Böyük Britaniya gürcüstanlı hakimlərə sanksiya tətbiq edib
Britaniya gürcüstanlı hakimlərə sanksiya tətbiq edib
Böyük Britaniya Gürcüstanın hakimləri Mixeil Çinçaladze və Levan Murusidzeni sanksiya siyahısına daxil edib. Sənədə əsasən, sanksiyaya məruz qalan hakimlərin Böyük Britaniyada olan bütün aktivləri, o cümlədən bank hesabları dondurulacaq.
Sənəddə hakimlərin mümkün korrupsiya əlaqələrinə istinad edilir.
Sanksiyalar barədə qərar 2018-ci il tarixli “Sanksiyalar və çirkli pulların yuyulmasına qarşı mübarizə haqqında” qanuna uyğun olaraq qəbul edilib və maliyyə məhdudiyyətlərinin tətbiqini nəzərdə tutur.
Sanksiyalar ciddi korrupsiya əməllərinə qarışmış və ya qarışan şəxslərin vəsait və aktivlərinin dondurulmasını ehtiva edir.
Sənəd, sanksiya siyahısında olan şəxslərə məxsus vəsaitlər və iqtisadi resurslarla hər hansı əməliyyatdan çəkinməyi tövsiyə edir. Bu cür əməliyyatlar yalnız Maliyyə Sanksiyalarının İcrası Ofisi (OFSI) tərəfindən təsdiqləndiyi və ya digər istisnalar tətbiq edildiyi halda mümkündür.
Böyük Britaniyanın maliyyə sanksiyalarına əməl etməmək və ya onları pozmağa cəhd göstərmək cinayət məsuliyyəti yarada bilər.
Mixeil Çinçaladzeyə qarşı sanksiyalar
Sənədə əsasən, Mixeil Çinçaladze korrupsiya yolu ilə maddi üstünlük əldə etdiyi üçün sanksiyaya məruz qalıb. O, Tbilisi Apellyasiya Məhkəməsinin sədri kimi vəzifə səlahiyyətlərindən sui-istifadə edərək, “Gürcü Arzusu” partiyasının maraqlarına uyğun şəkildə məhkəmə qərarlarının və hakim təyinatlarının həyata keçirilməsini təmin edib.
Sənəddə qeyd olunur ki, Çinçaladze xarici dövlət məmuru kimi ömürlük Tbilisi Apellyasiya Məhkəməsinə təyin olunmaqla qeyri-qanuni üstünlük əldə edib və bu vəzifədə qalmaqla “Gürcü Arzusu” partiyasının maraqlarına uyğun qərarların qəbul edilməsini təmin etməyi planlaşdırıb.
Levan Murusidzeyə qarşı sanksiyalar
Sənədə görə, Levan Murusidze də vəzifə səlahiyyətlərindən sui-istifadə edərək, “Gürcü Arzusu” partiyasının maraqlarına uyğun qərarların qəbul edilməsini təmin etmək üçün maddi üstünlük əldə edib. O, Gürcüstanın Ədliyyə Ali Şurasının üzvü kimi məhkəmə təyinatlarına və qərarlarına təsir göstərib.
Sənəddə Murusidzenin “ciddi korrupsiya əməllərində iştirak etdiyi” bildirilir. O, Tbilisi Apellyasiya Məhkəməsinə ömürlük təyin olunmaqla qeyri-qanuni üstünlük əldə edib və bu vəzifədə qalmaqla “Gürcü Arzusu” partiyasının mənafeyinə uyğun qərarların qəbulunu təmin etmək niyyətində olub.
Böyük Britaniyanın Gürcüstan rəsmilərinə qarşı əvvəlki sanksiyaları
2024-cü il dekabrın 19-da Böyük Britaniya beş yüksək rütbəli Gürcüstan rəsmisinə sanksiya tətbiq edib. Sanksiya siyahısında Gürcüstanın daxili işlər naziri Vaxtanq Qomelauri, onun müavini və Xüsusi Tapşırıqlar Departamentinin rəhbəri Zviad Xarazişvili, daha bir müavini və Tbilisi polis rəisi də var.
Böyük Britaniya hökumətinə görə, onlar jurnalistlərə və dinc etirazçılara qarşı zorakılığa görə məsuliyyət daşıyırlar.
Bu sanksiyalar Böyük Britaniyanın Gürcüstan hökumətinə, o cümlədən müdafiə sahəsində göstərilən bütün dəstək proqramlarını dayandırmaq qərarından sonra tətbiq edilib. Həmçinin, Britaniya hökuməti hakim “Gürcü Arzusu” partiyası ilə əməkdaşlığı azaldıb.
Xəbərlər, Gürcüstan etirazları
