Britaniyada sinir iflic edən maddə tətbiq etməkdə təqsirləndirilən Rusiya vətəndaşları müsahibə veriblər

Russia Today telekanalı özlərini Aleksandr Petrov və Ruslan Boşirov kimi təqdim edən çəxslərlə müsahibə yayımlayıb. Britaniya hakimiyyəti onları keçmiş Rusiya kəşfiyyatçısı Sergey Skripal və qızı Yuliyanın həyatına sui-qəsd etməkdə günahlandırır.

Tarixçə

2018-ci ilin martında Solsberi şəhərində keçmiş rusiyalı kəşfiyyatçı Sergey Skripal və qızı Yuliyanın həyatına sui-qəsd edilib. Həkimlərin operativ müdaxiləsi sayəsində onları xilas etmək mümkün olub. Haddisə yerinə gələn polis əməkdaşı da ziyan görüb.

Sui-qəsd zamanı Sovet İttifaqında istehsal olunan “Noviçok” adlanan sinirləri iflic edən kimyəvi maddədən istifadə edilib.

Üç həftədən sonra Solsberidə bir qadın həyatını itirib, tərəf müqabili isə ziyan çəkib. Bu, həmin cütlük zibil qutusunda içində “Noviçok” maddəsi olan ətir şüşəsi tapandan sonra baş verib.

İngiltərə polisinin bildirdiyinə görə, Skripallara qarşı sui-qəsddə altı Rusiya vətəndaşı iştirak edib.

Onlardan ikisinin adı açıqlanıb – Ruslan Boşirov və Aleksandr Petrov.

Britaniya polisi bildirir ki, onlar Rusiyanın Baş Kəşfiyyat İdarəsinin əməkdaşlarıdır, adları isə saxta ola bilər. “Petrov” və “Boşirov” haqqında beynəlxalq axtarış elan olunub.

Böyük Britaniyanın baş naziri Tereza Mey bəyan edib ki, belə əməliyyat “Rusiya Federasiyasının yüksək vəzifəli şəxslərinin sanksiyası olmadan həyata keçirilə bilməzdi”.

Rusiya Federasiyasına qarşı Böyük Britaniya, Birləşmiş Ştatlar və digər ölkələr tərəfindən sərtliyinə görə soyuq müharibə dövründən bəri misli görünməmiş sanksiyalar tətbiq olunub.

Reaksiya

Sentyabrın 12-də prezident Vladimir Putin Skripallara sui-qəsddə günahlandırılan şəxslərə açıq şəkildə məsləhət görüb ki, “kütləvi informasiya vasitələrinə müraciət etsinlər və hər şeyi özləri danışsınlar”.

“Biz onları tapdıq, onlar mülki şəxslərdir, orada kriminal yoxdur”, – o əlavə edib.

Növbəti gün özlərini Ruslan Boşirov və Aleksandr Petrov adlandıran iki şəxs Rusiyanın dövlət kanalına müsahibə verib.

Onların sözlərinə görə, Böyük Britaniyada turist kimi olublar. Solsberiyə görməli yerlərini seyr etmək üçün yollanıblar. BKİ-də çalışmırlar. Sui-qəsd təşkili ilə bağlı itttihamlar onların “həyatını qaraldıb”. Onlar kütləvi informasiya vasitələrinə “müdafiə” üçün müraciət ediblər.

Qeyri-rəsmi dəyərləndirmələr 

Rusiyalı sosial şəbəkə istifadəçiləri, jurnalistlər və ekspertlər bu müsahibəyə dərhal reaksiya veriblər. Onlar əsasən bu məzmunda yazır:

“Rusiyanın əsas təbliğat resursu Russia Today telekanalının baş redaktorunun mobil nömrəsi “Petrov” və “Boşirovun” əlinin altında imiş”;

“Onlar şəxsiyyətlərini təsdiq edən heç bir sənəd təqdim etməyiblər”;

“ “Petrov” və “Boşirov” Solsberinin görməli yerlərini seyr edərkən çəkdirdikləri fotoları göstərə bilməyib”;

“Solsberiyə niyə iki dəfə – 2 və 3 martda gəldikləri haqda suala onlar yalan cavab veriblər. Onların versiyası – ilk gün güclü qar yağmışdı və biz heç yana gedə bilmədik – təsdiqlənməyib: həmin gün bu rayonda günəşli, azca yağışlı hava olub”;

“Onların qaldığı Londondakı otel otağında “Noviçok”un izləri tapıldığı haqda sual verilməyib”;

“Niyə onlar Londondan uçuş üçün iki günə – 3 mart axşam və 4 mart səhər bilet rezerv etdikləri haqda sual verilməyib”.

Rəsmi dəyərləndirmə 

Britaniya Parlamentinin Solsberini təmsil edən deputatı Con Qlen bildirib ki, şübhəlilərin bu şəhərə yerli görməli məkanları seyr etmək üçün getdikləri haqda bəyanatları etibara layiq deyil. Onun sözlərinə görə, bu iki şəxsin RT-yə müsahibələrində danışdıqları Britaniya xüsusi xidmət orqanlarının əlində olan informasiya ilə uyğun gəlmir.

Deputat ironiya ilə qeyd edib ki, səyyahların turist marağı haqda eşitdiklərinə sevinib, amma Solsberiyə “cəmi iki günlük gəlmələri və çamadanda “Noviçok” gətirmələri” onu təəccübləndirib.

Britaniya baş naziri Tereza Mey Rusiya məmurlarının Skripalların işi üzrə göstərdiyi reaksiyanı “təhqiredici”adlandırıb və bildirib ki, onların söylədikləri “sağlam düşüncəyə ziddir”.