“Azərbaycanda 3 ayda 34 nəfər siyasi motivlərlə həbs edilib”
Azərbaycanda siyasi məhbuslar
Hüquq müdafiəçilərinin bəyanatına görə, son 3 ayda Azərbaycanda 34 nəfər siyasi motivlərlə həbs edilib. Həmin dövrdə əvvəlki siyahıda olan 12 siyasi məhbus azadlığa buraxılıb. Nəticədə son siyahıya görə hazırda ölkədə 204 siyasi məhbus var.
- Azərbaycan 100 min nəfərə düşən məhbusların sayına görə Avropa Şurası ölkələri arasında ilk sıralardadır
- Azərbaycanda bir sıra QHT-lərə qarşı 2014-cü ildə başlanmış cinayət işi bağlanır
- Gürcüstanda tənqidi media təsisçisi Nika Qvaramiya Beynəlxalq Mətbuat Azadlığı Mükafatına layiq görülüb
İyulun 31-də “Azərbaycan siyasi məhbuslarına azadlıq” İttifaqı 204 nəfərin daxil olduğu yenilənmiş siyahı dərc edib.
İnsan haqları strukturunun əvvəlki siyahısı aprelin 20-də açıqlanıb və bu siyahıya 182 nəfər daxil edilib.
12 nəfər isə onu tərk edib, bəziləri may ayının əfv fərmanına düşüb və ya cəza müddəti bitdikdən sonra azadlığa çıxıb.
Eyni zamanda siyahıya 34 yeni ad əlavə olunub.
Onların arasında müxalif siyasətçi və iqtisadçı, Azərbaycan Demokratiya və Rifah Partiyasının sədri Qubad İbadoğlu, sabiq deputat, ictimai xadim və iş adamı Nazim Bəydəmirli, AXCP üzvü Elxan Əliyev də var. Siyahıda yer alan yeni simaların qalanları aprel-iyul aylarında narkotik alveri ittihamı ilə həbs edilən dindarlardır. Dindar siyasi məhbusların ümumi sayı 147 nəfərə çatıb.
204 siyasi məhbus 7 qrupa bölünür.
Birinci “jurnalist və bloqer” qrupunda Polad Aslanov, Osman Nərimanoğlu və bloggerlər Bəxtiyar Hacıyev, Rəşad Ramazanov və Aslan Qurbanov da daxil olmaqla 5 nəfər var.
“Müxalif partiya və hərəkatların üzvləri” qrupunda 7 nəfər, o cümlədən Azərbaycan Xalq Cəbhəsi Partiyasının fəalları – Əlizamin Salayev, Niyaməddin Əhmədov, Şahin Hacıyev, Aqil Hümbətov, eləcə də yuxarıda adları çəkilən üç yeni şəxs var. Həmin partiyanın üzvü Elxan Əliyev, ADR sədri Qubad İbadoğlu və eks-deputat Nazim Bəydəmirli.
“Almaniyadan deportasiya edilən siyasi mühacirlər” qrupunda 5 nəfər var.
Dindarlar qrupunda artıq 147 var.
Tərtər işi üzrə 7, Gəncə işi üzrə 22 nəfər siyahıda qalıb.
Daha 11 siyasi məhbus ömürlük həbs cəzasını çəkir.
Bu şəxslər 1990-cı illərin ortalarında OPON qiyamına və digər cinayətlərə görə həbs edilərək ölüm cəzasına məhkum ediliblər. Ölüm hökmü ləğv edildikdən sonra onlar avtomatik olaraq parlamentin qərarı ilə ömürlük həbs cəzası verildi. Hərçənd həbs olunduqları zaman edamın alternativi 15 il həbs cəzası idi. Hüquq müdafiəçiləri hesab edirlər ki, qanunun geriyə qüvvəsi olmadığı üçün həmin şəxslər azad edilməli idi.
2018-ci ilin noyabr ayından “Azərbaycan siyasi məhbuslarına azadlıq” İttifaqının siyahısı Sülh və Demokratiya İnstitutunun direktoru Leyla Yunus və Siyasi Məhbusların Monitorinqi Mərkəzinin rəhbəri Elşən Həsənov tərəfindən tərtib edilir. İlk dəfə olaraq siyahıda 200-dən çox adam yer alıb.
