Ermənistan xüsusi xidmət orqanları dövlət çevrilişinin qarşısını alıb: sübutlar dərc olunub
Ermənistanda dövlət çevrilişi cəhdi
Müxalif “Müqəddəs Mübarizə” hərəkatının liderləri “terror aktları törətməyi və hakimiyyəti ələ keçirməyi planlaşdırıblar”. Bu barədə Ermənistan İstintaq Komitəsi məlumat yayıb. Cinayət işi açılıb.
İstintaq Komitəsinin məlumatında bildirilir ki, “V.Q. konstitusiyaya zidd şəkildə hakimiyyəti ələ keçirməyi planlaşdırıb”. V.Q. hərəkatın lideri, arxiyepiskop Baqrat Qalstanyanın dünyəvi adı Vazgen Qalstanyana aiddir. Hüquq-mühafizə orqanlarının məlumatına görə, V.Q. “hərəkatın bir sıra üzvləri ilə qabaqcadan əlvir olaraq, terror aktları törətmək və hakimiyyəti zorla ələ keçirmək üçün lazım olan vasitə və alətləri əldə edib.”
Cinayətkar qrup öz planını həyata keçirə bilməyib, çünki Ermənistanın Milli Təhlükəsizlik Xidməti əməliyyatın qarşısını hazırlıq mərhələsində ikən alıb. MTX artıq Baqrat Qalstanyanı saxlayıb.
“Cinayətkar-oliqarx qruplaşma, tərkibində din xadimləri olmaqla, Ermənistanda vəziyyəti pozmaq və hakimiyyəti ələ keçirmək planı hazırlayırdı. Hüquq-mühafizə orqanları bu irimiqyaslı və rüsvayçı planın qarşısını aldı”, – deyə Ermənistanın baş naziri Nikol Paşinyan Facebook səhifəsində yazıb.
İstintaq Komitəsində cinayət işinin başlanması üçün vəsatətlə Baş Prokurorluq çıxış edib. Əsas kimi hökumətyönlü Civic.am xəbər saytının dərc etdiyi material göstərilib. Saytda çevriliş planına dair detallı məlumatlar yer alıb.
Parlament müxalifəti isə hesab edir ki, “çevriliş planını” hökumətin özü uydurub. Onlar bildirirlər ki, bu plan “hakimiyyətin öz qorxularının əksidir.”
Keçən həftə, iyunun 20-də müxalifət kütləvi həbslər və axtarışlarla bağlı bəyanat yaymışdı. Polis isə cavab olaraq bildirmişdi ki, “gücləndirilmiş xidmət rejimində profilaktik tədbirlər həyata keçirilir.”
Mövzu ilə bağlı məlum olan bütün təfərrüatlar və sosial şəbəkələrdə yayılan ictimai rəylər təqdim olunur.
- “Cənubi Qafqaz Ankaranın xarici siyasətində prioritetini itirir”: Yerevandan şərh
- Paşinyana impiçment proseduru: Ermənistanda müxalifətin bu prosesi başlada bilmək ehtimalı müzakirə olunur
- Kompromatla şantaj, yoxsa katolikos üçün “mesaj”? Paşinyanın sosial şəbəkə paylaşımları haqqında
Hakimiyyətə yaxın medianın planlaşdırılan çevrilişlə bağlı xəbəri
Civic.am saytı “Eksklüziv: müxalifətin çevriliş planı” adlı məqalə dərc edib. Bu, 7 səhifədən ibarət PDF sənədidir.
“Nüfuzlu mənbələrimiz müxalifət sıralarından bizə çevriliş planını təqdim etdilər. Bu sənəd addım-addım hərəkət planını, resursların və iştirakçıların siyahısını ehtiva edir”, – deyə nəşrdə bildirilir.
Sənədə əsasən, Nikol Paşinyanın hakimiyyətdən uzaqlaşdırılması planı 8 mərhələdən ibarət idi. Həlledici mərhələ, yəni Paşinyanın istefası tələbi ilə çıxışlar 20–21 sentyabr tarixlərində başlamalı idi. Bu mərhələ “Get ki, yaşaya bilək!” şüarı altında keçirilməli idi.
Məqalədə çevriliş planı ilə əlaqəli konkret adlar çəkilir. Bunlar sabiq prezidentlər Robert Koçaryan və Serj Sarqsyan, iş adamları Samvel Karapetyan, Qaqik Tsarukyan və Samvel Aleksanyandır.
Bu şəxslərdən biri, Rusiya və Ermənistan vətəndaşı olan iş adamı Samvel Karapetyan bir neçə gün əvvəl həbs edilib. O, hakimiyyətin zorla ələ keçirilməsinə çağırışda ittiham olunur.
Müxalifətin planında Koçaryan və Sarqsyanın fikir ayrılıqlarını aradan qaldırıb çevrilişi birlikdə dəstəkləmələri üçün razılaşdırılması vacib olduğu qeyd olunur.
Sənədin “İnsan resursları” adlı bölməsində belə məlumatlar yer alıb:
- Qaqik Tsarukyan – 15-20 min nəfər,
- Samvel Karapetyan – 5-8 min nəfər,
- Samvel Aleksanyan – 5 min nəfər.
Görünür, bu rəqəmlər siyahıya daxil edilmiş oliqarxların razılığı ilə plana cəlb olunmalı insan sayını göstərir. Bu bölmədə həmçinin Robert Koçaryan, Serj Sarqsyan, Daşnaksütyun partiyası, “Qazprom” və digər qurumlar qeyd olunur, lakin onların qarşısında say göstərilməyib.
«Ya öləcəyik, ya öldürəcəyik»: İstintaq Komitəsi audioyazılar yayımladı
İstintaq Komitəsi bir neçə audioyazı yayımlayıb. Həmin yazılarda hərəkata rəhbərlik edən şəxslər öz niyyətlərindən danışır, planlaşdırılan addımların detalları müzakirə olunur. Səsyazmalarda erməni xalqına qarşı təhqiredici ifadələr də yer alır:
“İnsanlarda o qığılcımı yandırmaq lazımdır ki, başa düşsünlər: yox, qardaş, biz də bu prosesin iştirakçısıyıq. Bunlar heyvan kimi millətdir, tamamilə heyvan kimi. Hər şeyin sahibi və yaradıcısı olmaq istəyirlər. Ona görə də deməliyik ki, bəli, qardaş, sən də bu prosesin həmtəsisçisisən.”
Başqa bir yazıda insanlara atəş açmaqdan danışılır:
“Biz onları inandırdıq, moizələr oxuduq. [Halbuki] iki nəfəri divara dirəyib güllələmək, daha 15 nəfəri də həbsə atmaq lazım idi. Vəssalam, məsələ bitdi. Hamısı yox olacaqdı. Sən onları güllələyirsən, sonra ailələrinə onların həyatı üçün kompensasiya verirsən, onlar da xoşbəxt olurlar.
İndi ən sərt məqamdan danışıram. Parlamenti mühasirəyə alırıq, o tərəf-bu tərəf. İmkan daxilində məsələləri həll etməyə gedirik: partlayışlar və sair. Və başlayırıq. Onları şikəst etmək, hər şeyi bitirmək lazımdır”.
Qrupun iştirakçılarından biri israr edir ki, küçələrə çıxmaq anı gəldikdə “məqsədə çatmaq” mütləq olmalıdır, çünki ikinci, üçüncü və ya dördüncü şans olmayacaq:
“Əziz Ruhani [Baqrat Qalstanyan] deyəndə ki, ‘Küçələrə çıxırıq’, məsələ bağlanacaq. Hər şey bitəcək, iş tamam olacaq. Ya öləcəyik, ya öldürəcəyik.”
“Mülki şəxslərin qətlə yetirilməsi də daxil olmaqla, terror aktları törətməyi planlaşdırırdılar”
Ədliyyə Komitəsinin bəyanatına əsasən, 2024-cü ilin yayında V.Q. (Vazgen Qalstanyan) “Müqəddəs Mübarizə” adlı bir hərəkat yaradıb. O, bir neçə ay ərzində hakimiyyəti ələ keçirmək məqsədilə mitinqlər və yürüşlər təşkil etmiş və keçirib. Daha sonra hərəkatın lideri siyasi xarakterli ictimai tədbirlərə son verib və “Müqəddəs Mübarizə” tərəfdarlarına fəaliyyət metodologiyasının dəyişdirildiyini bildirib. O, seçkilər yolu ilə hakimiyyətə gəlmək ehtimalını istisna etmişdi.
Komitənin məlumatına görə, müxalifət hərəkatı tərəfindən qəbul edilmiş yeni metodologiya belə olub: son məqsədə “mitinq məntiqi ilə deyil, uyğun zamanda kiçik zərbə qrupları vasitəsilə razılaşdırılmış zorakı hərəkətlərlə” nail olunmalıdır.
Bu məqsədin 24–36 saat ərzində həyata keçirilməsi planlaşdırılıb. Plana əsasən, hərəkat iştirakçıları eyni vaxtda Ermənistanın müxtəlif yaşayış məntəqələrində idarəolunmaz vəziyyətlər yaratmaq niyyətində olublar.
“Cinayətkar qrupun üzvləri hər biri 25 hərbi hazırlıqlı, əsasən keçmiş hərbçi və polis əməkdaşlarından ibarət olan 200–250 zərbə qrupu formalaşdırmaq qərarına gəliblər və onlara yerinə yetirilməsi üçün konkret tapşırıqlar verilib,” — deyə komitə bildirir.
Bundan əlavə, V.Q. hökumət binası qarşısında toplanmağa çağırış etməli və hakimiyyətin diqqətini yayındırmaq üçün kiçik bir mitinq təşkil etməli idi. Eyni vaxtda zərbə qrupları əvvəlcədən planlaşdırılmış ərazilərdə fəaliyyətə başlamalı idilər.
“Ermənistan Respublikasında hakimiyyəti ələ keçirmək məqsədinə nail olmaq üçün V.Q. və cinayətkar qrupun digər üzvləri terror aktları törətməyi planlaşdırıblar. Yəni, xüsusilə təhlükəli əməllər: dinc vətəndaşları qətlə yetirmək, insanların sağlamlığına ağır və ya orta dərəcəli xəsarət yetirmək, habelə külli miqdarda maddi ziyan vurmaq niyyətində olublar.”
Həmçinin aşağıdakı tədbirlərin həyata keçirilməsi planlaşdırılırdı:
- “nəqliyyat vasitələrinin əsas hərəkətini təmin edən iri və işlək küçə və prospektlərdə onlarla avtomobilin toqquşdurulmasını təşkil etmək,
- nəqliyyat vasitələrinə zərər vurmaq və ya onları yandırmaqla respublika üzrə nəqliyyat hərəkətini iflic etmək,
- minlərlə alışdırıcı qurğudan istifadə etməklə partlayışlar təşkil etmək və onlarla binaların divarlarını atəşə tutmaq,
- elektrik və internet kabellərinə, həmçinin onların enerji təminatını həyata keçirən digər avadanlıqlara sözügedən alışdırıcı qurğularla zərər vermək və ya onları məhv etmək, bununla da genişmiqyaslı elektrik və internet kəsintilərinə səbəb olmaq,
- kəsişmələrdə yerləşən işıqforları və troleybus xətlərinin enerji təchizatını sıradan çıxarmaq,
- kommunal xidmət obyektlərini yandırmaqla onları məhv etmək və əhalini qorxutmaqla idarəolunmaz vəziyyət yaratmaq.”
Komitənin verdiyi məlumata görə, cinayətkar qrupun üzvləri dövlət orqanlarının vəziyyəti nəzarət altına almasının qarşısını almağa yönəlmiş tədbirlər planlaşdırıblar. Onlar daxili qoşunların yerləşdiyi əraziləri müxtəlif üsullarla bloklamaqla polis qüvvələrinin hərəkətinə mane olmaq və ya tamamilə imkan verməmək niyyətində olublar. Bundan əlavə, onlar hökumət və digər dövlət qurumlarının veb-saytlarını, eləcə də elektron idarəetmə sistemlərini haker hücumları ilə iflic vəziyyətinə salmağı planlaşdırıblar.
Məlumdur ki, bu cinayət əməllərinin həyata keçirilməsi üçün 2025-ci ilin yanvar ayından etibarən 1000-dən çox şəxs cəlb olunub.
Dövlət çevrilişi planını həyata keçirmək məqsədilə minlərlə alışdırıcı qurğu, həmçinin nəqliyyat vasitələrinin təkərlərini sıradan çıxarmaq üçün iti metal hissələr əldə edilib.
“Başlanmış cinayət işi çərçivəsində təcili istintaq və digər prosessual hərəkətlər aparılır,” — deyə İstintaq Komitəsi bildirir.
Sosial şəbəkələrdən şərhlər
“Əgər bütün bunlardan sonra onları qanun çərçivəsində cəzalandırmasalar, erməni xalqı mütləq onları cəzalandıracaq. Əslində, Ermənistandakı rus agentlərinin ən böyük yuvası təəssüf ki, ERMƏNİ KİLSƏSİDİR.”
“Dövlətə qarşı olan bu murdar ünsürləri həbs edin, onları qəfəslərə salın, cəmiyyətdən ömürlük təcrid edin, hörmətli Nikol Paşinyan.”
“Bütün bunları Allahşükür Paşazadə də eşitsin [Azərbaycanlı din xadimi, Qafqaz Müsəlmanları İdarəsinin başçısı]. O, indi Bakıda oturub bunların hamısını izləyir. Və könlü xoş olur. O, asta səslə erməni kilsəsinin təhlükə mənbəyi olduğunu deyən kimi, bizim baş nazir dərhal tədbir gördü.”
“Onlar [cinayətkar qrupa] bağışlana bilməz. Heç bir ev dustaqlığı ola bilməz, dərhal həbs edin!”
“Mən Ermənistan hakimiyyətini tam dəstəkləyirəm. Terrorçular sərt şəkildə cəzalandırılmalıdır.”
Ermənistanda dövlət çevrilişi
