-cu ilin yanvarından qocalığa görə pensiyaların, əlilliyə görə müavinətlərin artması səbəbilə ailə və ya sosial müavinətləri almaq hüququndan məhrum olmayacaqlar. O zaman əmək və sosial məsələlər nazirinin müavini vəzifəsini tutan Arsen Manukyan bu qərarın niyə verildiyini izah edib:

“Ailələrin [təminatsız] böyük hissəsinin sosial müavinət almaq haqqını itirməsi riski yaranır. Məsələn, ödəmələrin həcmi 4-6 min dram (8-12 dollar) yüksələ və buna görə də ailə 18 min dramlıq (37 dollar) sosial müavinəti itirə bilər. Sözügedən dəyişikliklərə əsasən isə belə mənfi nəticələrin qarşısının alınması mümkündür”.