Bakıda sahibsiz itlərin öldürülməsinə qarşı aksiya zorakılıqla dağıdılıb – VİDEO
8 iyul 2021-ci il tarixində heyvansevər fəallar “Toplan” sahibsiz itlərə qayğı mərkəzinin qarşısında itlərin öldürülməsinə qarşı etiraz aksiyası keçiriblər. Bakı sakini Aytac Həsənovanın sözlərinə görə, iyulun 1-də onun peyvəndli itini məhəllədən – Badamdar qəsəbəsindən oğurlayıblar.
- Azərbaycanlı heyvan hüquqları müdafiəçisi: “İndi orada cəmi 5-10 it qalıb” – VİDEO
- «Boynumdan tutdu və yumruqlamağa başladı» – Azərbaycanda LGBT fərdlərinə hücumlar artır
- Ehtiyat ana və arıları niyə tüstüləyirlər: Azərbaycanlı arıçı ilə bir gün – VİDEO
“Biz bir həftədir hər gün həm mərkəzə gələrək, həm də zəng edərək, itimizi geri almaq, ya da ən azı qəfəsdə görmək, gedib ona baş çəkmək üçün müraciət ünvanlayırıq. Lakin bütün müraciətlərimiz rədd cavabı alıb. Bildiriblər ki, içəri girmək olmaz. Mərkəzin veterinarı Günel Ələkbərova deyir ki, biz akt imzalamışıq və iti sizə qaytarmayacağıq. Bu qərar qanunsuzdur. G.Ələkbərova bildirir ki, 20 gün sonra it təbiətə buraxılacaq.
Təbiətə buraxılmaq isə ölüm deməkdir. Yaşayış olmayan əraziyə buraxırlar və itlər qida tapa bilmir. Heç olmasa, bu 20 gün ərzində o itin sağ olduğunu görmək bizim haqqımızdır. Biz itimizi geri istəyirik”, – Aytac Həsənova JAMnews-a danışıb.
Aksiyanın təşkilatçılarından biri, heyvan haqlarının müdafiəçisi Nicat İsmayılov isə müxbirimizə bunları deyib:
“Biz toplaşmışıq və öldürdükləri itlərimizi tələb edirik. Onlar iki ildən artıq müddətdir ki, 30 mindən çox iti yoxa çıxarıblar. Hansı istiqamətdə yoxa çıxarıblar, biz bilmirik. Gəlmişik ki, etiraz aksiyamızı keçirək. Bu qurumu Heydər Əliyev Fondu maliyyələşdirir. Məndə faktlar var ki, bura 60 milyon manat pul ayrılıb. Amma ortada heç nə yoxdur, 60 milyon manatı yeyiblər”.
Digər aksiya iştirakçısı Elxan Mirzəyevin fikrincə, bu mərkəzə gətirilən 10 itdən 9-u yoxa çıxır:
“Kimsə gəlib bura müraciət edəndə də pul istəyirlər. Məndə səs yazıları ilə sübutlar var ki, “Toplan”ın əməkdaşları itləri qaytarmaq üçün pul tələb edir”.
Bir neçə saat keçməsinə baxmayaraq, etirazçılara heç kim itlərlə bağlı açıqlama vermədi. Aksiya iştirakçıları polis əməkdaşları tərəfindən zorakılıqla saxlanılıb. 12-ci polis bölməsinin rəis müavini Süleyman Abbasov məlumat verdi ki, etirazçılar bölməyə aparılıb. Təxminən 3 saat bölmədə saxlanıldıqdan sonra fəallar azadlığa buraxılıb.
