Hələlik Ermənistanın baş naziri vəzifəsinə yeganə namizəd Paşinyandır

21:55, 28 aprel

Ermənistan Milli Məclisinin ikinci ən böyük fraksiyası olan “Sarukyan” fraksiyası da baş nazir vəzifəsinə öz namizədini irəli sürməyəcək.

“Bütün komandamızla xalqın namizədinə səs verəcəyik. Biz öz namizədimizi irəli sürməyəcəyik. Xalq kimi irəli sürsə, biz də onu dəstəkləyəcəyik”, – “Sarukyan” fraksiyasının rəhbəri Qaqik Sarukyan bəyan edib.

19:40, 28 aprel

Ermənistan Respublikaçılar Partiyası baş nazir vəzifəsinə öz namizədini irəli sürməmək qərarı alıb. Bu haqda mətbuata partiyanın mətbuat katibi, Ermənistan Milli Məclisinin vitse-spikeri Eduard Şarmazanov məlumat verib.

Şarmazanov qeyd edib ki, hələlik ERP deputatlarının 1 may seçkisində kimə səs verəcəklərini deyə bilməyəcək.

“Kimə səs verəcəyimiz kimin hansı proqramı təqdim edəcəyindən asılı olacaq”, – Eduard Şarmazanov bildirib.

Bir neçə saat əvvəl

Ermənistanın hakimiyyətə qarşı mübarizə aparan etiraz hərəkatının lideri, deputat Nikol Paşinyan bu gün region sakinləri ilə görüşlərini davam etdirib. Onu hərəkat tərəfdarlarından ibarət avtomobil kolonu müşayiət edib.
İnsanlar hərəkatın avtomobillərini plakat və bayraqlarla qarşılayıb. Kəndlərdən birində Yerevandan etiraz hərəkatının avtomobil kolonunun gəlişindən ruhlanan sakinlər hətta quzu kəsib, qonaqlar üçün bişirmək də istəyiblər, amma Paşinyan onlara icazə verməyib.

Bütün regionlarda müxalif deputat insanları yerevanlılara qoşulub, paytaxt küçələrinə çıxmağa, mayın 1-də, baş nazir seçkisi günü və bir gün əvvəldən Yerevanda hərəkəti yenidən iflic etməyə çağırıb.

“Bu qələbəni sizlərdən hər biri yaradıb. Ermənistanda artıq xalq hakimiyyəti bərqərar olub və bundan sonra başqa cür olmayacaq. Baş nazir, hökumət və digər rəsmi şəxslər xalqa xidmət etməlidir. Kim xalqa xidmət etmək istəmirsə, vəzifədən getməlidir”, – Paşinyan bəyan edib.

Buna qədər rəsmi məlumatlara əsasən, prezident Armen Sarqsyanla istefaya getmiş baş nazir Serj Sarqsyan və müvəqqəti olaraq baş nazir səlahiyyətlərini həyata keçirən Karen Karapetyan arasında görüş baş tutub.

Hakim Respublikaçılar Partiyası baş nazir seçimi ilə bağlı hələlik öz mövqeyini açıqlamayıb. Bəzi ERP nümayəndələri elan ediblər ki, “xalq” namizədi Nikol Paşinyanın lehinə səs verməyi istisna edirlər. Eyni zamanda itaətsizlik hərəkatının təmsilçiləri bildiriblər ki, hazırkı hakimiyyətə qarşı mübarizəyə öndərlik edən Nikol Paşinyandan başqa baş nazir ola bilməz.

Və artıq iqtidar partiyası sıralarında yaranmış vəziyyətdə ERP-nın baş nazir vəzifəsinə öz namizədini irəli sürməməli olduğunu düşünənlər də var.

ERP deputatı Karen Karapetyan deyib: “Məncə, yaranmış vəziyyətdə ERP-nın öz namizədini irəli sürməsi doğru olmaz. Yeni şəraitdə ERP səmərəli şəkildə idarə edə bilməz. ERP neçə ildir idarə edir və hazırkı ictimai etiraz məhz bunun nəticəsidir”.

Digər respublikaçı Samvel Farmanyan hesab edir ki, onun və həmkarlarının Nikol Paşinyana səs verməsi üçün o, inandırıcı səbəblər göstərməlidir: “Bizim fraksiyanın nümayəndələri ilə görüşə gəlin və öz üslubunuzda, sakit tonla izah edin ki, biz nə üçün Sizə səs verməliyik, həmkarlarınızın suallarını cavablandırın”.