Azərbaycanlı vəkil və erməni jurnalist cəsarətli qadın beynəlxalq mükafatına layiq görülüblər
Azərbaycanlı vəkil Şəhla Hümbətova və erməni jurnalist Lüsi Koçaryan Cəsarətli qadınlar beynəlxalq mükafatının (International Women of Courage Award) 12 laureatının arasındadırlar. ABŞ dövlət katibinin bu mükafatı 2007-ci ildən başlayaraq hər il sülh, ədalət, insan haqları, gender bərabərliyi və qadınların hüquq və imkanlarının genişləndirilməsi uğrunda mübarizədə cəsarət və liderlik nümayiş etdirmiş bütün dünyadan olan qadınlara təqdim olunur.
Şəhla Hümbətova – azsaylı azərbaycanlı vəkillərdəndir ki, baxışlarına və hüquq və azadlıqlara riayət olunmasını tələb etdiklərinə görə dövlət tərəfindən izlənən hüquq müdafiəçilərini, jurnalistləri, blogerləri, fəalları, müxalifətçiləri və LGBT cəmiyyətinin nümayəndələrini müdafiə edir. Bununla birlikdə, Hümbətova özü də fəaliyyətinə görə mütəmadi olaraq təhdidlərlə və təzyiqlərlə qarşılaşır.
Lüsi Koçaryan psixi xəstəlikləri olan uşaqların hüquqları uğrunda və qadın və uşaqlar barəsində zorakılığa qarşı mübarizə aparır. O da kəskin tənqidlə və məhkəmə iddiaları təhdidi ilə üz-üzə qalır. Təşkilatçılar Ermənistanda məişət və seksual zorakılıq mövzusunu qaldırmış və bu sahədə ciddi tədbirlərin görülməsini tələb etmiş Koçaryanın səylərini və cəsarətini nəzərə alıblar.
Mükafatın təqdim olunması martın 4-də yerli vaxtla saat 10:00-da Vaşinqtonda keçiriləcək. “Amerikanın səsi”nin məlumatına görə, mükafatları ABŞ dövlət katibi Mayk Pompeo təqdim edəcək.
• Qadınlar nə uğrunda mübarizə aparırlar? Feminizmin əlifbası
