Ermənistanda Dövlət Gəlirləri Komitəsinin 200-dən çox əməkdaşı işdən çıxarılıb

Dövlət Gəlirləri Komitəsində struktur dəyişikliklər həyata keçirilib. Bu haqda Ermənistan jurnalistləri ilə söhbətində komitə sədri Vardan Harutunyan deyib.

Yanvarın 1-dən bu günə qədər 200-dən çox əməkdaş işdən azad edilib, həm də ixtisarlar bütün strukturda, eləcə də vergi xidmətində baş verib.

Vardan Harutunyan ixtisarların ştat cədvəlinin süni şəkildə şişirdilməsi ilə əlaqədar olduğu haqda ehtimalla razılaşmayıb. “Sadəcə Dövlət Gəlirləri Komitəsində çoxdan bəri struktur dəyişikliyi baş verməyib, indi isə biz bəzi struktur dəyişikliyi həyata keçirməyi qərara aldıq. Zamanla ayaqlaşmaq lazımdır. Biz texnologiya zəmanəsində yaşayırıq və hər şeyi bu günün reallığına müvafiq vəziyyətə gətirmək lazımdır”, – xidmət rəhbəri bəyan edib.