Daha bir jurnalist qaçaqmalçılıq ittihamı ilə həbs edilib
Azərbaycanda siyasi həbslər
Azərbaycanda daha bir jurnalist – “Kanal 13” internet televiziyası ilə əməkdaşlıq edən Şamo Eminov həbs edilib. O, həmin redaksiyadan həbs edilən üçüncü jurnalistdir. Kanalın aparıcısı dekabrın əvvəlində inzibati qaydada həbs edilib. Noyabrda qanunsuz tikintidə ittiham olunaraq həbs edilən kanal rəhbəri isə hazırda qaçaqmalçılıqda ittiham olunur.
- Cənubi Qafqazdakı regional konfiqurasiyada mümkün dəyişikliklər. Bakıdan baxış
- Azərbaycanda yeni siyasi platformanın həmtəsisçisi həbs edilib
- Gürcüstanda romalar. Ölkədə ən marginal qrup necə yaşayır?
Məlum olub ki, “Kanal 13” YouTube kanalı ilə əməkdaşlıq edən jurnalist Şamo Eminov Azərbaycan Cinayət Məcəlləsinin 206.3.2-ci (qaçaqmalçılıq – qabaqcadan əlbir olan bir qrup şəxs tərəfindən törədildikdə) maddəsi ilə 3 ay 5 gün müddətinə həbs edilib.
Eminovun həyat yoldaşı Dürdanə Eminova bildirib ki, o, dekabrın 22-də saxlanılıb. Həmin gün axşam saatlarında onların evində axtarış aparılıb.
“Dekabrın 22-də səhər Şamo müsahibəyə getmək üçün evdən çıxdı. Daha sonra mən də evdən çıxıb qızıma baş çəkməyə getdim. Axşam mənə polisdən zəng etdilər ki, yoldaşım oradadır və diplomunu gətirməyimi istədilər. Diplomu götürmək üçün evə qayıdanda gördüm ki, mənzildə hər şey səpələnib, yoldaşımın noutbuku yoxdur. Məlum oldu ki, evdə axtarış aparılıb”, – deyə Eminova bildirib.
O, həmçinin deyib ki, beş gün müddətində ərinin taleyinə aydınlıq gətirə bilməyib. Onun sözlərinə görə, yalnız dekabrın 26-da Eminov 2-3 dəqiqəlik zəng edərək “qaçaqmalçılıq”da ittiham olunduğunu və məhkəmənin onun barəsində 3 ay 5 gün müddətinə həbs qətimkan tədbiri seçdiyini bildirib.
“Lakin o, heç bir cinayət törətməyib, heç bir günahı yoxdur”, – jurnalistin həyat yoldaşı qeyd edib.
Bir ay əvvəl “Kanal-13”ün rəhbəri Əziz Orucov həbs edilib. O, əvvəlcə “qanunsuz ev tikməkdə”, sonra isə “bir qrup şəxslə əvvəlcədən əlbir olaraq külli miqdarda qaçaqmalçılıqda” ittiham olunub.
Əziz Orucovun mühacirətdə olan qardaşı, “Kanal-13”ün direktoru Anar Orucovun sözlərinə görə, kanalın aparıcısı, inzibati həbsdə olan Rüfət Muradlı da Əziz Orucovun işi üzrə cinayət məsuliyyətinə cəlb olunub və dindirilib.
Rüfət Muradlı dekabrın 2-də İnzibati Xətalar Məcəlləsinin 535.1-ci (polisin qanuni tələblərinə tabe olmama) maddəsi ilə 30 sutka müddətinə həbs edilib.
Lakin Rüfət Muradlının vəkili Nazim Musayev bildirib ki, müvəkkilinin cinayət təqibi ilə bağlı məlumatı yoxdur. Vəkilin sözlərinə görə, o, dünən təcridxanada Muradlı ilə görüşüb və jurnalist də ona qarşı hər hansı cinayət ittihamı irəli sürülməsi barədə heç nə deməyib.
Muradlının inzibati həbs müddəti yanvarın 1-də başa çatır.
Şamo Eminov 2023-cü ilin noyabr ayının sonundan bəri həbs edilən doqquzuncu jurnalistdir. Hər şey müstəqil “Abzas Media” internet nəşrinin rəhbərliyinin həbsi ilə başlayıb. Bu iş üzrə hazırda 5 nəfər – nəşrin baş redaktoru Sevinc Vaqifqızı, direktoru Ülvi Həsənli, onun müavini Məhəmməd Kekalov, reportyor Nərgiz Absalamova, araşdırmaçı jurnalist Hafiz Babalı həbsdədir. Onların hamısı qabaqcadan əlbir olaraq qaçaqmalçılıqda ittiham edilirlər.
Daha sonra “Kanal 13”ün üç əməkdaşı və bir müstəqil jurnalist Teymur Kərimov həbs edilib.
