Ermənistanda Dağlıq Qarabağdan olan qaçqınlar üçün məşğulluq proqramları
Dağlıq Qarabağ qaçqınları Ermənistanda
Ermənistan hökuməti Dağlıq Qarabağdan olan qaçqınlara növbəti dəstək proqramını təsdiqləyib. İndi onlar Ermənistanda əlavə peşə təhsili ala və işlə təmin oluna biləcəklər. Təxminən 1000 nəfərin faydalanacağı gözlənilir.
- İlham Əliyev: “İnsanlar və yüklər Azərbaycandan Azərbaycana yoxlanmadan keçməlidir”
- “Biz Stalinin təsviri olan ikonada dəyişiklik etməyə hazırıq” – Gürcüstan patriarxlığı
- BRIKS-in genişlənməsi: Azərbaycan üçün yeni imkanlar. Bakıdan şərh
Sabit məşğuliyyət
Hökumət layihəsində Dağlıq Qarabağdan olan qaçqınlara vakansiya verən işəgötürənlər nəzərdə tutulur. Bunlar müəyyən peşəkar bilik və bacarıqlara malik şəxslər olmalıdırlar.
Hökumət həmçinin Qarabağ ermənilərinə “əmək bazarında daha rəqabətli olmaq” və sabit iş yerləri əldə etmək üçün əlavə peşə təhsili almağa kömək etmək qərarına gəlib.
Əmək və sosial məsələlər naziri Narek Mkrtçyanın sözlərinə görə, proqram artıq sınaqdan keçirilib. Oxşar layihələrdən faydalananlar 2016-cı ilin aprel döyüşlərində və 2020-ci ildə 44 günlük müharibədə iştirak etmiş hərbçilər olub.
“Biz bir ildən artıqdır ki, [benefisiarların proqramlarda iştirakından sonra] vəziyyəti izləyirik və əmin olduq ki, oxşar proqramlar üzrə təhsil və təlim almış iştirakçıların 70 faizindən çoxu əmək bazarında qalmağa davam edir”.
İştirakçılar üçün təlim haqlarının və işəgötürənlərin vergi ödənişlərinin kompensasiyası
Əmək və əhalinin sosial müdafiəsi nazirinin sözlərinə görə, proqrama 3 istiqamət daxildir:
- peşə təlimləri
- iş təcrübəsi əldə etmək
- məşğulluq.
Peşə təhsili 6 ay davam edəcək. Bu müddət ərzində benefisiara aylıq 50.000 dram (125 ABŞ dolları) təqaüd və təhsil haqqı ilə eyni məbləğdə təqaüd ödəniləcək.
Təlim başa çatdıqdan sonra işəgötürənlə benefisiar arasında ən azı 3 ay müddətinə əmək müqaviləsi bağlanılır. İşəgötürənə vergilər və icbari ödənişlər üçün kompensasiya olaraq üç ay müddətində ayda 50 min dram veriləcək.
İş təcrübəsinin əldə olunmasını nəzərdə tutan ikinci mərhələdə benefisiarla işəgötürən arasında ən azı 6 ay müddətinə əmək müqaviləsi bağlanılır. İlk 3 ay ödənişli staj olacaq. Proqramın bu komponentinə əsasən, işəgötürənə benefisiarın 3 aylıq əmək haqqının ödənilməsinə görə kompensasiya ödəniləcək. Aylıq əmək haqqı 165 min dram (412,5 dollar) olacaq.
Üçüncü mərhələ 6 aylıq təlimin təşkilini nəzərdə tutur, bu müddət ərzində benefisiar təlim üçün kompensasiya və təqaüd alacaq. Bu mərhələnin sonunda onunla minimum 6 ay müddətinə əmək müqaviləsi bağlanacaq ki, bunun da 3 ayı ödənişli staj olacaq. Bu halda da işəgötürənə benefisiarın əmək haqqı 165.000 dram üçün 3 aylıq kompensasiya veriləcək.
