“Xalq tələb etmir”: Ermənistan hakimiyyəti növbədənkənar seçkidən imtina edib

Ermənistan parlamentinin iqtidar fraksiyası “Mənim addımım” növbədənkənar seçkilərdən imtina edib, baxmayaraq ki, baş nazir Nikol Paşinyanın özü ötən ilin sonunda ölkənin siyasi qüvvələrinə 2021-ci ildə seçkilərin keçirilməsi ilə bağlı əsləhətləşmələrə başlamağı təklif etmişdi.

Fraksiyanın qərarı onunla əsaslandırılıb ki, “baş nazirin növbədənkənar seçkilərin keçirilməsi ilə bağlı təklifi parlament müxalifəti tərəfindən müsbət reaksiya ilə qarşılanmayıb, cəmiyyətin geniş təbəqələrinin növbədənkənar seçkilərin keçirilməsi ilə bağlı tələbi yoxdur”.

Hakimiyyətin seçki keçirilməsi ilə bağlı təklifi isə özlüyündə Qarabağda hərbi əməliyyatlar dayanandan dərhal sonra ölkənin daxili siyasətində başlayan böhranı həll etmək cəhdi olub.

2020-ci ilin noyabrında Paşinyanın Azərbaycan və Rusiya prezidentiləri ilə birlikdə atəşkəs haqda üçtərəfli razılaşmanı imzalamasını Ermənistan müxalifəti tərəfindən xəyanətkar sövdələşmə və ərazilərin könüllü şəkildə təhvil verilməsi kimi qəbul olundu. Bununla əlaqədar olaraq Nikol Paşinyanın rəhbərliyi altında hökumətin istefası tələbilə etiraz aksiyaları başlayıb.

“Mənim addımım” parlament fraksiyasının bəyanatında həmçinin deyilir ki, fraksiya “2020-ci il 18 noyabrda təqdim olunan yol xəritəsinin reallaşdırılmasında baş naziri və hökuməti dəstəkləməyə davam edir”. Söhbət Paşinyanın müharibədən sonra onun istefası tələbinə cavab olaraq Nazirlər Kabineti və onun fəaliyyətində islahatların keçirilməsi ilə bağlı təqdim etdiyi plandan gedir.

• Ermənistan iqtisadi durğunluq həddində: 2021-ci ildə ölkədə nələr gözləməli
• Kommunikasiyaların açılması: Ermənistan üçün yeni imkanlar, yoxsa təhlükəsizliyin təhdidi?

Müxalifətin planı

Müxalifətin planı üç maddədən ibarətdir: hökumətin istefası, müvəqqəti hökumətin təşkili və ancaq bundan sonra növbədənkənar seçkilərin keçirilməsi.

Birləşmiş ondan çox müxalifət partiyası ötən ilin sonundan müvəqqəti hökumətin baş naziri vəzifəsində vahid namizəd irəli sürüb, hansı ki, daha sonra növbədənkənar parlament seçkilərinin keçirilməsini təmin edəcək.

Müvəqqəti hökumətin rəhbəri vəzifəsinə müxalif “Vətənin Xilası Naminə Hərəkat” Ermənistanın keçmiş baş naziri və müdafiə naziri Vazgen Manukyanın namizədliyini irəli sürüb.

Müxalifətçilər hökumət istefa vermədən seçki keçirilməsinə etiraz edirlər, çünki onların fikrincə, hakimiyyət seçkilərin nəticələrini saxtalaşdıra və öz qələbəsini təmin edə bilər.

Müxalifətin hakimiyyətin bəyanatına reaksiyası

EİF “Daşnaksütun” partiyasının Ali Orqanının nümayəndəsi İşxan Saqatelyanın fikrincə, iqtidar bloku üç səbəb üzündən seçki keçirməkdən imtina edib:

“Birincisi ondan ibarətdir ki, baş nazir stulunda qalan şəxs nlayıb: onun seçki yolu ilə seçilmək şansı yoxdur. Bu sadəcə mümkün deyil”.

Saqatelyanın fikrincə, ikinci səbəb odur ki, seçki baş nazirin öz komandasında ciddi problemlərə gətirib çıxaracaq, çünki onlar “mandatlarını geri dönüşü olmadan itirmək təhlükəsini dərk ediblər”.

Müxalifətin irəli sürdüyü üçüncü səbəb hakimiyyətin vəziyyəti yanlış dəyərləndirməsindən ibarətdir. Etiraz hərəkatının zəiflədiyini zənn edən hakimiyyət ümid edir ki, “cəmiyyətin diqqətini yalan gündəmlə yayındıracaq”.

Saqatelyanın özünün fikrincə, indi küçələrə daha çox insan çıxacaq, hazırkı hakimiyyətdən seçki yolu ilə qurtulmaq istəyənlər də etirazlara qoşulacaq.

İqtidar blokunun bəyanatını müxalif “Çiçəklənən Ermənistan” partiyasından olan deputat Naira Zohrabyan da şərh edib:

“Mən belə də düşünürdüm ki, Nikol Paşinyan növbədənkənar seçkilərə getməyəcək. O, “Çiçəklənən Ermənistanın” lideri Qaqik Sarukyanla və “Maariflənmiş Ermənistanın” lideri Edmon Marukyanla dəqiq raılığa gələ bilsəydi, hansı ki, nə “Çiçəklənən Ermənistan”, nə də “Maariflənmiş Ermənistanın” [parlamentdə təmsil olunan iki müxalifət partiyası] onun istefasından sonra baş nazir postuna öz namizədlərini irəli sürməyəcəkləri haqda birgə memorandumda ifadə oluncaqdı, o zaman bu addımı ata bilərdi”.

Zohrabyanın fikrincə, Paşinyanın təklifi rədd edilib, “Çiçəklənən Ermənistan” heç bir halda “Nikolun hökuməti ilə heç bir razılaşmaya getməyəcək”.

“Maariflənmiş Ermənistan” partiyasının lideri Edmon Marukyan əmindir ki, tezliklə hakimiyyət seçki keçirmək ideyasına qayıdacaq. O hesab edir ki, iqtidar fraksiyasının bəyanatına ciddi yanaşmaq lazım deyil. Siyasətçi əmindir ki, növbədənkənar seçkilər mütləq baş tutacaq.

Onun sözlərinə görə, baş nazirin istefası tələbi müxalifətin gündəmində qalır, hakimiyyətin bəyanatı isə ölkə sakinlərinin diqqətini müharibədən sonrakı dövrdə yaranan problemlərdən yayınndırmaq cəhdidir.