Bəxtiyar Hacıyevə azadlıq tələb edən iki fəal həbs edilib
Bəxtiyar Hacıyevə azadlıq aksiyasında həbslər
Azərbaycanda Bəxtiyar Hacıyevin azad edilməsi tələbi ilə keçirilən etiraz aksiyasında iştirak edən iki fəal həbs edilib. Bu arada Hacıyev vəkillərinin təkidlərindən sonra altıncı gün quru aclıq aksiyasını dayandırıb. ABŞ Helsinki Komissiyası azərbaycanlı fəal Bəxtiyar Hacıyevin həbsi ilə bağlı sərt bəyanat yayıb. “Azərbaycan ABŞ üçün mühüm tərəfdaş olub və dünyanın enerji imkanları üçün həlledici əhəmiyyət kəsb edib, lakin bizim beynəlxalq əlaqələrimiz əsas insan hüquqları prinsiplərinin qarşılıqlı tanınmasından az asılı deyil”, – bəyanatda deyilir.
- Saakaşvili: səhhəti, həbsxana şəraiti, onu nələr gözləyir? Video və suallara cavab
- “Gec, ya tez Laçın yolunda Azərbaycan postu olacaq”. Bakıdan şərh
- Bakı və Yerevan kompromisə hazır deyil? Münhendə Əliyev-Paşinyan-Blinken görüşü
Bu gün Bakının Yasamal Rayon Məhkəməsinin qərarı ilə iki fəal Samir Sultanov və Afiəddin Məmmədov 30 sutka həbs edilib. Onlar fevralın 20-də həbsdə olan fəal Bəxtiyar Hacıyevin azadlığa buraxılması tələbi ilə keçirilən etiraz aksiyası zamanı saxlanılıblar.
Vəkil Zibeydə Sadıqovanın sözlərinə görə, hər iki fəal İnzibati Xətalar Məcəlləsinin 535.1 (polisin qanuni tələblərinə müqavimət göstərmə) və 510-cu (xırda xuliqanlıq) maddələri ilə təqsirli bilinib. Məhkəmədə onlar dinc etiraz aksiyası keçirdiklərini və müqavimət göstərmədiklərini bildirərək ittihamları rədd ediblər.
Məhkəmə binası qarşısında etiraz aksiyası
Bazar ertəsi, fevralın 20-də bir qrup vətəndaş cəmiyyəti fəalı Bakı Şəhər Apellyasiya Məhkəməsi qarşısında etiraz aksiyası keçirib, çünki məhkəmə bu dəfə də fəal Bəxtiyar Hacıyevi həbsdən azad etməyib.
Aksiya iştirakçıları “Öldürmə, azad et!”, “Azadlıq Bəxtiyarın haqqıdıq!” şüarlarını səsləndiriblər.
Polis etirazçıları məhkəmə binasından uzaqlaşdıraraq beş nəfəri – Afiəddin Məmmədov, Samir Sultanov, Nemət Abbasov, Əli Məlikov və Nərmin Şahmarzadəni saxlayıb.
Digər iştirakçılar jurnalistlərə bildiriblər ki, Bəxtiyar hər an ölə bilər və dərhal buraxılmalıdır. “Turan” xəbər verir ki, hakim Habil Məmmədov bunu nəzərə almayıb.
Hacıyevin vəkillərinin bildirdiyinə görə, o, məhkəməyə məcburi gətirilib, baxmayaraq ki, vəziyyəti pis olduğundan məhkəmədə iştirak etməmək üçün yazılı müraciət edilmişdi. Yolda onun halı pisləşib və öd qusub – vəkillərdən biri qeyd edib.
Hacıyev quru aclığı dayandırıb
Bu gün məlum olub ki, Bəxtiyar Hacıyev quru aclıq aksiyasının altıncı günündə yenidən su içməyə başlayıb. Bu barədə Penitensiar Xidmətin tibb müəssisəsində fəalı ziyarət edən vəkil Rövşanə Rəhimli məlumat verib.
Onun sözlərinə görə, Bəxtiyar Hacıyev vəkillərinin təkidi ilə su içməyə razılaşıb. “Onun qan təzyiqi və şəkəri aşağıdır. Ağır başgicəllənmə səbəbindən çətinliklə hərəkət edir”, – Rəhimli bildirib.
Bəxtiyar Hacıyev 44 gün əvvəl başladığı aclıq aksiyasını davam etdirir, son bir həftədə azadlığa buraxılması tələbi ilə quru aclığa keçmişdi.
Bəxtiyar Hacıyev dekabrın 9-da xuliqanlıq və məhkəməyə hörmətsizlik ittihamı ilə saxlanılıb. Həmin gün Xətai Rayon Məhkəməsi onun barəsində 1 ay 20 gün müddətinə həbs qətimkan tədbiri seçib.
Dekabrın 15-də Hacıyev azadlığa buraxılması tələbi ilə aclıq aksiyasına başlayıb. O, ictimaiyyətin və ailə üzvlərinin israrlı çağırışlarından sonra dekabrın 28-də aclıq aksiyasını dayandırıb. Lakin Apellyasiya Məhkəməsi onun şikayətini təmin etməyəndən sonra o, yanvarın 9-da aclıq aksiyasını bərpa edib və bu günə qədər davam edir.
Yanvarın 21-də məhkəmə Hacıyevin həbs müddətini daha bir ay uzadıb.
ABŞ Helsinki Komissiyasının bəyanatı
Helsinki Komissiyası kimi tanınan ABŞ-ın Avropada Təhlükəsizlik və Əməkdaşlıq Komissiyası bir həftədən az müddətdə ikinci dəfədir ki, Azərbaycan hakimiyyətini Bəxtiyar Hacıyevə qarşı humanist rəftarı təmin etməyə çağırıb.
Son addım bazar ertəsi Bakı Apellyasiya Məhkəməsi fəalın ev dustaqlığına buraxılması ilə bağlı vəsatəti rədd edəndən sonra atılıb.
“Biz qondarma ittihamlarla həbsdə olan və aclıq aksiyasını davam etdirərkən səhhəti kəskin şəkildə pisləşən azərbaycanlı vətəndaş fəalı Bəxtiyar Hacıyevin əsassız həbsindən və ona qarşı pis rəftarın davam etməsindən tamamilə dəhşətə gəlirik”, – komissiya sədri Co Uilson və həmsədr senator Ben Kardin birgə bəyanatda bildiriblər.
“Hacıyevin Azərbaycan rejimi tərəfindən cəzalandırılması ona qarşı irəli sürülən ittihamlarla tamamilə qeyri-mütənasib olmaqla yanaşı, həm də haqlı fəaliyyəti nəticəsində saxlanılması, təzyiqə və zorakılığa məruz qalması ilk dəfə deyil”, – müəlliflər qeyd ediblər.
“Azərbaycan ABŞ-ın mühüm tərəfdaşı olub və dünyada enerji imkanları üçün mühüm əhəmiyyət kəsb edir, lakin bizim beynəlxalq əlaqələrimiz heç də bundan az əhəmiyyətli deyil, insan hüquqlarının əsas prinsiplərinin qarşılıqlı tanınmasına əsaslanır. Bu, həm cənab Hacıyevə, həm də çoxsaylı digər siyasi məhbuslara aiddir.
Biz Administrasiyadakı və Avropadakı həmkarlarımıza qoşularaq Azərbaycan hakimiyyətini cənab Hacıyevlə humanist rəftara və insan haqlarını təmin etməyə, Helsinki Prinsipləri çərçivəsində onun daxili və xarici öhdəliklərinə qayıtmağa çağırırıq”, sənəddə deyilir.
Ötən şənbə günü Helsinki Komissiyası Twitter-də Hacıyevin saxlanmasını və pis rəftara məruz qalmasını tənqid edərək, bunu “kobud ədalətsizlik və fundamental insan hüquqları öhdəliklərinin kobud şəkildə pozulması” adlandırıb.
Komissiyanın həmsədri Ben Kardin ayrıca Azərbaycan hökumətini Bəxtiyar Hacıyevi dərhal azad etməyə çağırıb. “Biz insan hüquqlarını pozmağa çalışanların hamısını məsuliyyətə cəlb edə bilərik və edəcəyik”, – o deyib.
