Ermənistan prezidenti və ABŞ-ın Ermənistandakı səfiri birlikdə ərik ağacı əkiblər

Amerika Birləşmiş Ştatlarının Müstəqillik Günü münasibətilə Ermənistan prezidenti bu gün bu ölkənin səfirliyini ziyarət edib. Serj Sarqsyan səfir Riçard Millsi və səfirlik əməkdaşlarını təbrik edib.

Dost münasibətlərin rəmzi olaraq prezident Sarqsyan və səfir Mills birlikdə səfirlik ərazisində ərik ağacı əkiblər.

Riçard Mills ziyarətə və təbrikə görə Serj Sarqsyana təşəkkürünü bildirib və qeyd edib ki, ölkə müstəqilliyinin 241-ci ildönümü və Ermənistan-Amerika diplomatik münasibətlərinin 25 illiyi münasibətilə ABŞ səfirliyinin həyətində Ermənistan prezidenti ilə birlikdə ərik ağacı əkməkdən məmnun və qürurludur.

Serj Sarqsyan bildirib ki, ABŞ və Ermənistan arasında diplomatik münasibətlər qurulan ilk gündən bəri yaranan sıx əməkdaşlığı yüksək dəyərləndirir və o, “sürətlə dəyişən, meydan oxuyan bir dünyada” Birləşmiş Ştatlarla dialoqun vacibliyini qeyd edib.

Serj Sarqsyan həmçinin ABŞ prezidenti Donald Trampa da öz təbriklərini göndərib.