Baş nazir Serj Sarqsyanın onun istefasını tələb edənlərlə görüşü heç bir nəticə vermədi
20:10
Hərəkata qoşulan insanlar Yerevanın baş meydanındadırlar. Tribunada yeni natiqlər peyda olub, çünki hərəkatın təşkilatçısı, deputat Nikol Paşinyan ikisi parlamentin müxalif “Yelk” fraksiyasından olan tərəfdarları ilə birlikdə saxlanılıb. Hərəkat demək olar ki, başsız qalıb. Minlərlə mitinq iştirakçısı saxlanılanların azad edilməsini tələb edir və itaətsizlik aksiyasını davam etdirmək niyyətindədirlər.
Dinc etirazın davam etdiriləcəyinin əlaməti olaraq meydanda göyərçinlər buraxılıb.
Bu gün baş nazir Serj Sarqsyan və hərəkat lideri Nikol Paşinyanın uğursuz danışıqlarından sonra bütün gün ərzində paytaxtın hər yerində etiraz aksiyaları davam edib.
Aprelin 21-də baş nazir və onun istefasını tələb edən müxalifətçinin görüşündə vasitəçi qismində iştirak edən Ermənistan prezidenti Armen Sarqsyan bəyanatla çıxış edib. O, hesab edir ki, hadisələrin inkişafı təhlükəli həddə çatıb və yarana biləcək fəsadların qarşısını almaq lazımdır. Onun bəyanatında həm də deyilir:
“Təəssüf ki, indicə əldə edilmiş razılaşmaya baxmayaraq, danışıqlar dayandırılıb, özü də bir halda ki, danışıqlar məsələnin həllinə və gərginliyin azalmasına gətirib çıxara bilərdi. Ölkəmizin bütün vətəndaşlarını, diaspora üzvlərini vəziyyəti qızışdırmaqdan uzaq olmağa, səbirli olmağa çağırıram”.
Polis bəyanat yayaraq bildirib ki, vəziyyətə nəzarət edir, və “Ermənistanın konstitusiya quruluşuna istənilən müdaxilənin qarşısını almaq məqsədilə qanuni dövlət məcburiyyəti çərçivəsində mümkün olan bütün vasitələrdən tam şəkildə istifadə edəcək”.
Avropa İttifaqı daxili siyasi böhranı nizamlamaq üçün siyasi dialoqa çağırıb. Avropa diplomatiya başçısının rəsmi nümayəndəsi Maya Kosyançiçin rəsmi bəyanatında deyilir:
“Avropa İttifaqı ümid edir ki, Ermənistan hakimiyyəti bu hüquqa tam hörmətlə yanaşacaq, ədalətlə və proporsional şəkildə, Ermənistanın beynəlxalq öhdəliklərinə uyğun olaraq, o cümlədən insan hüquqları və əsas azadlıqlarının müdafiəsi haqqında Avropa Konvensiyası çərçivəsində qanunu tətbiq edəcək. Özünün sərbəst toplaşmaqla bağlı əsas azadlığının qanuna uyğun şəkildə realizəsi vaxtı saxlanılan hər kəs dərhal azad olunmalıdır”.
11:00
Müxalifətçi deputat Nikol Paşinyanın baş nazir Serj Sarqsyanla görüşü beş dəqiqədən az çəkib. Dünən axşam müxalifətçinin bildirdiyinə görə, görüşün gündəmində baş nazirin istefası məsələsi varıydı. Amma danışıqlar alınmadı. Danışıqlar demək olar ki, olmadı. Sadəcə tərəflərdən hər biri jurnalistlərin qarşısında öz nöqteyi-nəzərini bildirdi.
Serj Sarqsyan da əvvəldən bildirib:
“Şadam ki, mənim çoxsaylı danışmaq çağırışlarıma cavab verdiz. Halbuki onlarla jurnalistin qarşısında danışıqları necə apara biləcəyimizi təsəvvürümə gətirə bilmirəm. Bununla belə, şadam”.
Nikol Paşinyan dərhal bildirib ki, onun dialoq aparmaq fikri yoxuydu da, sadəcə Serj Sarqsyanın istefası və hakimiyyətin rahat dəyişilməsi məsələsini müzakirə etməyə gəlib.
“Bu, danışıqlar deyil, dialoq deyil. Bu, faktiki olaraq ultimatumdur, dövlətin, qanuni hakimiyyətin şantajıdır. Siz məsuliyyət dərəcəsini dərk etmirsiz, siz 1 martdan dərs götürmədiz”, – deyə baş nazir bildirib.
Sarqsyanın son sözləri bunlarıydı:
“Söhbət bu tonda gedirsə, mənə bir daha hüquq müstəvisinə və ümumiyyətlə məntiqi addımlar sərhədlərinə qayıtmağı məsləhət görmək qalır. Əks halda bütün məsuliyyət sizin üzərinizə düşür”.
Paşinyan cavab verib ki, Ermənistanda vəziyyət dəyişib, hakimiyyət artıq xalqın əlindədir.
Serj Sarqsyan müxalifətçiyə xatırladıb ki, cəmi 7 faiz səs toplayan fraksiyanın bütün xalqın adından danışmaq haqqı yoxdur:
“Mənim artıq söhbəti davam etdirmək istəyim yoxdur. Dövlətin qanuni tələblərini qəbul etmirsizsə, xudahafiz. Cənab jurnalistlər, özünüz nəticə çıxara bilərsiz”.
Bu sözlərdən sonra baş nazir “Marriot” otelini tərk edib.
Müxalifətçi deputat bildirib ki, Sarqsyan adekvat deyil, vəziyyəti idarə etmir və ikiqat güclə itaətsizlik aksiyalarını davam etdirməyə çağırıb.
