Ermənistan prezidenti Avropa İttifaqı ilə əməkdaşlıq haqda sazişi imzalamamaq üçün heç bir səbəb görmür
Ermənistan Avropa İttifaqı ilə Hərtərəfli və genişlənmiş tərəfdaşlıq haqda saziş imzalayacaq. “Bu sənədi imzalamamaq üçün heç bir səbəbimiz yoxdu”, – Ermənistan prezidenti Serj Sarqsyan “Baze” ümum Ermənistan gənclər yığıncağının iştirakçıları ilə görüşdə bildirib.
O qeyd edib ki, sənəd əvvəlcədən elan olunduğu kimi payızda imzalanacaq: “Niyə belə əminliklə danışıram? Çünki sənəd artıq paraflanıb. Səhv etmirəmsə, martda bildirmişdik ki, sənəd ümumilikdə razılaşdırılıb, daha sonra isə paraflandı”.
Ekspertlərin və siyasətçilərin bir qismi bu prosesə şübhə ilə yanaşır və qeyd edirlər ki, Ermənistan 2013-cü ildəki hadisələri təkrarlaya, Rusiyanın təzyiqi altında son anda sənədi imzalamaqdan imtina edə bilər.
Dörd il əvvəl sentyabrın 3-də Serj Sarqsyan bəyan etdi ki, Ermənistan Avropa İttifaqı ilə Assosiasiya və azad, hərtərəfli ticarət zonasının yaradılması haqda sazişi imzalamaqdan imtina edir. Avrasiya İqtisadi İttifaqının formalaşdırılmasında iştirak etmək məqsədilə Gömrük Birliyinə inteqrasiya yolu ilə getmək niyyətindədir. 2015-ci ildə Ermənistan artıq AAİİ-ə daxil oldu.
Avrasiya İqtisadi İttifaqı Rusiyanın liderliyi altında 2015-0ci ildə yaradılıb. Bu gün bu quruma Rusiya ilə yanaşı daha dörd ölkə daxildir: Ermənistan, Belarus, Qazaxıstan və Qırğızıstan. İttifaq regional iqtisadi inteqrasiyanı təmin etmək məqsədini açıqlayıb. İttifaqa üzv ölkələrin ərazisində mal, xidmət, kapital və işçi qüvvəsinin azad hərəkəti təmin edilir. İttifaqa daxil olan dövlətlər həmçinin daxili iqtisadi siyasətlərini də bir-biri ilə koordinasiya etmək öhdəliyini üzərlərinə götürürlər.
Bu hadisələri şərh edərkən Serj Sarqsyan bildirib ki, bəzilərinin, xüsusən də xarici KİV-in Ermənistanın Avrasiya İqtisadi İttifaqına daxil olmaq qərarını “bir gecədə qəbul olunmuş” qərar kimi təqdim etmək cəhdi əsassız və gülüncdür.
“Biz Avrasiya İqtisadi İttifaqı ilə də danışıqlar aparırdıq, Avropa İttifaqı ilə də, çünki lap əvvəldən hər iki tərəf bildirirdi ki, biri digərinə maneə deyil. Amma sonradan Avropa İttifaqında bunun onlara mane olduğunu bildirəndə, biz daha neyləyə bilərdik?” – prezident Sarqsyan izah edib.
