Ermənistan PPX alayının binasını ələ keçirmiş dəstəyə yemək çatdıran Artur Sarqsyanın ölüm xəbərindən sonra Yerevanda etiraz aksiyaları başlayıb
Martın 16-da 15.40-da “Ats berox” [çörək gətirən] Artur Sarqsyan “Ermənistan” tibb mərkəzində “ürək-ciyər yetməzliyindən” dünyasını dəyişib. Səhiyyə Nazirliyinin mətbuat katibi Anait Haytayanın sözlərinə görə, Sarqsyan martın 15-də xəstəxanaya yerləşdirilib və eyni gecə təcili əməliyyat edilib. Həkimlərin səyinə baxmayaraq onu xilas etmək mümkün olmayıb.
Bu xəbər Ermənistan əhalisini çalxalayıb: insanlar Yerevanın mərkəzinə – Azadlıq Meydanına toplaşıb, Maştotsa prospektini kəsərək hərəkəti dayandırıblar, daha sonra Ədliyyə Nazirliyi istiqamətində yürüşə başlayıblar.
2016-cı il iyulun 17-də silahlı dəstə Ermənistan Polisinin Post Patrul Xidməti alayının ərazisini ələ keçirib, bundan təqribən bir ay önsə saxlanılmış müxalifətçi Jirayr Sefilyanın azad edilməsini və prezident Sarqsyanın istefasını tələb edib.
İyulun 26-da Artur Sarqsyan şəxsi avtomobilində polis kordonunu yararaq dəstə üzvlərinə ərzaq gətirib. KİV-in “çörək gətirən” adlandırdığı Artur Sarqsyanı PPX alayının ərazisinə soxulmaqda, “bu alayın inzibati binasının və ətraf ərazilərin ələ keçirilməsi və saxlanmasında” ittiham ediblər.
Fevralın 9-a qədər Artur Sarqsyan ölkəni tərk etməmək haqda iltizam imzalayaraq azad edilmişdi. Amma fevralın 9-da məhkəmə qətimkan tədbirini dəyişdirərək 2 ay müddətinə həbs edilməsi haqda qərar verib və bunu müttəhimin Ermənistan CM-nin 131-ci maddəsini (ölkəni tərk etməmək haqda iltizamın şərtlərini pozmaq) pozması ilə əsaslandırıb. Buna cavab olaraq Artur Sarqsyan aclıq elan edib, aclıq aksiyası 23 gün davam edib və onun səhhətinə ciddi ziyan vurub.
Etiraz aksiyasının günü – martın 16-ı – əvvəlcədən təyin edilmiş və başqa tələbləri vardı. Artur Sarqsyan da bu aksiyada iştirak etmək niyyətində idi. Nümayişçilər Rusiyanın Yerevandakı səfirliyinə doğru yürüş etməli, aprelin 2-də [2016-cı ilin bu günündə Dağlıq Qarabağ və Azərbaycan arasında “dördgünlük müharibə” başlayıb] səfirliyin qarşısındakı Rusiya bayrağının endirilməsi tələbi ilə imza toplanmalı idi. Aksiya təşkilatçıları öz tələblərinin anlamını onunla izah edirdilər ki, aprel müharibəsi zamanı erməni əsgərləri məhz Rusiyanın Azərbaycana satdığı silahlarla öldürülüb.
“Çörək gətirənin” ölümü ilkin ssenarini dəyişib. Yürüş zamanı iştirakçılar “Artur, Artur!” və “Çörək gətirəni öldürdülər” şüarlarını səsləndiriblər. Onları polis əməkdaşları müşayiət edib.
Polis rəisinin müavini Osipyan zaman-zaman fəalları evlərinə dağılışmağa, tərəflər arasında qarşıdurma yaratmamağa çağırıb.
Aksiya təşkilatçıları cavab veriblər ki, qarşıdurma yaratmaq istəmirlər, polislə bir işləri yoxdur, onların məqsədi Ədliyyə Nazirliyinə yaxınlaşıb, ora qara lentlə birlikdə çörək qoymaqdır.
Nümayişçilər həmçinin “Çörək gətirənin” ölümündə günahlandırdıqları Səhiyyə və Ədliyyə nazirlərinin istefasını da tələb ediblər.
Polis aksiya iştirakçılarını nazirliyin ətraf ərazisini tərk etmələri üçün uzun müddət dilə tutub. Sonunda aksiya təşkilatçıları martın 17-də etirazlarını davam etdirmək şərtilə güzəştə gediblər.
