Azərbaycanlı tələbə Konstitusiya məhkəməsi vasitəsilə puısuz təhsil hüququ əldə etdi

Azərbaycanın Konstitusiya məhkəməsi Azərbaycan Tibb universitetinin tələbəsi Cavidan Qafarovun iddiasını təmin edib və hər iki valideynini itirmiş tələbələrin təhsil pulu ödənişindən azad olunması barədə qərar verib.

Ən yüksək məhkəmə orqanı iki müxtəlif qanunlardakı ziddiyyətləri təsdiq edərək mübahisəni tələbənin xeyrinə həll edib. İndiyədək valideynlərini itirmiş uşaqlar yalnız 18 yaşına qədər təhsil haqqı ödəməkdən azad idilər. İndidən belə bu güzəşt dövlət ali məktəblərinin əyani şöbələrində təhsil alan bütün tələbələrə şamil olunacaq.

Cavidan Qafarov “Qafqazinfo” agentliyinə müsahibəsində deyib ki, ondan əvvəl də belə cəhdlər olub, amma məhz onun işini məhkəmə araşdırıb və müsbət qərar qəbul edib. Tələbə onun iddiasını dəstəkləyən və qələbəyə çatdıran vəkili Turqay Həsənova minnətdarlığını bildirib və əlavə edib ki:  “Bütün tələbələrə müraciət edirəm ki, öz hüquqlarına bələd olsunlar və haqlarını tələb etməyi bacarsınlar”.

Təhsil məsələləri üzrə ekspert Kamran Əsədovun sözlərinə görə Azərbaycanda hər iki valideynindən məhrum olan 389 tələbə pullu şöbələrdə təhsil alırlar. Hər il belə 5-10 tələbə təhsil pulu ödəyə bilmədikləri üçün oxumaqdan imtina etməyə məcbur olurlar.

Milli Məclisin üzvü Zahid Oruc bildirib ki, parlament Konstitusiya məhkəməsinin qərarını nəzərə alacaq. O əlavə edib ki, qanuna düzəliş proseduru adətən altı aya qədər uzana bilər.