Bakıda bir həftədə 20 nəfərdən çox insan tibbi spirtdən zəhərlənərək ölüb
Bakıda spirtdən zəhərlənib ölənlər
Son bir həftədə Bakının Səbail, Suraxanı və Sabunçu rayonlarında 20 nəfərdən çox insan texniki spirt zəhərlənməsindən ölüb. Prokurorluq hadisələrlə bağlı cinayət işi başladıb. Zəhərlənməyə səbəb olan tibbi spirti istehsal edən şəxs həbs olunub. Bəzi hüquqşünaslar insanların öz məsuliyyətsizlikləri səbəbindən öldüklərini və sahibkarın həbsinin qanunsuz olduğu fikrindədirlər. Digər həmkarları isə həbsin tam qanuni olduğunu bildirirlər. İqtisadçı Natiq Cəfərli isə hesab edir ki, ölkədə spirtli içkilər kəskin bahalaşdığı zaman belə təhlükəli halların olacağı gözlənilən idi.
- Jurnalist Şahnaz Bəylərqızı ev dustaqlığına buraxılıb
- Azərbaycanda Xocalı faciəsinin 33-cü ildönümü qeyd olunur. Sağ qalanların hekayələri
- Jurnalist Əziz Orucov 2 il müddətinə azadlıqdan məhrum edilib
Ən son spirtdən zəhərlənmə nəticəsində ölüm hadisəsi fevralın 26-da Bakının Səbail rayonunda qeydə alınıb. Ölənlərin sayı iki nəfər olub – 1970-ci il təvəllüdlü Z.Əliyev və 1982-ci il təvəllüdlü S.Səmədov.
Onların hansı növ spirtli içki qəbul etdiyi məlum deyil. Ölüm faktları ilə bağlı Səbail rayon Prokurorluğunda araşdırma aparılır.
Fevralın 23-də paytaxtın Suraxanı rayonu Əmircan qəsəbəsində yerləşən evdə 1964-cü il təvəllüdlü Asif Akşurinin meyiti tapılıb. Onun da spirtdən zəhərlənərək öldüyü müəyyənləşib. Məlumata görə, Akşurin bir gün öncə dostunun evində spirt qəbul edib.
Fevralın 22-də Akşurinin də iştirak etdiyi məclisdən sonra daha 4 nəfərin də meyiti tapılıb. Onların da texniki spirt qəbul etdiyi ehtimal edilir.
Bundan başqa 22-23 fevral tarixlərində Bakının Sabunçu rayonu ərazisində texniki spirtdən kütləvi zəhərlənmə halı baş verib, ümumilikdə 15 nəfər ölüb.
Faktla bağlı Sabunçu rayon Prokurorluğunda cinayət işi başlanıb, ibtidai istintaq aparılır.
Prokurorluğun məlumatına görə, texniki spirt içərək ölən insanların çoxu tüfeyli həyat keçirən, alkoqolizmdən əziyyət çəkən insanlar olub.
Həmçinin müəyyən edilib ki, hadisə yerlərindən götürülmüş “Starlyuks” markalı gigiyenik vasitə və etil spirti Bakı şəhəri, Xəzər rayonu, Buzovna qəsəbəsi ərazisində fəaliyyət göstərən sahibkar Səbuhi Xanhüseynovun rəhbərliyi altında qablaşdırılıb.
Həmin şəxs Cinayət Məcəlləsinin 200.4 (istehlakçıları aldatma və ya pis keyfiyyətli məhsul istehsal etmə və satma) və 314.3-cü (iki və daha çox şəxsin ölümünə səbəb olan səhlənkarlıq) maddələri ilə təqsirləndirilərək barəsində həbs qətimkan tədbiri seçilib.
Bir ay öncə, 2025-ci ilin yanvarında Xanhüseynovun istehlakçıları aldatma və ya pis keyfiyyətli məhsul istehsal etmə və satma ittihamı ilə 5 min manat cərimə cəzasına məhkum olunduğu, istehsalat sexinə baxış keçirilərək möhürləndiyi də bildirilir.
“Hadisə yerlərində aşkar edilən gigiyenik vasitələrin və etil spirtinin satış nöqtələrindən də nümunələr götürülməklə tərkibi yoxlanılarkən gigiyenik vasitənin (spirt) tərkibində insan həyatı və sağlamlığı üçün təhlükəli olan metil spirti aşkar edilib”, – deyə prokurorluğun məlumatında deyilir.
Respublikaçı Alternativ partiyasının sədri, iqtisadçı Natiq Cəfərli hələ 2 il əvvəl spirtli içkilərin bahalaşdığı zaman belə təhlükəli halların ortaya çıxacağı ilə bağlı xəbərdarlıq etdiyini xatırladır:
“Hələ o vaxt demişdim ki, rəsmi istehsalçıların məhsullarının qiyməti daha kəskin artdıqca, bazara kustar üsullarla istehsal olunmuş məhsullar çıxacaq, bu da insanların həyatı üçün çox təhlükəlidir. Xəbərdarlıq etmişdim ki, bir müddətdən sonra zəhərlənmə, hətta ölüm hallarına gətirib çıxara bilər. Ona görə də hökumətlər burada çox diqqətli davranmalıdırlar. Əgər hər il və 6-7 aydan bir qiymətlərin sürətlə artması baş verəcəksə, insanların sağlamlığına ciddi ziyan vura biləcək məqamlar yarana bilər.
Son bir həftədə təxminən 20 vətəndaşımız tibbi spirtdən zəhərlənərək ölüb.
Xəbər yayılıb ki, fotoda gördüyünüz, zəhərlənməyə səbəb olan “Starlyuks” adı altında satışa çıxarılan, ölümlərə səbəb olduğu ehtimal edilən mal sahibi, iş adamı həbs edilib. Mən həbsin dəqiq səbəbini bilmirəm, amma, o iş adamı, bəyəm, içmək üçün istehsal edib o məhsulu – yox, kimsə ağılsızlıq edib içirsə, buna iş adamı neyləsin?!
Yaxşı, tutalım, iş adamının günahı var, bəs hökumət son 5 ildə bir neçə dəfə vergi-aksizləri artıraraq qiymətlərin yüksəlməsinə, bununla da adamların kustar, sağlamlığa ziyan vuracaq içkilərə yönəldiyinə görə məsuliyyət daşıyırmı?!”, – deyə Cəfərli sual edir.
Vəkil Aqil Layıc da sahibkarın həbsini qanunsuz hesab edir.
“Mediada məlumat getdi ki, paytaxtda bir neçə şəxs spirtdən zəhərlənərək dünyasını dəyişib. Onlardan bəziləri tüfeyli həyat tərzi keçirən şəxslər olub, hamısı da alkoqolizmdən əziyyət çəkiblər. Bu şəxslər gigiyenik, dezinfeksiya və antiseptik məqsədlər üçün istifadə edilən texniki spirti alıb, içiblər və ölüblər.
İstintaq da günah keçisi olaraq məhsulu qablaşdıranı məsuliyyətə cəlb edib ki, sən istehlakçıları aldatmısan və onların həyatına qəsd etmisən. Qablaşmanın üzərində içmək olmaz və gigeyenik spirt olduğu qeyd edilib.
Buna baxmayaraq, Sabunçu məhkəməsi qablaşdıranı 3 aylıq həbs edib.
And olsun Allaha cəngəllik mühakiməsində belə şey mövcud deyil”, – deyə vəkil bildirib.
Digər hüquqşünas Səməd Vəkilovun fikrincə isə sahibkarın həbs edilməsində qanunsuz bir şey yoxdur, çünki tibbi spirt metil spirtindən hazırlana bilməz. O vurğulayır ki, metil spirti zəhərlidir və yalnız sənayedə istifadə oluna bilər:
“İstehsalçı qadağan olunmuş spirtdən (metil spirtindən) istifadə edib və nəticədə bu, kütləvi ölümə səbəb olub. CM-in 314.3-cü maddəsində səhlənkarlıqdan ölümə səbəb olma nəzərdə tutulur. Ona görə də həbs qətimkan tədbirinin bu maddə ilə həyata keçirilməsi doğru təsbitdir”.
Vəkilovun sözlərinə görə, istehsalçı tibbi məqsədlər üçün istifadəsinə icazə verilən spirtdən – etil və ya izopropildən istifadə etsəydi və bu, ölümə səbəb olsaydı, onda heç bir məsuliyyət daşımayacaqdı:
“Bütün hallarda istehsalçılar məsuliyyətsizlik etməməlidirlər. Hətta gigiyenik vasitənin tərkibinə də xüsusi diqqət edilməlidir. Heç bir halda düşünməməlidirlər ki, onsuz da bu, daxilə qəbul edilən şey deyil, problem olmaz. Nə olursa, olsun istehsal qaydaları pozulmamalıdır”.
