Azərbaycanlı deputat “Zəngəzur dəhlizi”ni icarəyə götürməyi təklif edib

İkinci Qarabağ müharibəsinə son qoyan 2020-ci il 10 noyabr tarixli üçtərəfli bəyanatın maddələrindən biri hələ də yerinə yetirilməyib. Bu maddə Azərbaycanın əsas hissəsini onun eksklavı – Naxçıvan Muxtar Respublikası ilə birləşdirən kommunikasiyanın açılması ilə bağlıdır.

Azərbaycanın bu iki hissəsini birləşdirən dəhliz Ermənistan ərazisindən keçməlidir. Azərbaycanda bu dəhlizi icarəyə götürmək fikri səslənib.

• Azərbaycan-Ermənistan sərhədində Ermənistan hərbçisi saxlanılıb, amma sonra geri qaytarılıb
• “Azərbaycan “Laçın dəhlizini” bağladığını bəyan etməlidir” – Tofiq Zülfüqarov
• Yerevan, Bakı və Moskva nələri müzakirə edir və artıq etmir?

“Biz özümüzün hesab etdiyimiz ərazilərdə yerləşirik”

Azərbaycan parlamentinin müxalif Respublikaçı Alternativ Partiyasından olan deputatı Erkin Qədirli “Zəngəzur dəhlizi” və Qarabağda müharibə bitəndən sonra Azərbaycanla Ermənistan arasında həll olunmamış qalan digər məsələlərlə bağlı fikirlərini bölüşüb.

“Biz özümüzünkü hesab etdiyimiz ərazilərdə yerləşirik. Haqqında mübahisələr gedən anklavlar da bizimdir və biz orada olmalıyıq. Biz bu haqda danışmamalıyıq, biz orda yerləşməyə borcluyuq.

Ermənistan-Azərbaycan: “Yeni-köhnə sərhəd”, niyə onun müəyyən edilməsi bu qədər problemlidir?

İkinci Qarabağ müharibəsindən sonra Azərbaycan və Ermənistan dövlət sərhədləri ilə bağlı mübahisə edir. Tərəflərin arqumentləri və indən belə necə olacağı haqda

Bu ərazilər anklav olaraq qala bilməzr və hansısa yolla Azərbaycanın əsas hissəsi ilə birləşməlidir”, – deputat deyib.

Ölkələr arasında ərazi alış-verişi haqda

Onun fikrincə, bunun həyata keçirilməsi üçün beynəlxalq hüquq çərçivəsində kifayət qədər yollar var:

“Bu əraziləri almaq olar. Məsələn, pulla. Dünya təcrübəsindən çox sayda presedent sadalaya bilərəm. Çin Tacikistandan min kvadrat-kilometr ərazi alıb. Qazaxıstan 400, Qırğızıstan isə öz ərazisinin 200 kvadrat-kilometrini elə həmin Çinə satıb.

Əgər yadınızdadırsa, Tramp pulla Qrenlandiyanı almaq istəyirdi. Amma Danimarka satmağa razı olmadı. Başqa sözlə, iki dövlət arasında torpaq alış-verişi beynəlxalq hüquqda çox normal təcrübədir”, – Qədirli qeyd edib.

“Mən israr etmirəm ki, biz də mütləq belə etməliyik, amma qeyd edirəm ki, bu, dünya təcrübəsində mümkündür”, – deputat əlavə edib.

““Zəngəzur dəhlizi”ni icarəyə götürmək olar”

Daha sonra Erkin Qədirli bu nümunələri bizim regiona uyğunlaşdırıb:

“Məsələn, “Zəngəzur dəhlizi”. Biz oranı yüz illik icarəyə götürə bilərik. Yavaş-yavaş əraziləri mənimsəyirsən, öz maraq dairənə salırsan. Bütün bunlar beynəlxalq hüququn bütün qaydalarına uyğun həyata keçirilir.

Danışıqlar zamanı bu təklifi irəli sürmək olar. Biz bunu sınaqdan çıxarmalıyıq”.

Niyə KTMT münaqişəyə müdaxilə etmir?

Çıxışı zamanı deputat Ermənistanın Kollektiv Təhlükəsizlik Müqaviləsi Təşkilatına (KTMT) müraciət etməsi məsələsinə də toxunub.

“Təşkilatın Ermənistan və Azərbaycan arasındakı sərhəd məsələsinə müdaxiləsi üçün heç bir əsas yoxdur. Əgər belə bir əsas olsaydı, onlar müharibənin qızğın vaxtında müdaxilə edərdilər.

Azərbaycan öz xarici siyasətini elə qurub ki, Rusiyadan başqa – o böyük ölkədir və  ayrıca durur – KTMT üzvləri Belarus, Qazaxıstan, Tacikistan, Qırğızıstan bizimlə yanaşı dayanır. Onlar bizə qarşı heç bir addım atmayacaqlar. Hətta əksinə.

Rusiya müharibə zamanı da özünü Paşinyanın gözlədiyi kimi aparmadı. Ermənistanın baş naziri də Fransa və ABŞ-dan olan vasitəçiləri regiona çağırmaqla Rusiyanın maraqlarını pozub.

Mən Rusiyanı müzakirə etmək istəmirəm, onunla bizim gələcəkdə öz pproblemlərimiz olacaq.

Amma beynəlxalq vasitəçiləri regiona daxil etmək üçün bizim də razılığımız tələb olunur, çünki bu həm də bizim sərhədimizdir. Ermənistan bizimlə sərhədə başqa ölkələrin hərbçilərini yerləşdirə bilməz. Bu mümkün deyil. Bunun üçün bizim də razılığımız tələb olunur, Azərbaycan isə belə bir razılıq verməyəcək”, – Qədirli Azərbaycanın İctimai Televiziyasına müsahibəsində bildirib.