Beynəlxalq təşkilatlar Azərbaycan hökumətini Qubad İbadoğlunu azad etməyə çağırıb
Qubad İbadoğlu işi
İqtisadçı alim və müxalif siyasətçi Qubad İbadoğlunun həbsi beynəlxalq ictimaiyyətdə rezonans doğurub. Üç nüfuzlu beynəlxalq insan haqları təşkilatı, eləcə də ABŞ Senatının iki üzvü onun azadlığa buraxılması üçün Azərbaycan hökumətinə müraciət edib.
- Gürcüstanın Şovi dağ kurortunda torpaq sürüşməsi nəticəsində onlarla insan ölüb və itkin düşüb
- Azərbaycanın Baş Prokurorluğu: “Xaçatryan Meşəli cinayətilə bağlı axtarlan 9 nəfərdən biridir”
- Afiəddin Məmmədov həbsdə aclıq aksiyasına başlayıb
Avqustun 8-də İşgəncələr Əleyhinə Ümumdünya Təşkilatı (OMCT), Human Rights Watch və Human Rights House Foundation birgə bəyanat yayıb. Bəyanatda beynəlxalq insan haqları strukturları vətəndaş cəmiyyəti təmsilçisi, iqtisadçı alim Qubad İbadoğlunun Azərbaycanda həbsindən və həbsxanada ağır şəraitdə saxlanmasından dərin narahatlıqlarını qeyd ediblər.
“İbadoğlu uzun illər Azərbaycanda demokratik prinsiplərin, sosial-iqtisadi tərəqqinin tərəfdarı olub. O, 2014-cü ildə hökumət zorla qapadana qədər dövlət maliyyə idarəçiliyi sahəsində, düzgün idarəetmə və büdcə şəffaflığı ilə bağlı araşdırma aparan İqtisadi Tədqiqatlar Mərkəzi qeyri-hökümət təşkilatının aparıcı siması olub”, – deyə bəyanatda bildirilir.
Hüquq-müdafiə təşkilatları həmçinin qeyd ediblər ki, akademik təhsilini təkmilləşdirmək istəyi onu ABŞ və Avropanın qabaqcıl universitetlərində mühazirəçi olmağa vadar etdi və bu yaxınlarda O, London İqtisadiyyat Məktəbində dəvət edilən elmi işçi olub.
“Biz Azərbaycan hakimiyyətini çağırırıq ki…”
“Biz təcili olaraq Azərbaycan hakimiyyətini Qubad İbadoğlu və İradə Bayramovanın saxlanılması və həbsi ilə bağlı müstəqil, qərəzsiz araşdırma aparmağa çağırırıq. Biz Qubad İbadoğluna qarşı ittihamların saxta olduğuna və siyasi motivlərlə irəli sürüldüyünə əmin olduğumuz üçün onun dərhal azadlığa buraxılmasını tələb edirik.
Bundan əlavə Qubad İbadoğlunun saxlanma şəraitinin ağır olmasından da narahatıq. Ailəsi onun 2-ci dərəcəli şəkərli diabetdən, ürək xəstəliyindən və görmə qabiliyyətinin zəif olmasından əziyyət çəkdiyini, həbs olunduqdan sonra müalicə üçün lazım olan dərman preparatları, düzgün qidalanma, təmiz içməli su əldə etməkdə çətinlik çəkdiyini bildirib. Onun kamerasında hava sirkulyasiyası, təbii işıq və lazımi sanitar şərait yoxdur”, – bəyanatda qeyd edilir.
İnsan haqları təşkilatları xatırladır…
Hüquq-müdafiə təşkilatları xatırladırlar ki, həddindən artıq güc tətbiqi, pis rəftar, tibbi yardımdan imtina və pis saxlanma şəraiti qeyri-insani və ləyaqəti alçaldan rəftardır ki, bu həm Azərbaycan qanunvericiliyi, həm də Azərbaycanın tərəfdar çıxdığı beynəlxalq insan hüquqları müqavilələri ilə qəti qadağandır.
Bəyanatda həmçinin Qubad İbadoğlunun vəkili ilə görüşündə üzləşdiyi maneələri də vurğulanıb:
“İyulun 26-da vəkillə görüşə icazə verilməyib, 27-də isə müstəntiq iştirak etdiyi üçün müdafiəçi ilə təkbətək görüşə bilməyib.
Bundan əlavə, görüş zamanı İbadoğlunun əlləri qandallı qalmağa məcbur olub və ona optik eynəkdən istifadəyə icazə verilməyib. İbadoğlunun vəkili ilə görüşlərini monitorinq etmək, izləmək və dinləməklə hakimiyyət açıq ünsiyyətə mane olub və onun həbsdə olarkən məruz qaldığı mümkün fiziki və psixoloji zorakılıqları sənədləşdirməsinə mane olub”.
“Azərbaycan hakimiyyəti ifadə azadlığı hüququna hörmət etməli və onu qorumalıdır”
Bəyanatın yekununda deyilir ki, London İqtisadiyyat Məktəbində dəvət edilən iqtisadiyyat tədqiqatçısı və vətəndaş fəalı kimi İbadoğlu işini görürdü və ictimai müzakirəyə müdafiə edilməli töhfə verirdi, ona qarşı hər hansı ittiham siyasi motivli olmamalıdır.
“Azərbaycan hakimiyyəti ifadə azadlığı hüququna hörmət etməli və onu qorumalı, ona öz fikrini və tənqidini təzyiq və ya təqibdən qorxmadan sərbəst ifadə etməsinə imkan verməlidir. Biz bu çətin dövrdə Qubad İbadoğlu, İradə Bayramova və onların ailəsi ilə həmrəyik və ədalətin bərqərar olması və insan hüquqlarının qorunması üçün bundan sonra da əlimizdən gələni edəcəyik”.
Senatorlar da İbadoğlunun müdafiəsinə qalxıblar
Qubad İbadoğlunun həbsi ABŞ Senatında reaksiya doğurub.
“Azərbaycanda demokratik fəallara qarşı hücumlar qəbuledilməzdir. Hakimiyyətə təzyiq etmək üçün daha çox çalışmalıyıq. İlham Əliyev siyasi dissidentlərə təzyiqləri dayandırmalı və siyasi məhbusları, o cümlədən Qubad İbadoğlunu azad etməlidir”, – senator Kris Van Hollen bildirib.
ABŞ senatoru Bob Menendez də İbadoğlunun azadlığa buraxılmasına çağırıb.
“Mən müxalifətçinin həbsindən narahatam və onunla bağlı vəziyyəti izləyirəm”, – Menendes Twitter-də yazıb. O, ABŞ Dövlət Departamentini Azərbaycan hökuməti ilə bütün təmaslarda İbadoğlunun azad edilməsi məsələsini prioritetdə saxlamağa çağırıb.
Bundan əvvəl konqresmen Kris Smit də İbadoğlunun azadlığa buraxılmasına çağırıb.
Nə baş verib?
Azərbaycan Demokratiya və Rifah (ADR) Hərəkatının sədri Qubad İbadoğlu iyulun 23-də Baş Mütəşəkkil Cinayətkarlıqla Mübarizə İdarəsinin (“Bandotdel”) əməkdaşları tərəfindən saxlanılıb. Ona qarşı Cinayət Məcəlləsinin 204.3.1-ci (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb. DİN-in yaydığı məlumata əsasən, az əvvəl FETÖ ilə əlaqədar həyata keçirilmiş xüsusi əməliyyat zamanı saxlanılan beş nəfərdən birinin İbadoğlu ilə əlaqələri müəyyən edilib və bu da onun istintaqa cəlb edilməsinə səbəb olub.
Daha sonra ona məxsus mülklərdə axtarış aparılıb. İyulun 24-də Nərimanov Rayon Məhkəməsi müxalif siyasətçi barəsində 3 ay 26 günlük həbs qətimkan tədbiri seçib.
İbadoğlu verilmiş ittihamla özünü təqsirli bilmir və həbsini siyasi fəaliyyəti ilə bağlayır.
Ötən gün Türkiyə hüquq-mühafizə orqanlarının əməkdaşları İstanbulda yaşayan və işləyən daha bir iqtisadçı alim Fazil Qasımovu saxlayıb Azərbaycan hökumətinə təhvil veriblər. Rəsmi məlumata görə, o, Qubad İbadoğlunun işi üzrə həbs edilib və ona da Azərbaycan Respublikası Cinayət Məcəlləsinin 204.3.1-ci maddəsi ilə ittiham irəli sürülüb.
