Ermənistan: 26 yeni koronavirusa yoluxma halı, ümumilikdə 78 nəfər oldu. Fövqəladə vəziyyətin ilk günü

Ermənistanda koronavirusun qarşısının alınması üçün martın 16-ı axşam saatlarında elan olunan fövqəladə vəziyyət rejiminin ilk günü idi.

Martın 17-i günün sonuna doğru 26 yeni yoluxma halı təsdiqlənib. Bununla da xəstələlərin sayı 78 nəfərə çatıb, pasiyentlərdən biri sağalıb və xəstəxanadan evə buraxılıb.

Martın 17-də virusun aşkarlandığı insanların böyük hissəsi artıq karantin altında olub. Bunlar daha əvvəl yoluxmuş şəxslərlə ünsiyyətdə olan insanlardır.

Ermənistanda yeni məhdudiyyətlər qüvvəyə minib. Məsələn, martın 17-dən sakinlərinin Ermənistana girişi qadağan olunmuş ölkələrin siyahısı elan edilib.

• Ermənistanda koronavirusa görə fövqəladə vəziyyət elan olunub

· Koronavirus: pandemiya elan edilib. Bu nə deməkdir və nə gözləmək lazımdır?

· Qafqazda koronavirus epidemiyası: region üzrə faktlar və rəqəmlər

 Eçmiadzin şəhərində əlavə məhdudiyyətlər

Ən ağır vəziyyət Yerevanın 20 kilometrliyində yerləşən Eçmiadzin şəhərindədir, yoluxanların əksəriyyəti məhz buradandır.

Yeni yoluxanlar arasında Eçmiadzində ilk yoluxan şəxslə təmasda olan insanlar var. Söhbət İtaliya səfərindən qayıdan və özünütəcrid rejiminə qapanmadan kütləvi tədbirlərə qatılan qadından gedir.

Buna görə də şəhər tamam təcrid olunub.

Eçmiadzinin 27 giriş-çıxışı var, amma hökumətin qərarı ilə insanlar ancaq bunların üçündən yararlana bilir. Girişdə həkimlər gəlib-gedənlərin temperaturunu ölçür, hərarəti yüksək olanları ya xəstəxanaya, ya da evdə özünütəcrid rejiminə göndərirlər.

Qapalı girişlər polislər tərəfindən qorunur.

 Ermənistana girişin bağlanması haqda

Epidemioloji vəziyyətin xüsusilə ağır olduğu və buna görə də sakinlərinin Ermənistana girişinin qadağan olduğu 16 ölkənin siyahısı açıqlanıb.

Bunlar Çin, İran, Cənubi Koreya, Yaponiya, İtaliya, İspaniya, Fransa, Almaniya, İsveçrə, Danimarka, Avstriya, Belçika, Norveç, İsveç, Niderland, Böyük Britaniyadır.

Bu ölkələrdən qayıdan Ermənistan vətəndaşları 14 günlük karantin müddətini keçməlidir.

Məhdudiyyətlər yükdaşımalara şamil edilmir.

 Medianın işi haqda

Fövqəladə hal rejimində Ermənistan hökuməti informasiya yayımında məhdudiyyətlər elan edib – həm media, həm də sosial şəbəkələrdə. Hakimiyyət izah edib ki, bu yolla onlar təşvişin və koronavirusdan əziyyət çəkənlərin ünvanına aqressiv çıxışların qarşısını almağa çalışırlar. Bu tələbin pozulmasına görə inzibati məsuliyyət nəzərdə tutulub.

Ermənistanda koronavirus haqda istənilən məlumat rəsmi mənbələrə, yəni komendantın ofisinə əsaslanmalıdır.

Martın 17-də jurnalistləri informasiya ilə həmçinin səhiyyə naziri və onun mətbuat katibi də təmin edib.

“Xəstələrin adını dərc etmək olmaz. Hətta normal şərtlərdə də insanların şəxsi məlumatları açıqlanmamalıdır, indi bunu xüsusilə etmək olmaz”, – martın 17-də ədliyyə naziri Vahe Danielyan bildirib.

Spirt satışı haqda

Ermənistanda spirt bahalaşıb, amma koronavirusa görə yox – Ermənistanın baş naziri Nikol Paşinyan martın 17-də Facebook səhifəsində yazıb:

“Spirtin qiymətinin bahalaşması vergi məcəlləsindəki dəyişikliklə bağlıdır, spirtin “minimum qiyməti” anlayışı dəyişib, qiymətlərin qalxması da yalnız bununla əlaqədardır”.

Hakimiyyət bildirir ki, mal qıtlığı yoxdur

İqtisadi rəqabətin müdafiəsi üzrə Dövlət Komitəsinin sədri Geqam Gevorqyan insanları təlaş içində həddən artıq alış-veriş etməmməyə çağırıb. O, rəsmi şəkildə bildirib ki, Ermənistanda ərzaq və mal qıtlığı və onların alınmasında heç bir məhdudiyyət yoxdur:

“Yeganə problem hər gün mağazalarda malların olmasını təmin etməkdir, çünki gün ərzində həddən artıq böyük həcmdə alış-veriş edilir, hətta bsurd dərəcəsində. Bu məqamda sadəcə anbarlardan malları mağazalara çatdırmaq lazımdır.

Ola bilər ki, müəyyən məqamda ajiotaj üzündən piştaxtalar boşaldılır, amma sonra yenidən dolur, hətta gec saatlarda da problem yoxdur – mağaza piştaxtaları doludur”.

İri supermarket şəbəkələrinin mal dövriyyəsi 30-40 faiz yüksəlib, xırda mağazaların dövriyyəsi isə əksinə, azalıb.

“Xırda və orta biznesi unutmamağa çağırıram. Başa düşürəm ki, supermarketlərdən almaq daha rahatdır, amma bu gün kiçik mağazalarda toplanmış böyük həcmdə ərzaq var”, – baş nazir deyib.

5000 yeni koronavirus testi

Həftə sonuna qədər Ermənistan yeni beş min koronavirus testi alacaq.

“İndi bu qədəri yetərlidir, amma biz yeni testlərin alınması üzərində də işləyirik, mütəmadi olaraq xarici tərəfdaşlarla qarşılıqlı fəaliyyət içindəyik”, – səhiyyə nazirinin müavini Lena Nanuşyan bəyan edib.