Bakıda tələbələrin etiraz aksiyası dağıdılıb, saxlanılanlar var
Mayın 3-də Tələbə Güc Mərkəzi Azərbaycan İqtisad Universiteti qarşısında “Tələbəyə ədalət” şüarı ilə etiraz aksiyası təşkil edib. Aksiya polis tərəfindən dağıdılıb. Bir neçə tələbə saxlanılıb.
- Azərbaycanlı tələbəni Təhsil Nazirliyinə müraciət etdiyi üçün 15 sutkalıq həbs ediblər
- Düz bir il sonra Azərbaycanda ali məktəblər açılır, amma hamı üçün yox
Bir müddətdir ki, İqtisad Universitetinin tələbələri tədris sistemindəki problemlərdən narazılıq edir. Tələbə hüquqlarının müdafiəsi ilə məşğul olan Tələbə Güc Mərkəzindən bildirildiyinə görə, problemlərin həlli üçün onlar sosial media üzərindən kampaniya aparıb, universitet rəhbərliyinə müraciət edib və bir sıra məsələlərin həllinə nail olublar. Buna baxmayaraq, “universitet rəhbərliyi etirazçı tələbələri təhdid etməyə və töhmət verməyə başlayıb”. Bu da onların etiraz aksiyası keçirməsinə səbəb olub.
Aksiya təşkilatçıları polis tərəfindən saxlanıldığı üçün bəyanatlarını planlaşdırdıqları kimi, İqtisad Universiteti qarşısında səsləndirə bilməsələr də, onun mətnini təşkilatın “Facebook” səhifəsində paylaşıblar.
![](https://jam-news.net/app/uploads/2021/05/aksiya_1-1024x550.jpg)
İqtisad Universiteti başda olmaqla bütün universitet rəhbərliklərinə ünvanlanan bəyanatda aşağıdakı tələblər yer alıb:
1. Semestr imtahanlarının təşkili qaydalarında qərar vermək üçün tələbələr arasında rəy sorğusu keçirilsin və tələbələr hansı üsul və metodlarla razılaşarsa, həmin qaydada imtahanlar təşkil edilsin ;
2. Onlayn rejimdə keçirilən dərslərdə “qayıb limiti” sistemi ləğv edilsin;
3. Semestr imtahanlarının keçirilməsində ədaləti təmin etmək üçün apellyasiya komissiyalarının şəffaf fəaliyyəti təmin edilsin;
4. Fərqli düşündükləri və universitetin qərarlarını tənqid etdikləri üçün tələbələrə qarşı heç bir təzyiq üsulundan istifadə edilməsin, tələbələri təhdid edən universitet rəsmiləri cəzalandırılsı.
Polis “Tələbəyə ədalət!” şüarı yazılmış banneri etirazçıların əlindən alıb. Tələbə Güc Mərkəzi sədri Əhməd Məmmədli, təşkilat üzvləri Fərid Cabbar, Rəvan Axundov, Tükəzban Qasımova, həmçinin Tələbə Tələbi Təşkilatının sədri Rüstəm İsmayılbəyli polis tərəfindən saxlanılıblar.