Azərbaycanda seks qalmaqallarının yeni dalğası: hədəfdə “iqtidar partiyası”nın funksionerləridir

Azərbaycanı seks qalmaqalların yeni dalğası bürüyüb. İntim videoların yayılmasının əsas məqsədi müxalifətçilərin gözdən salınması olduğu əvvəlki hallardan fərqli olaraq bu dəfə hədəfdə iqtidarda olan Yeni Azərbaycan Partiyasının funksionerləridir. Ekspertlər dələduzların videozəngləri haqda xəbərdarlıq edirlər.

• Azərbaycanda növbəti intim video qalmaqalı: bu cür məlumatlar haradan və necə yayımlanır?
• Azərbaycanda müxalifətçi bacısının intim görüntüləri ilə şantaj olunur
• Gürcüstan: deputatı seksual zorakılıqda ittiham edən qız özü aqressiya obyektinə çevrilib

Nə baş verib?

Sentyabrın 8-də Azərbaycanın hakimiyyətyönlü xəbər saytları Yeni Azərbaycan Partiyasının (YAP) Binəqədi rayon təşkilatının sədri Ramiz Göyüşovun intim videosunu yayıb. Bakı şəhərinin ən böyük rayonlarından birində partiya rəhbəri olan 67 yaşlı Göyüşovun “videodanışıq zamanı ekran görüntüsünün qeydə alındığından xəbəri olmayıb və ehtirasına hakim ola bilməyib”, – məlumatda deyilir.

Göyüşovun özü yayılmış videonu şərh edib və bildirib ki, video şantaj məqsədilə quraşdırılıb:

“Bu gün bir xanım mənə görüntülü zəng etdi. Dəfələrlə zəngi geri çevirsəm də, o, mənə təkrar zəng vurdu. Çox zəngdən sonra açdım. Əvvəlcə nə baş verdiyini başa düşmədim. Xanım yarıçılpaq formada idi. Ona irad bildirib, telefonu söndürdüm. Sonra o, yenə yığdı. Yayılan videodan da görünür ki, mən məsələni anlamıram. Çünki ilk dəfə idi, belə bir halla qarşılaşırdım. Gördüm, qadının məqsədi başqadır, onu bloka atdım. Bir az sonra mənə Türkiyə nömrəsi ilə bu video göndərildi. Məni şantaj elədilər ki, əgər onlarla əlaqəni kəssəm, haqqımda video paylaşacaqlar. Təbii ki, onların bu istəyini rədd elədim. İndi məndən qisas almaq üçün o videogörüntünü yayıblar”.

Partiyanın reaksiyası

Ölkə prezidenti İlham Əliyevin sədrlik etdiyi iqtidar partiyası Göyüşovun hazırda partiyanın rayon təşkilatının sədri olmadığını bildirib.

Üstəlik sentyabrın 10-da Yeni Azərbaycan Partiyasının idarə heyətinin iclası baş tutub və Ramiz Göyüşov siyasi partiyanın sıralarından xaric edilib.

Müxalifətçi əksini sübut etməyə çalışır

Amma müxalif Respublikaçı Alternativ Partiyasının liderlərindən biri Natiq Cəfərli Yeni Azərbaycan Partiyasının sənədlərini analiz edərək Ramiz Göyüşovun videosu yayılan zaman onun Azərbaycanda dominantlıq edən partiyanın rayon təşkilatında rəhbər vəzifə tutduğunu sübut edir:

“Rəsmi məlumatda deyilir ki, Ramiz Göyüşovun YAP Binəqədi rayon təşkilatının sədri kimi səlahiyyətlərinə cari il iyunun 30-da keçirilmış hesabat konfransında artıq xitam verilib.

Daxil oldum YAP-ın rəsmi saytına, doğrudan da 30 iyun tarixində konfrans olub, sədr kimi Ramiz Göyüşov çıxış edib, hesabat dövründə rayon təşkilatının işi qənaətbəxş hesab edilib – vəssalam. Sədrin dəyişdirilməsi ilə bağlı heç bir məlumat yoxdur, daha ötəsi, youtube kanalında tədbirin qısa video-xülasəsi də var, orda da sədr dəyişikliyi haqında məlumat yoxdur, sədr kimi açılışda da, tədbirin sonunda da Ramiz Göyüşov çıxış edib.

Azərbaycanın dövlət-hökumət orqanlarında, dövlət şirkətlərində belə bir qayda var – kim işə qəbul olunursa, iki ərizə yazır: Birinci ərizə işə qəbulla bağlı yazılır, tarix, imza, yerində olur, ikinci ərizə isə işdən azad edilməsi ilə bağlı ərizə olur – imza çəkilir, amma tarix qoyulmur. Praktika belədir, hər hansı bir işçinin səhvi, ictimai-siyasi “çaşması” olursa, həmin hadisədən 1-2 ay öncəyə həmin ərizədə tarix yazılır, şəxsin hadisədən həftələr öncə işdən azad edildiyi bəyan edilir, iş bağlanır.

Deyəsən, eyni praktika YAP-da da var: Adam sədr ola-ola köhnə tarixlə 30 iyunda işdən çıxarıldığı deyilir. Sistem deyil e, multfilmdir…”

Daha bir qalmaqal

Sentyabrın 10-da Azərbaycan KİV-də iqtidar partiyası daxilində daha bir seks qalmaqalı haqda məlumat yayılıb. Məlumata əsasən, bu dəfə kamera qarşısında uyğunsuz vəziyyətdə yaxalanan Yeni Azərbaycan Partiyasının Salyan rayon təşkilatının sədr müavini Vüsal Həsənli olub.

Amma partiyanın ictimaiyyətlə əlaqələr şöbəsinin rəhbəri Elməddin Quliyev bu məsələni şərh edərkən qeyd edib ki, YAP-ın rayon təşkilatında bu adda nəinki sədr müavini, heç sıravi üzv də olmayıb.

Ekspertin xəbərdarlğı

Ekspert Fərid Pərdəşünasın sözlərinə görə, Azərbaycan bu günlərdə kiber-şantajçıların hədəfindədir və bu cür kütləvi hücumlardan siyasi xadimlər zərər çəkə bilər.

“Dostlar ehtiyyatlı olun. Azərbaycana kiber şantaj hücumu var. Bir çox siyasi şəxslər də hədəflənir. Xüsusən yaşlı nəsil diqqətli olmalıdır.

Hücum növündə sizə tanımadığınız şəxslər zəng edir və danışıq ərzində sizə intim hərəkətlər nümayiş etdirilir və sizdən tələb olunur ki, öz məharətlərinizi göstərəsiniz. Siz bunu edəndə isə danışıq video yazı şəklində qeydə alınır. Daha sonra videonun silinməsi üçün vəsait tələb olunur. Etmədiyiniz halda isə videolarınız internetdə yayılır.

Mənə də bir sıra belə zənglər daxil olub, lakin prosesdən xəbərdar olan ağdamlı olduğum üçün, əks həmlə ilə birinci videonu mən çəkmişəm. Bu hücumdan qorunmağın yolu diqqətli olmaq, tanımadığınız adamlarla virtual intim münasibətlərdən çəkinməkdir”, – ekspert qeyd edib.