Elmar Məmmədyarov vəzifəsindən azad edilib

Prezident İlham Əliyev Elmar Məmmədyarovu Azərbaycan Respublikasının xarici işlər naziri vəzifəsindən azad edib. Digər sərəncamla buna qədər təhsil naziri olan Ceyhun Bayramov onun yerinə təyin edilib.

Yerli jurnalistlər və ekspertlər bu gedişatı gözlənilməz adlandırıblar.

“Bir gün belə diplomatik işdə işləməmiş insan xarici siyasəti necə həyata keçirəcək?”, – “Turan” informasiya agentliyi sual edir.

Ötən gün, iyulun 15-də Nazirlər Kabinetinin iclasında prezident İlham Əliyev xarici işlər naziri Elmar Məmmədyarovu sərt tənqid edib. Məmmədyarovun özü iclasda iştirak etməyib.

Prezident ayın 12-də Ermənistanla Azərbaycan arasında baş verən döyüş zamanı hamının iş başında olduğunu, xarici işlər nazirinin isə yerində olmadığını bildirib.

“… Ayın 12-də hadisələr baş verəndən sonra biz iş yerindəydik… Mən Xarici İşlər nazirini tapa bilmədim. Mən Əli Əsədovdan soruşdum, haradadır. Sənə nə dedi?”

Baş nazir Əli Əsədov cavabında bildirib ki, Elmar Məmmədyarov evdən işləyir: “Cənab Prezident, soruşdum, dedi ki, mən evdən işləyirəm”.

Bu məsələ ilə bağlı Elmar Məmmədyarova zəng vuran jurnalistə nazir telefonda bunları deyib: “Əşi, sən Allah, bəsdir. Soruşmağa mövzu yoxdur? Bu nə sualdır axı? Həm də bu saatda adama sual verərlər? Sabah Leyla Abdullayevaya zəng et, cavablandırsın”.

Elmar Məmmədyarov 2004-cü ildən Azərbaycan Respublikasının xarici işlər naziri vəzifəsində idi.

İyulun 3-də Dövlət Təhlükəsizlik Xidmətinin Xarici İşlər Nazirliyinin binasında həyata keçirdiyi xüsusi əməliyyat zamanı korrupsiya faktı ilə bağlı nazirliyin üç əməkdaşı saxlanılıb.

XİN Tender Komissiyasının sədri Fərhad Mollazadə, İşlər İdarəsinin Təşərrüfat Şöbəsinin müdiri Səlim Əlizadə və Konsulluq İdarəsinin Konsulluq-Hüquq Şöbəsinin rəisi Nurupaşa Abdullayev rəsmi məlumata əsasən rüşvət alma ittihamı ilə həbs ediliblər.