Azərbaycanın baş nazirinin müavininin nəvəsi ağır yol qəzası törətməkdə günahlandırılır

Bakının aeroport yolunda iki bahalı avtomobilin ötüşməsi ağır qəza ilə nəticələnib, iki nəfər həlak olub, üç nəfər ağır yaralıdır. İlkin məlumata görə, qəzanın səbəbkarı baş nazirin müavini və Qaçqın və Məcburi Köçkünlərlə İş üzrə Dövlət Komitəsinin sədri Əli Həsənovun nəvəsi 21 yaşlı Nail Allahverdiyevin idarə etdiyi Mercedes Geländewagen markalı maşın olub.

70 km/saat sürət məhdudiyyəti olan yolda 220 km/saat sürətlə hərəkət edən avtomobilin sürücüsü idarəetməni itirib, əvvəlcə digər maşına çırpılıb, daha sonra isə yerüstü keçiddəki piyadanı vurub öldürüb. Daha sonra avtomobil qarşı yola çıxıb və daha iki piyadanı vurub. Sonra aşan maşın yanmağa başlayıb. Piyadadan başqa Mersedes-dəki sərnişin də həyatını itirib. Üç nəfər ağır yaralıdır, onlardan ikisi Türkiyə vətəndaşı olan evli cütlükdür. Allahverdiyevin özü də ağır yanıq xəsarətləri ilə xəstəxanaya çatdırılıb.

Bəzi nəşrlər insidentdən sonrakı ilk saatlarda “Mersedes”in sükanı arxasında baş nazirin müavininin nəvəsinin deyil, həlak olan sərnişinin olduğunu iddia edərək onu təmizə çıxarmağa çalışıb. Amma növbəti gün Daxili İşlər Nazirliyinin mətbuat katibi Ehsan Zahidov virtual.az saytına bildirib ki, videokameraların qeyd etdiyi görüntülərdən avtomobili məhz Allahverdiyevin idarə etdiyi müəyyən olunub.

Nail Allahverdiyev yalnız baş nazirin müavininin nəvəsi deyil, eyni zamanda Dövlət Sərhəd Xidməti rəisi general-polkovnik Elçin Quliyevin kürəkənidir, qızı ilə Allahverdiyevin toyu bir ay öndə olub.

“Qaçqınkom”un sədri Əli Həsənov öz növbəsində hadisəni şərh etmək istəməyib: “Bu haqda danışmaq istəmirəm. Anlamıram, niyə mənim adım mətbuatda hallandırılır. Hüquqi dövlətdə hər kəsin məsuliyyəti fərdidir. Çox istəyərdim ki, bunu anlayasız”, – gununsesi.info agentliyi Həsənovdan sitat gətirib.

Bu insident cəmiyyətdə böyük rezonans doğurub. Adətən olduğu kimi, adlarını qeyd etmədən sosial şəbəkə istifadəçilərinin bəzilərinin şərhlərini təqdim edirik.

“Bəlkə də Əli Həsənova bu avtoparkı bağışlamaq olardı, əgər o, gömrük və ya vergi naziri olsaydı. Amma o, qaçqınların həyatına görə məsuliyyətlidir. İndi o, hansı üzlə onlar qarşısında 36 manatlıq (20 dollar) yolçu payı qədər müavinətlərə haqq qazandıracaq?”

“Əli Həsənovu qaçqınlara elədiklərinə görə Allahın qəzəbi tutub. Qoy, indi tikdiyi qəsəbələr yoxlansın, qəsəbələrin inşasında nə qədər pul yeyib. Qaçqınlar üçün qəsəbələrdə olan bütün ticarət və məişət obyektlər onun qohumlarnın adına qeydiyyata alınıb. Yoxsa onun törəməsində 250 min dollarlıq maşın hardandı? Hələ deyirlər bu maşınlardan onda bir dənə deyil”.

“Hər dəfə deyirəm və yazıram ki, bizdə məmur və deputat uşaqlarından ibarət Mütəşəkkil Cinayətkar Qruplaşmalar mövcuddur! Onların “krışası” isə ataları və analarıdır! Onlar yalnız sadə vətəndaşlar üçün deyil, bütün cəmiyyət, dövlətin təhlükəsizliyi üçün təhdiddirlər. Qoy, indi hüquq-mühafizə orqanlarımız düşünsünlər ki, bütün bunlar nə ilə nəticələnə bilər”.

“Hər şey bir yana, Əli Həsənov informasiya müharibəsində düşmənlərimizə yaxşı “bəhanə” verdi. İndi qaçqınlar üzrə komitə rəhbəri hansı üzlə bu qaçqınları və məcburi köçkünləri beynəlxalq görüşlərdə təmsil edəcək?”

“Prezidentin yerində olsaydım, bu gənci Qarabağa, ön cəbhəyə, ən ağır mövqeyə göndərərdim. Qoy, yaşıdlarının hansı şərtlər altında yaşadığı ilə yaxından tanış olsun”.